Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yeremiya 24:1-10

24  Kutani Yehovha a ndzi komba, waswivo, swirhundzu swimbirhi swa makuwa swi vekiwe emahlweni ka tempele ya Yehovha, endzhaku ka loko Nebukadretsara hosi ya Babilona a teke Yekoniya+ n’wana wa Yoyakimi,+ hosi ya Yuda, a n’wi yisa evukhumbini, swin’we ni tihosana ta Yuda ni lava tivaka ntirho wa mavoko+ ni vaaki va makhokholo, va suka eYerusalema leswaku a va yisa eBabilona.+  Loko ku ri xirhundzu xin’wana, makuwa ya xona a ma ri manene ngopfu, ku fana ni makuwa yo rhanga;+ kasi xirhundzu lexin’wana, makuwa ya xona a ma bihe ngopfu, lerova a ma nga dyeki hi ku biha.  Yehovha a ya emahlweni a ku eka mina: “Xana u vona yini Yeremiya?” Hiloko ndzi ku: “Makuwa, makuwa lamanene i manene ngopfu, kasi layo biha ma bihe ngopfu, lerova a ma dyeki hi ku biha.”+  Kutani rito ra Yehovha ri fika eka mina, ri ku:  “Yehovha Xikwembu xa Israyele u te, ‘Ku fana ni makuwa lawa lamanene, ndzi ta va languta hi ndlela yoleyo lava nga evukhumbini va Yuda, lava ndzi nga ta va susa endhawini leyi va ya etikweni ra Vakalidiya,+ hi ndlela leyinene.+  Kutani ndzi ta veka tihlo ra mina ehenhla ka vona hi ndlela leyinene,+ kunene ndzi ta va tlherisela etikweni leri.+ Ndzi ta va aka, a ndzi nge hirimuxi; ndzi ta va byala, a ndzi nge simuli.+  Ndzi ta va nyika mbilu ya ku ndzi tiva,+ leswaku hi mina Yehovha; kutani va ta va vanhu va mina,+ mina ndzi ta va Xikwembu xa vona, hikuva va ta tlhelela eka mina hi mbilu ya vona hinkwayo.+  “‘Kutani ku fana ni makuwa yo biha lama nga dyekiki hi ku biha,+ entiyisweni Yehovha u te: “Ndzi ta nyika Sedekiyasi+ hosi ya Yuda ni tihosana ta yena ni masalela ya Yerusalema lama seleke etikweni leri+ ni lava va tshamaka etikweni ra Egipta+  ndzi ta tlhela ndzi va nyiketa va tsekatsekisiwa, va va ekhombyeni, emimfun’weni hinkwayo ya misava,+ va rhukaniwa ni ku hlekuriwa, va tlhontlhiwa+ ni ku sandziwa,+ etindhawini hinkwato leti ndzi nga ta va hangalasela eka tona.+ 10  Naswona ndzi ta va rhumela banga,+ ndlala+ ni ntungu,+ va kondza va hela emisaveni leyi ndzi va nyikeke yona swin’we ni vatata wa vona.”’”+

Tinhlamuselo ta le hansi