Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yeremiya 36:1-32

36  Hi lembe ra vumune ra Yoyakimi+ n’wana wa Yosiya, hosi ya Yuda, ku fike rito leri eka Yeremiya ri huma eka Yehovha, ri ku:  “Teka buku leyi songiwaka,+ u tsala eka yona marito+ hinkwawo lawa ndzi ku byeleke wona ku avanyisa Israyele, ku lwa na Yuda+ ni ku lwa ni matiko hinkwawo,+ ku sukela esikwini leri ndzi vulavuleke na wena, ku sukela emasikwini ya Yosiya, ku fikela esikwini leri.+  Kumbexana vanhu va yindlu ya Yuda va ta ri yingisa khombo hinkwaro leri ndzi ehleketaka ku ri tisa eka vona,+ leswaku va tlhela, un’wana ni un’wana endleleni yakwe yo biha,+ nileswaku ndzi rivalela xihoxo xa vona ni xidyoho xa vona.”+  Yeremiya a vitana Baruku+ n’wana wa Neriya leswaku Baruku a tsala marito hinkwawo ya Yehovha lama humaka enon’wini wa Yeremiya lawa Yena a n’wi byeleke wona, ebukwini leyi songiwaka.+  Hiloko Yeremiya a lerisa Baruku, a ku: “Ndzi pfaleriwile. A ndzi swi koti ku nghena endlwini ya Yehovha.+  Kutani wena u fanele u nghena, u hlayela ehenhla ebukwini leyi songiwaka leyi u yi tsaleke eka leswi a swi huma enon’wini wa mina, ku nga marito ya Yehovha,+ swi twiwa hi vanhu endlwini ya Yehovha esikwini ra ku titsona swakudya;+ swi twiwa ni hi vanhu va Yuda hinkwavo lava va humaka emitini ya vona, u fanele u ma hlayela ehenhla.+  Kumbexana xikombelo xa vona xa tintswalo xi ta wela emahlweni ka Yehovha+ naswona va ta tlhela, un’wana ni un’wana endleleni yakwe yo biha,+ hikuva i kukulu ku hlundzuka ni vukarhi lebyi Yehovha a byi vuleke eka vanhu lava.”+  Kutani Baruku+ n’wana wa Neriya a endla hi ku landza hinkwaswo leswi Yeremiya lowa muprofeta a n’wi leriseke swona, a hlayela ehenhla marito ya Yehovha ma huma ebukwini,+ endlwini ya Yehovha.+  Hi lembe ra vuntlhanu ra Yoyakimi+ n’wana wa Yosiya, hosi ya Yuda, hi n’hweti ya vukaye,+ vanhu hinkwavo eYerusalema ni vanhu hinkwavo lava a va huma emitini ya Yuda va ta eYerusalema va huwelela ku titsona swakudya emahlweni ka Yehovha.+ 10  Kutani Baruku a hlayela ehenhla marito ya Yeremiya ma huma ebukwini, endlwini ya Yehovha, ekamareni ro dyela+ ra Gemariya+ n’wana wa Xafani+ lowa mukopi,+ exivaveni xa le henhla, evunghenweni bya nyangwa leyintshwa ya yindlu ya Yehovha,+ swi twiwa hi vanhu hinkwavo. 11  Kutani Mikaya n’wana wa Gemariya n’wana wa Xafani+ a twa marito hinkwawo ya Yehovha ma huma ebukwini. 12  Hiloko a rhelela a ya endlwini ya hosi, ekamareni ro dyela ra matsalana, kutani waswivo, tihosana hinkwato a ti tshamile kwalaho, Elixama+ lowa matsalana na Delaya+ n’wana wa Xemaya na Elinathani+ n’wana wa Akibora+ na Gemariya+ n’wana wa Xafani+ na Sedekiyasi n’wana wa Hananiya ni tihosana letin’wana hinkwato. 13  Kutani Mikaya+ a va byela marito hinkwawo lawa a ma tweke loko Baruku a hlayela ehenhla ku suka ebukwini, swi twiwa hi vanhu.+ 14  Kutani tihosana hinkwato ti rhuma Yehudi+ n’wana wa Nethaniya n’wana wa Xelemiya n’wana wa Khuxi, a ya eka Baruku,+ ti ku: “Buku leyi songiwaka leyi u yi hlayeleke ehenhla swi twiwa hi vanhu—yi teke u ta.” Hiloko Baruku n’wana wa Neriya a teka buku leyi songiwaka, a ya eka tona.+ 15  Kutani ti n’wi byela ti ku: “Hi kombela u tshama ehansi, u yi hlayela ehenhla hi swi twa.” Hiloko Baruku+ a yi hlayela ehenhla ti swi twa. 16  Kuteloko ti twa marito hinkwawo, ti langutana hi ku chava; ti ya emahlweni ti byela Baruku ti ku: “Kunene hi ta byela hosi marito lawa hinkwawo.”