Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yobo 3:1-26

3  Endzhaku ka leswi Yobo a pfula nomu wakwe a rhukana siku rakwe.+  Kutani Yobo a angula a ku:   “A ri fe siku leri ndzi nga velekiwa ha rona,+ Nivusiku lebyi un’wana a nga te, ‘Ku tikiwe munhu la tiyeke emirini!’   Loko ku ri siku rero, a ri ve munyama. Xikwembu xi nga ri languti xi ri ehenhla, Ni ku vonakala ka siku ku nga vangami ehenhla ka rona.   A ri ve siku ra munyama ni ndzhuti lowukulu. Papa ra mpfula a ri tshame ehenhla ka rona. A ri hlaseriwe hi swilo leswi endlaka siku ri va munyama.+   Vusiku byebyo—a byi dzwihale;+ Byi nga tshuki byi tsaka emasikwini ya lembe; Byi nga tshuki byi hlayiwa exikarhi ka tin’hweti ta ku rhendzeleka ka n’weti.   Waswivo! Vusiku byebyo—a byi ve mhika; Byi nga tshuki byi huwelela hi ku tsaka.+   A byi sandziwe hi lava rhukanaka siku, Lava lunghekeleke ku pfuxa Levhiyathani.+   Tinyeleti ta ku vonakala ka byona a ti hundzuke munyama; A byi rindze ku vonakala, kambe ku vonakala ku nga vi kona; Naswona byi nga ku voni ku vangama ka vurhonga. 10  Hikuva a byi yi pfalanga nyangwa ya khwiri ra manana,+ Leswaku byi tumbeta ku karhateka ndzi nga ku voni. 11  Hikwalaho ka yini ndzi nga felanga embelekweni?+ Hikwalaho ka yini ndzi nga humanga ekhwirini kutani ndzi timeka? 12  Hikwalaho ka yini matsolo ma ndzi amukerile, Naswona hikwalaho ka yini ndzi kume mavele+ yo an’wa eka wona? 13  Hikuva sweswi a ndzi ta va ndzi etlele leswaku ndzi nga kavanyetiwi;+ A ndzi ta va ndzi etlele khale; a ndzi ta va ndzi wisile+ 14  Ni tihosi ni vatsundzuxi va misava,+ Lava tiakelaka tindhawu leti nga marhumbi,+ 15  Kumbe ni tihosana leti nga ni nsuku, Leti tataka tindlu ta tona hi silivhere; 16  Kumbe, loko a ndzi nga vanga kona ku fana ni ku onhaka ka khwiri+ loku fihlekeke, Ku fana ni vana lava nga ku vonangiki ku vonakala.+ 17  Kwalaho lavo homboloka a va ha karhateki,+ Kwalaho lava heleke matimba va wisile.+ 18  Vakhotsiwa va tshamisekile; Entiyisweni a va ri twi rito ra loyi a va tirhisaka.+ 19  Kwalaho lavatsongo ni lavakulu va fana,+ Ni hlonga ri ntshunxekile eka n’wini wa rona. 20  Hikwalaho ka yini xi nyika la karhatekaka ku vonakala, Ni vutomi eka lava moya-xiviri wa vona wu karhatekeke?+ 21  Hikwalaho ka yini ku ri ni lava va rindzeke rifu, kasi a ri kona,+ Hambiloko va hambeta va ri cela ku tlula xuma lexi fihliweke? 22  Lava tsakaka va tlhela va tsakisisa swinene, Va khana hikuva va kuma ndhawu yo lahleriwa eka yona. 23  [Hikwalaho ka yini xi n’wi nyika ku vonakala] munhu la tiyeke emirini, loyi tindlela takwe ti tumbeleke,+ Loyi Xikwembu xi n’wi sirhelelaka?+ 24  Hikuva emahlweni ka swakudya swa mina ku ni nhlomulo,+ Naswona ku cema ka mina ku khuluka ku fana ni mati;+ 25  Hikuva ndzi chava xilo lexi chavisaka, xi ta ehenhla ka mina; Naswona nchumu lowu wu ndzi chavisaka wu ta eka mina.+ 26  A ndzi si tshama ndzi ntshunxeka, kumbe ndzi nga kavanyetiwi, Kumbe ndzi kuma ku wisa, kambe maxangu ma fika.”

Tinhlamuselo ta le hansi