Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yeremiya 37:1-21

37  Hosi Sedekiyasi+ n’wana wa Yosiya+ a sungula ku fuma ematshan’weni ya Koniya+ n’wana wa Yoyakimi,+ loyi Nebukadretsara hosi ya Babilona a n’wi endleke hosi etikweni ra Yuda.+  Kutani yena ni malandza yakwe ni vanhu va tiko a va ma yingisanga marito ya Yehovha+ lawa a ma vuleke a tirhisa Yeremiya lowa muprofeta.+  Hosi Sedekiyasi a rhuma Yehukali+ n’wana wa Xelemiya na Sofaniya+ n’wana wa Maseya+ lowa muprista a ya eka Yeremiya lowa muprofeta, a ku: “Hi kombela u hi khongelela eka Yehovha Xikwembu xa hina.”+  Kutani Yeremiya a a nghena a tlhela a huma exikarhi ka vanhu,+ hikuva a va nga n’wi nghenisanga endlwini ya vubohiwa.  A ku ri ni vandla ra nyimpi ra Faro leri a ri huma aEgipta;+ kutani Vakalidiya lava a va rhendzele Yerusalema va twa xiviko malunghana na vona. Hiloko va tshika ku hlasela Yerusalema.+  Rito ra Yehovha ri fika eka Yeremiya lowa muprofeta, ri ku:  “Yehovha Xikwembu xa Israyele u te, ‘Mi fanele mi byela hosi ya Yuda, leyi yi mi rhumeke eka mina leswaku mi ta vutisisa ha mina,+ mi ku: “Waswivo! Vandla ra nyimpi ra Faro leri taka eka n’wina hi xikongomelo xo nyika mpfuno ri ta boheka ku tlhelela etikweni ra rona, aEgipta.+  Kunene Vakalidiya va ta vuya kutani va lwa ni muti lowu, va wu teka, va wu hisa hi ndzilo.”+  Yehovha u te: “Mi nga tshuki mi xisa mimoya-xiviri ya n’wina,+ mi ku, ‘Kunene Vakalidiya va ta suka eka hina,’ hikuva a va nge suki. 10  Hikuva loko n’wina mi dlaye vandla hinkwaro ra nyimpi ra Vakalidiya lava va lwaka na n’wina+ kutani exikarhi ka vona ku sala vanhu lava tlhaviweke,+ un’wana ni un’wana u ta pfuka entsongeni wakwe kutani a hisa muti lowu hi ndzilo.”’” 11  Kuteloko vandla ra nyimpi ra Vakalidiya ri tshike ku hlasela Yerusalema+ hikwalaho ka vandla ra nyimpi ra Faro,+ 12  Yeremiya a suka eYerusalema a ya etikweni ra Benjamini+ kutani a kuma xiphemu xakwe exikarhi ka vanhu. 13  Kuteloko a ri eNyangweni ya Benjamini,+ a ku ri ni ndhuna leyi langutelaka, leyi vito ra yona a ku ri Iraya n’wana wa Xelemiya n’wana wa Hananiya. Kavaloko yi khoma Yeremiya lowa muprofeta, yi ku: “Wena u wela eka Vakalidiya!” 14  Kambe Yeremiya a ku: “I mavunwa!+ A ndzi weli eka Vakalidiya.” Kambe a yi n’wi yingisanga. Kutani Iraya a khoma Yeremiya, a n’wi yisa eka tihosana. 15  Hiloko tihosana+ ti hlundzukela Yeremiya,+ kutani ti n’wi ba,+ ti n’wi nghenisa endlwini ya tinsimbi,+ endlwini ya Yonatani+ lowa matsalana, hikuva a ti yi endle yindlu ya vubohiwa.+ 16  Loko Yeremiya a nghene endlwini ya xihlovo+ ni le makamareni ya munyama, Yeremiya a hambeta a tshama kona masiku yo tala. 17  Kutani Hosi Sedekiyasi a rhumela rito leswaku a ya tekiwa, hiloko hosi yi sungula ku n’wi vutisa swivutiso endlwini ya yena evutumbelweni.+ Hiloko a ku: “Xana ri kona rito leri humaka eka Yehovha?” Yeremiya a ku: “Ri kona!” A ya emahlweni a ku: “U ta nyiketiwa evokweni ra hosi ya Babilona!”+ 18  Kutani Yeremiya a byela Hosi Sedekiyasi a ku: “Xana ndzi ku dyohele hi ndlela yihi wena ni malandza ya wena ni vanhu lava,+ leswi mi ndzi ngheniseke endlwini ya vubohiwa? 19  Kutani, xana va kwihi vaprofeta va n’wina lava va mi profeteleke, va ku, ‘Hosi ya Babilona a yi nge ti eka n’wina ni le ka tiko leri’?+ 20  Kutani ndzi kombela u yingisa, Wena hosi yanga. Ndzi kombela leswaku xikombelo xa mina xa tintswalo+ xi wela emahlweni ka wena, naswona u nga ndzi tlheriseli endlwini ya Yonatani+ lowa matsalana, leswaku ndzi nga feli kwalaho.”+ 21  Hikwalaho Hosi Sedekiyasi a nyika xileriso, kutani va nghenisa Yeremiya ekhotsweni eXivaveni xa Murindzi;+ naswona siku ni siku a a nyikiwa xinkwa xa xirhendzevutana xi huma exitarateni xa vabaki,+ kukondza xinkwa hinkwaxo xi hela emutini.+ Yeremiya a ya emahlweni a tshama eXivaveni xa Murindzi.+

Tinhlamuselo ta le hansi