Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yeremiya 38:1-28

38  Xefatiya n’wana wa Matani na Gedaliya n’wana wa Paxahuru na Yukala+ n’wana wa Xelemiya na Paxahuru n’wana wa Malikiya+ va twa marito lawa Yeremiya a a ma byela vanhu+ hinkwavo, a ku:  “Yehovha u te, ‘Loyi a hambetaka a tshama emutini lowu hi yena la nga ta dlayiwa hi banga,+ hi ndlala+ ni hi ntungu.+ Kambe loyi a yaka eka Vakalidiya hi yena la nga ta hambeta a hanya, kunene moya-xiviri wakwe wu ta kotisa leswi phangiweke, wu ta hanya.’+  Yehovha u te, ‘Kunene muti lowu wu ta nyiketiwa evokweni ra vandla ra nyimpi ra hosi ya Babilona, kunene yi ta wu teka.’”+  Kutani tihosana ti byela hosi ti ku: “Hi kombela leswaku wanuna loyi a dlayiwa,+ hikuva hi ndlela leyi u tsanisa mavoko ya vavanuna va nyimpi lava seleke emutini lowu ni mavoko ya vanhu hinkwavo, hi ku va byela marito lawa.+ Hikuva wanuna loyi a nga lavi leswaku vanhu lava va va ni ku rhula kambe u lava khombo.”  Hiloko Hosi Sedekiyasi a ku: “Waswivo! U le mavokweni ya n’wina. Hikuva a ku na nchumu nikatsongo lowu hosi yi nga mi hlulaka ha wona.”+  Hiloko va teka Yeremiya va n’wi lahlela exihlobyeni xa Malikiya+ n’wana wa hosi, lexi a xi ri eXivaveni xa Murindzi.+ Kutani va rhelerisa Yeremiya hi mapindza. Kambe exihlobyeni a ku nga ri na mati, a ku ri ni ndzhope; hiloko Yeremiya a mbombomela endzhopeni.+  Ebedi-meleke lowa Muetiyopiya,+ munhu loyi a a ri mutsheniwa, loyi a a ri endlwini ya hosi, a twa leswaku va nghenise Yeremiya exihlobyeni; kasi hosi a yi tshame eNyangweni ya Benjamini.+  Kutani Ebedi-meleke a huma endlwini ya hosi, a vulavula ni hosi, a ku:  “Oho hosi yanga, mufumi, vanhu lava va endle swo biha eka hinkwaswo leswi va swi endleke eka Yeremiya lowa muprofeta, loyi va n’wi lahleleke exihlobyeni, lerova u ta fela+ kona hikwalaho ka ndlala.+ Hikuva xinkwa a xa ha ri kona emutini.” 10  Kutani hosi yi lerisa Ebedi-meleke lowa Muetiyopiya, yi ku: “Teka vavanuna va 30 lava languteriwaka hi wena endhawini leyi, kutani u fanele u humesa Yeremiya lowa muprofeta exihlobyeni a nga si fa.”+ 11  Hikwalaho Ebedi-meleke a teka vavanuna lava languteriwaka hi yena, a ya endlwini ya hosi ehansi ka vuhlayiselo bya xuma+ kutani a teka switlakati leswi hlakaleke ni swiphemu swa malapi leswi hlakaleke kutani a swi rhelerisela eka Yeremiya exihlobyeni+ hi mapindza. 12  Kutani Ebedi-meleke lowa Muetiyopiya a byela Yeremiya a ku: “Ndzi kombela u nghenisa switlakati leswi hlakaleke ni swiphemu swa malapi emakeheleni ya wena ehansi ka mapindza.” Hiloko Yeremiya a endla tano.+ 13  Eku heteleleni va humesa Yeremiya hi mapindza, va n’wi humesa exihlobyeni. Kutani Yeremiya a hambeta a tshama eXivaveni xa Murindzi.+ 14  Hosi Sedekiyasi a rhumela rito leswaku ku ya tekiwa Yeremiya lowa muprofeta a ta eka yena+ hi ndlela yo nghena ya vunharhu,+ leyi nga endlwini ya Yehovha,+ kutani hosi yi byela Yeremiya yi ku: “Ndzi ku vutisa xo karhi. U nga ndzi fihleli nchumu.”