Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yeremiya 4:1-31

4  “Loko wo vuya, Wena Israyele,” ku vula Yehovha, “u ta vuyela eka mina.+ Loko wo susa swilo swa wena swo nyenyetsa hikwalaho ka mina,+ kutani a wu nge fambi ku fana ni mubaleki.  Kunene loko wo hlambanya+ u ku, ‘Leswi Yehovha a hanyaka hi ntiyiso,+ hi vululami ni hi ku tshembeka,’+ entiyisweni matiko ma ta tikatekisa ha yena, naswona ma ta tibuma ha yena.”+  Hikuva Yehovha u byele vanhu va Yuda na Yerusalema a ku: “Rimani misava leyi rimekaka, mi nga tshameli ku byala exikarhi ka mitwa.+  Yimbani eka Yehovha, mi susa minsuvu ya timbilu ta n’wina,+ n’wina vanhu va Yuda ni vaaki va Yerusalema; leswaku vukarhi bya mina byi nga humi ku fana ni ndzilo, kunene byi hisa ku nga ri na munhu wo byi tima, hikwalaho ka vubihi bya mintirho ya n’wina.”+  Tivisani Yuda, mi swi twarisa eYerusalema,+ mi swi vula naswona mi yimba nanga etikweni hinkwaro.+ Huwelelani hilaha ku twalaka mi ku: “Hlengeletanani, naswona a hi ngheneni emitini leyi tiyisiweke.+  Tlakusani xikombiso hi tlhelo ra Siyoni. Lunghiselelani xisirhelelo. Mi nga yimi mi ku whii!” Hikuva ku ni khombo leri ndzi ri tisaka ri huma en’walungu,+ ku wa lokukulu.  U tlhandlukile ku fana ni nghala ekhwatini ra yona,+ naswona loyi a lovisaka matiko u sukile;+ u humile endhawini yakwe leswaku a endla tiko ra wena ri va xihlamariso. Miti ya wena yi ta wa yi va marhumbi, ku nga ha vi na muaki.+  Hikwalaho ka leswi, tikhameni hi nguvu yo khwaxa.+ Tibeneni swifuva mi rila,+ hikuva ku hlundzuka lokukulu ka Yehovha a ku tlhelanga eka hina.+  “Kutani esikwini rero,” ku vula Yehovha, “mbilu ya hosi yi ta lova,+ ni mbilu ya tihosana; kunene ni vaprista va ta hlamala, ni vaprofeta va ta hlamala.”+ 10  Hiloko ndzi ya emahlweni ndzi ku: “Oho, Wena Yehovha, Hosi leyi Lawulaka! Entiyisweni u va xise hi ku helela vanhu+ lava na Yerusalema, u ku, ‘Ku rhula ku ta va ka n’wina,’+ naswona banga ri fike eka moya-xiviri.” 11  Enkarhini wolowo ku ta byeriwa vanhu lava na Yerusalema: “Ku ni mheho leyi hisaka ya tindlela leti wupfeke emananga+ endleleni leyi yaka eka nhwanyana wa vanhu+ va mina; a hi ya ku peperha kumbe ya ku basisa. 12  Mheho leyikulu yi ta eka mina yi huma eka lava. Kutani ndzi ta va byela vuavanyisi.+ 13  Waswivo! Yena u ta humelela ku fana ni mapapa ya mpfula, ni makalichi yakwe ma fana ni xidzedze.+ Tihanci takwe ti ni rivilo swinene ku tlula magama.+ Khombo eka hina, hikuva hi phangeriwile! 14  Hlantswa mbilu ya wena yi basa evubihini lebyikulu, Wena Yerusalema, leswaku u ponisiwa.+ Xana miehleketo ya wena leyi hoxeke yi ta tshama eka wena ku fikela rini?+ 15  Hikuva rito ri vulavula ri ri eDani+ naswona ri twarisa leswi twisaka ku vava endhawini ya tintshava ya Efrayimi.