+ 17  Hiloko ti vutisa Baruku, ti ku: “Hi kombela u hi byela, Xana u ma tsarise ku yini marito lawa hinkwawo lama humaka enon’wini wakwe?”+ 18  Kutani Baruku a ti byela a ku: “Hi nomu wa yena u ye emahlweni a twarisa marito lawa hinkwawo eka mina, mina a ndzi ri karhi ndzi tsala ebukwini hi inki.”+ 19  Eku heteleleni tihosana ti byela Baruku ti ku: “Famba u ya tumbela, wena na Yeremiya, leswaku a nga vi kona ni un’we loyi a tivaka laha mi nga kona.”+ 20  Kutani ti fika eka hosi, exivaveni,+ buku leyi songiwaka ti yi veka ekamareni ro dyela+ ra Elixama+ lowa matsalana; ti sungula ku vula marito hinkwawo, hosi yi swi twa. 21  Hiloko hosi yi rhuma Yehudi+ leswaku a ya teka buku leyi songiwaka. Hikwalaho a yi teka ekamareni ro dyela ra Elixama+ lowa matsalana.+ Kutani Yehudi a yi hlayela ehenhla hosi yi yingisile ni tihosana hinkwato leti a ti yime ekusuhi ni hosi ti yingisile. 22  Hosi a yi tshame endlwini ya vuxika,+ hi n’hweti ya vukaye,+ xo tshivelela ndzilo+ xi ri karhi xi pfurha emahlweni ka yona. 23  Kuteloko Yehudi a hlaye swiphemu swinharhu kumbe swa mune swa matluka, a yi handzula hi le xikarhi hi mukwana wa matsalana, a yi hoxa endzilweni lowu a wu ri eka xo tshivelela ndzilo kukondza buku hinkwayo leyi songiwaka yi helela endzilweni lowu a wu ri eka xo tshivelela ndzilo.+ 24  Naswona a va chavanga;+ hambi ku ri hosi kumbe malandza ya yona hinkwawo, lawa a ma yingise marito lawa hinkwawo, a va ti handzulanga tinguvu ta vona hi le xikarhi.+ 25  Hambi ku ri Elinathani+ na Delaya+ na Gemariya+ va kombele hosi leswaku yi nga hisi buku leyi songiwaka, kambe a yi va yingisanga.+ 26  Ku tlula kwalaho, hosi yi lerisa Yeramiyele n’wana wa hosi na Seraya n’wana wa Aziriyele na Xelemiya n’wana wa Abideli leswaku va lava Baruku lowa matsalana na Yeremiya lowa muprofeta.+ Kambe Yehovha a va tumbeta.+ 27  Kutani rito ra Yehovha ri fika eka Yeremiya endzhaku ka loko hosi yi hise buku leyi songiwaka leyi nga ni marito lawa Baruku+ a ma tsaleke ma huma enon’wini wa Yeremiya,+ ri ku: 28  “Tlhela u teka buku yin’wana leyi songiwaka, u tsala marito hinkwawo yo rhanga lawa a ma ri eka buku yo sungula leyi songiwaka, leyi hisiweke hi Yoyakimi hosi ya Yuda.+ 29  Eka Yoyakimi hosi ya Yuda u fanele u n’wi byela u ku, ‘Yehovha u te: “Wena u hise buku leyi songiwaka,+ u ku, ‘Ha yini u tsale eka yona+ u ku: “Kunene hosi ya Babilona yi ta ta kutani yi lovisa tiko leri, yi herisa munhu ni xivandzana eka rona”?’+ 30  Hikokwalaho Yehovha u vula leswi eka Yoyakimi hosi ya Yuda, ‘A nge vi na munhu la tshamaka exiluvelweni xa Davhida,+ ntsumbu wa yena wu ta va nchumu lowu cukumeteriwaka ehandle+ eku hiseni ninhlikanhi ni le gwitsini nivusiku. 31  Naswona ndzi ta n’wi tengisa+ yena ni vana vakwe ni malandza yakwe hi xihoxo xa vona,+ naswona vona ni vaaki va Yerusalema ni vanhu va Yuda ndzi ta va tisela khombo leri ndzi ri vuleke eka vona,+ kambe a va yingisanga.’”’”+ 32  Kutani Yeremiya a teka buku yin’wana leyi songiwaka, a yi nyika Baruku n’wana wa Neriya, lowa matsalana,+ loyi a tsaleke leswi humaka enon’wini+ wa Yeremiya, marito hinkwawo ya buku leyi Yoyakimi hosi ya Yuda a yi hiseke hi ndzilo;+ kutani va engeteleriwa marito man’wana yo tala yo fana na wona.

Tinhlamuselo ta le hansi