+ 15  Yeremiya a angula Sedekiyasi a ku: “Loko ndzo ku byela, xana hakunene a wu nge ndzi dlayi? Loko ndzo tshuka ndzi ku tsundzuxa, a wu nge ndzi yingisi.”+ 16  Hiloko Hosi Sedekiyasi a hlambanya eka Yeremiya evutumbelweni, a ku: “Leswi Yehovha a hanyaka, loyi a hi endleleke moya-xiviri lowu,+ a ndzi nge ku dlayi, naswona a ndzi nge ku nyiketi evokweni ra vanhu lava va lavaka moya-xiviri wa wena.”+ 17  Yeremiya a byela Sedekiyasi a ku: “Yehovha, Xikwembu xa mavuthu,+ Xikwembu xa Israyele,+ u te, ‘Kunene loko wo ya eka tihosana ta hosi ya Babilona, hakunene moya-xiviri wa wena wu ta hambeta wu hanya ni muti lowu a wu nge hisiwi hi ndzilo, kunene wena ni ndyangu wa wena mi ta hambeta mi hanya.+ 18  Kambe loko wo ka u nga yi eka tihosana ta hosi ya Babilona, muti lowu wu ta nyiketiwa evokweni ra Vakalidiya, entiyisweni va ta wu hisa hi ndzilo,+ naswona wena a wu nge baleki evokweni ra vona.’”+ 19  Hosi Sedekiyasi a byela Yeremiya a ku: “Ndzi chava Vayuda lava weleke eka Vakalidiya,+ hikuva va nga tshuka va ndzi nyiketa evokweni ra vona, kunene va nga ha ndzi khoma hi tihanyi.”+ 20  Kambe Yeremiya a ku: “A va nge ku nyiketi hi ndlela yoleyo. Ndzi kombela u yingisa rito ra Yehovha eka leswi ndzi ku byelaka swona, kutani swi ta ku fambela kahle,+ moya-xiviri wa wena wu ta hambeta wu hanya. 21  Kambe loko u ala ku ya,+ Yehovha u endle leswaku ndzi vona nchumu lowu: 22  Waswivo, vavasati hinkwavo lava seleke endlwini ya hosi ya Yuda+ va tisiwa eka tihosana ta hosi ya Babilona,+ va ri, ‘Vavanuna lava nga ni ku rhula na wena va ku yengile,+ va ku hlurile.+ Va mbombomerise nenge wa wena endzhopeni; va tlhentlhele etlhelweni rin’wana.’+ 23  Kutani vasati va wena hinkwavo ni vana va wena va majaha va va yisa eka Vakalidiya, wena a wu nge baleki evokweni ra vona,+ kambe wena u ta khomiwa hi voko ra hosi ya Babilona, naswona muti lowu wu ta hisiwa hi ndzilo+ hikwalaho ka wena.” 24  Sedekiyasi a ya emahlweni a byela Yeremiya a ku: “Ku nga tshuki ku va ni munhu la tivaka swilo leswi, leswaku u nga fi. 25  Kutani loko tihosana+ to tshuka ti twa leswaku ndzi vulavule na wena, ti ta eka wena ti ku, ‘Hi kombela u hi byela, Xana a wu yi byela yini hosi? U nga hi fihleli nchumu, a hi nge ku dlayi. Xana hosi yi ku byele yini?’ 26  wena u ta ti byela u ku, ‘A ndzi tivisa hosi xikombelo xa mina xa tintswalo, leswaku yi nga ndzi tlheriseli endlwini ya Yonatani+ ndzi ya fela kona.’” 27  Hi ku famba ka nkarhi tihosana hinkwato ti ta eka Yeremiya, ti sungula ku n’wi vutisisa. Kutani yena a ti byela hi ku ya hi marito hinkwawo lawa hosi yi ma leriseke.+ Hiloko ti miyela emahlweni ka yena, hikuva mhaka a yi nga twiwanga. 28  Kutani Yeremiya a hambeta a tshama eXivaveni xa Murindzi+ ku fika esikwini leri Yerusalema wu tekiweke ha rona.+ Swi endleke enkarhini lowu Yerusalema wu tekiweke ha wona.+

Tinhlamuselo ta le hansi