Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yobo 22:1-30

22  Elifazi lowa Mutemani a ya emahlweni a hlamula a ku:   “Xana munhu la tiyeke emirini a nga pfuna yini eka Xikwembu,+ Leswaku un’wana ni un’wana la nga ni ku twisisa a xi pfuna?   Xana Lowa Matimba Hinkwawo wa tsaka hileswi u lulameke,+ Kumbe wa vuyeriwa hileswi u endlaka tindlela ta wena ti pfumala xisandzu?+   Xana a nga ku tshinya hikwalaho ka xichavo xa wena, Xana a nga ya na wena ehubyeni?+   Xana vubihi bya wena a byi talanga ngopfu,+ Xana swidyoho a swi nge heli?   Hikuva u teka xitiyisekiso xa nandzu eka vamakwenu ku nga ri na xivangelo,+ U hluvula hambi ku ri tinguvu ta vanhu lava nga ambalangiki nchumu.   A wu va nyiki lava karhaleke mati yo nwa, Naswona lava nga ni ndlala a wu va nyiki xinkwa.+   Tiko i ra munhu la nga ni ntamu,+ Naswona la khomiwaka hi xihlawuhlawu u tshama eka rona.   Tinoni u ti fambise ti nga khomanga nchumu, Ni mavoko ya vana lava nga riki na vatatana u ma pfotlosile.+ 10  Hi swona leswi endlaka leswaku swirimbana swa tinyenyana swi ku rhendzela,+ Ni ku karhateka ka xitshuketa ku ku chavisa; 11  Kumbe munyama, leswaku u nga voni, Ni mati yo tala ma ku funengeta. 12  Xana Xikwembu a hi xona ku tlakuka ka tilo?+ Naswona languta tinyeleti hinkwato,+ leswaku ti le henhla. 13  Kambe u te: ‘Kahle-kahle Xikwembu xi tiva yini? Xana xi nga avanyisa xi ri eku dzwihaleni lokukulu? 14  Mapapa i vutumbelo bya xona leswaku xi nga voni, Naswona xi famba-famba ebakweni ra le tilweni.’ 15  Xana u ta tshama etindleleni ta khale swinene Leti vanhu vo biha va fambeke eka tona, 16  Vanhu lava wutliweke minkarhi ya vona yi nga si fika,+ Lava masungulo+ ya vona ma khukhuriweke ku fana niloko ma khukhuriwe hi nambu, 17  Lava byelaka Xikwembu xa ntiyiso va ku: ‘Hi fularhele!+ Xana Lowa Matimba Hinkwawo a nga hi endla yini?’ 18  Kambe xona xi tate tindlu ta vona hi swilo leswinene;+ Ni xitsundzuxo xa lavo homboloka xi tshama xi ri ekule na mina.+ 19  Lavo lulama va ta swi vona kutani va tsaka,+ Ni la pfumalaka nandzu u ta va hlekula: 20  ‘Entiyisweni lava kanetanaka na wena va herisiwile; Naswona leswi swi va saleleke swi ta dyiwa hi ndzilo.’ 21  Ndzi kombela leswaku u n’wi tolovela, kutani u hlayisa ku rhula; Kutani swilo leswinene swi ta ta eka wena. 22  Ndzi kombela leswaku u teka nawu enon’wini wakwe, U veka marito yakwe embilwini ya wena.+ 23  Loko u vuyela eka Lowa Matimba Hinkwawo,+ u ta akeka; Loko leswi nga lulamangiki u swi veka ekule ni ntsonga wa wena, 24  Loko ngwedi ya risima yi vekiwa entshurini Ni nsuku wa Ofiri+ eribyeni ra le nkoveni, 25  Kunene na yena Lowa Matimba Hinkwawo u ta va ngwedi ya wena ya risima, Ni silivhere yi ta va nchumu wo hlawuleka swinene eka wena.+ 26  Hi nkarhi wolowo u ta kuma ntsako lowu heleleke+ eka Lowa Matimba Hinkwawo, Naswona u ta tlakusela xikandza xa wena eka Xikwembu.+ 27  U ta kombela eka xona, xi ta ku twa;+ U ta hetisisa+ switshembiso swa wena leswi hlambanyiweke. 28  U ta boha nchumu wo karhi, naswona wu ta hetiseka; Kunene ku vonakala ku ta vangama+ etindleleni ta wena. 29  Hikuva u ta tsongahatiwa loko u vulavula hi ku titlakusa;+ Kambe xi ta ponisa la nga ni mahlo lama titsongahataka.+ 30  Xi ta ponisa munhu la nga riki na nandzu,+ Kunene u ta ponisiwa hikwalaho ka leswi mavoko+ ya wena ma baseke.”

Tinhlamuselo ta le hansi