+ 16  Vulavulani ha swona, ina, ematikweni. Swi twariseni ku lwa na Yerusalema.” “Varindzi va ta va huma etikweni ra le kule,+ naswona va ta humesa rito ra vona ehenhla ka miti ya Yuda. 17  Ku fana ni varindzi va nhova va lwa na yena ematlhelweni hinkwawo,+ hikuva u ndzi xandzukerile,”+ ku vula Yehovha. 18  “Ndlela ya wena ni ku tirhisana ka wena—swi ta nyikiwa wena.+ Leri i khombo eka wena, hikuva ra bava; hikuva ri fike embilwini ya wena.” 19  Oho marhumbu yanga, marhumbu yanga! Ndzi ni switlhavi leswikulu emakhumbini ya mbilu ya mina.+ Mbilu ya mina yi tlhavekile endzeni ka mina.+ A ndzi swi koti ku miyela, hikuva moya-xiviri wa mina wu twe mpfumawulo wa nanga, hungwe ra nyimpi.+ 20  Ku huweleriwa ku wa ehenhla ka ku wa, tiko hinkwaro ri phangiwile.+ Hi xitshuketa mintsonga ya mina yi phangiwile,+ malapi ya ntsonga wa mina hi nkarhinyana. 21  Xana ndzi ta tshamela ku vona xikombiso ku fikela rini ni ku twa mpfumawulo wa nanga?+ 22  Hikuva vanhu va mina i swiphukuphuku.+ A va ndzi lemukanga.+ I vana lava nga tlharihangiki; naswona a va twisisi.+ Va tlharihile eku endleni ka leswo biha, kambe kahle-kahle a va swi tivi ku endla leswinene.+ 23  Ndzi langute tiko, kutani waswivo, a ri nga ri na nchumu, ri onhakile;+ ni matilo, ku vonakala ka wona a ku nga ha ri kona.+ 24  Ndzi vone tintshava, kutani waswivo, a ti ninginika ni switsunga hinkwaswo a swi tsekatsekisiwa.+ 25  Ndzi languta, kutani waswivo, a ku ri hava munhu wa la misaveni, ni swivumbiwa leswi hahaka swa matilo a swi balekile hinkwaswo.+ 26  Ndzi languta, kutani waswivo, ntanga wa mihandzu a wu ri mananga, ni miti hinkwayo ya wona a yi hirimuxiwile.+ A swi endliwa hi Yehovha, hikwalaho ka ku hlundzuka kakwe lokukulu. 27  Hikuva Yehovha u te: “Tiko hinkwaro ri ta va rhumbi,+ xana a ndzi nge ri herisi hi ku helela?+ 28  Hikwalaho ka leswi tiko ri ta rila,+ kunene ni matilo ya le henhla ma ta va munyama.+ Hikuva ndzi vulavurile, ndzi xiyile, naswona a ndzi tisolanga, naswona a ndzi nge tlheli eka swona.+ 29  Muti hinkwawo wa baleka hikwalaho ka mpfumawulo wa vagadi va tihanci ni lava copaka hi vurha.+ Va nghene emakhwatini, va tlhandlukele ni le maribyeni.+ Muti wun’wana ni wun’wana wu siyiwile, a ku na munhu la tshamaka eka yona.” 30  Leswi sweswi u phangeriweke, xana u ta endla yini, tanihi leswi a wu ambala swa ribungu, tanihi leswi a wu vehela swin’wetsin’wetsi swa nsuku, tanihi leswi a wu kurisa mahlo ya wena hi pende ya ntima?+ Ku tisasekisa ka wena a ku ri ka hava.+ Lava va ku navelaka va ku bakanyile; va tshamela ku lava moya-xiviri wa wena.+ 31  Hikuva ndzi twe rito leri fanaka ni ra wansati la vabyaka, maxangu yo fana ni ya wansati la velekaka n’wana wakwe wo sungula,+ rito ra nhwanyana wa Siyoni la hefemutekaka a lava moya. U tshamela ku pfula swandla swakwe:+ “Khombo eka mina, hikuva moya-xiviri wa mina wu karhele hi vadlayi!”+

Tinhlamuselo ta le hansi