Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yobo 28:1-28

28  “Hakunene yi kona ndhawu leyi silivhere yi kumekaka eka yona Ni ndhawu leyi va tengisaka nsuku eka yona;+   Nsimbi yi tekiwa entshurini wunene+ Naswona koporo yi chuluriwa yi huma eribyeni.   Xi veke makumu ya munyama; Xi lavisisa ku fika emukumu hinkwawo+ Xi lavisisa ribye eku dzwihaleni ni le ndzhutini lowukulu.   Xi cele khele ekule ni laha vanhu va luveleke kona,+ Etindhawini leti rivariweke, leti nga ekule ni milenge; Vanhu van’wana va nyama va hojomerile, va ncikinya.   Loko ku ri misava, swakudya swi huma eka yona;+ Kambe endzeni ka yona, yi tlhengusiwile ku fana niloko yi tlhengusiwe hi ndzilo.   Maribye ya yona i ndhawu ya safiri,+ Naswona yi ni swiphemu swa nsuku.   Ndlela—leyi ku nga riki na nyenyana leyi dyaka nyama,+ leyi yi yi voneke, Hambi ku ri tihlo ra mangatlu+ a ri yi vonanga.   Swivandzana leswikulu a swi yi kandziyelanga yi gandleka; Xinghalana a xi kandziyanga ehenhla ka yona.   Xikwembu xi tshambulutele voko ra xona ehenhla ka ribye ro tiya; Xi wise tintshava ku suka etimitswini ta tona; 10  Emaribyeni u endle misele leyi teleke hi mati,+ Tihlo ra xona ri vone swilo swa risima hinkwaswo. 11  Tindhawu leti milambu yi pfelelaka eka tona xi ti endle madamu,+ Xilo lexi tumbetiweke xi xi humesela eku vonakaleni. 12  Kambe vutlhari—byi nga kumeka kwihi,+ Sweswi yi kwihi ndhawu ya ku twisisa? 13  Munhu wa nyama a nga wu tivi nxavo lowu swi xavisiwaka ha wona,+ Naswona a wu kumeki etikweni ra lava hanyaka. 14  Xidziva xa mati xi te, ‘A ndzi na kona!’ Ni lwandle ri te, ‘A ndzi na kona!’+ 15  A byi nge cincisiwi hi nsuku+ Ni silivhere a yi nge pimiwi leswaku yi byi xava. 16  Byi nga ka byi nga hakeriwi hi nsuku wa Ofiri,+ Hi ribye ra onikisi leri pfumalekaka ni safiri. 17  Nsuku ni nghilazi a swi nge fanisiwi na byona, Ni xibya xin’wana ni xin’wana xa nsuku a xi cincisaniwi na byona. 18  Korala+ ni kristala ya ribye a swi nge vuriwi, Kambe nkwama lowu teleke hi vutlhari wu durha ku tlula lowu teleke hi tiperela.+ 19  Topazi+ ya Kuxi a yi nge pimanisiwi na byona; A byi nge hakeriwi ni hi nsuku lowu tengeke. 20  Kambe vutlhari—byi huma kwihi,+ Sweswi yi kwihi ndhawu ya ku twisisa? 21  Byi fihliwile ni le matihlweni ya lava hanyaka hinkwavo,+ Byi tumbeteriwe ni swivumbiwa leswi hahaka swa matilo. 22  Ndzoviso ni rifu swi te, ‘Hi twe xiviko xa byona hi tindleve ta hina.’ 23  Xikwembu hi xona xi twisiseke tindlela ta byona,+ Xona xi tive ndhawu ya byona, 24  Hikuva xona xi languta makumu hinkwawo ya misava;+ Xi vona ehansi ka matilo hinkwawo, 25  Leswaku xi pima ntiko wa mheho,+ Kasi xi pime mati hi xipimo;+ 26  Loko xi vekela mpfula xileriso,+ Ni ndlela ya papa ra ku dzindza, 27  Hi kona xi vonaka vutlhari kutani xi sungula ku byi twarisa; Xi byi lunghiselerile ni ku byi lavisisa. 28  Kutani xi ya emahlweni xi byela munhu xi ku, ‘Waswivo! Ku chava Yehovha—sweswo i vutlhari,+ Naswona ku fularhela vubihi i ku twisisa.’”+

Tinhlamuselo ta le hansi