Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yeremiya 19:1-15

19  Yehovha u te: “Famba u ya kuma gula ra vumba ra muvumbi+ ni vakulukumba van’wana va vanhu ni vakulukumba van’wana va vaprista.  Kutani u fanele u ya enkoveni wa n’wana wa Hinomu,+ lowu nga evunghenweni bya Nyangwa ya Swirhengele. U fika kona u huwelela marito lawa ndzi nga ta ku byela wona.+  Kutani u fanele u ku, ‘Twanani rito ra Yehovha, N’wina tihosi ta Yuda na n’wina vaaki va Yerusalema.+ Yehovha wa mavuthu,+ Xikwembu xa Israyele, u te: “‘“Waswivo, ndzi tisa khombo ehenhla ka ndhawu leyi, leri loko munhu wihi ni wihi a ri twa, tindleve takwe ti nga ta hlohlonya;+  hikwalaho ka leswi va ndzi siyeke+ ni hikwalaho ka leswi va endleke ndhawu leyi yi nga ha languteki+ ni ku mbulukisela eka yona xitlhavelo eka swikwembu swin’wana leswi va nga swi tivangiki,+ vona ni vatata wa vona ni tihosi ta Yuda; va tate ndhawu leyi hi ngati ya lava va pfumalaka nandzu.+  Kutani va ake tindhawu leti tlakukeke ta Bali leswaku va hisa vana va vona endzilweni va va magandzelo yo hisiwa lama heleleke ya Bali,+ ku nga nchumu lowu ndzi nga wu lerisangiki kumbe ku vulavula ha wona,+ naswona a wu vanga kona embilwini ya mina.”’+  “‘“Hikokwalaho, waswivo, masiku ma ta,” ku vula Yehovha, “lawa ndhawu leyi yi nga ta ka yi nga ha vitaniwi Tofete+ ni nkova wa n’wana wa Hinomu,+ kambe yi ta vitaniwa nkova wa ku dlaya.  Kutani ndzi ta herisa kungu ra Yuda ni ra Yerusalema endhawini leyi,+ ndzi ta va wisa hi banga emahlweni ka valala va vona ni hi voko ra lava va lavaka moya-xiviri wa vona.+ Mintsumbu ya vona ndzi ta yi nyikela yi va swakudya swa swivumbiwa leswi hahaka swa matilo ni swa swivandzana swa misava.+  Ndzi ta endla muti lowu wu va xihlamariso ni nchumu wo beriwa noti.+ Un’wana ni un’wana loyi a hundzaka eka wona u ta languta hi ku hlamala, a ba noti hikwalaho ka makhombo ya wona hinkwawo.+  Kutani ndzi ta endla leswaku va dya nyama ya vana va vona va majaha ni va vanhwanyana; un’wana ni un’wana u ta dya nyama ya munhu-kulobye, hikwalaho ka ku nonon’hweriwa ni hikwalaho ka maxangu lawa valala va vona ni lava va lavaka moya-xiviri wa vona va nga ta va sivelela ha wona.”’+ 10  “Kutani u fanele u tshova gula ematihlweni ya vanhu lava fambaka na wena. 11  U ta va byela u ku, ‘Yehovha wa mavuthu u te: “Hi ndlela leyi fanaka ndzi ta tshova vanhu lava ni muti lowu ku fana niloko munhu a tshova xibya xa muvumbi lerova xi nga ha lunghiseki;+ naswona eTofete+ va ta lahla kukondza yi nga ha vi kona ndhawu yo lahla eka yona.”’+ 12  “‘Ndzi ta endla hi ndlela yoleyo endhawini leyi,’ ku vula Yehovha, ‘ni le ka vaaki va yona, ndzi endla muti lowu wu fana na Tofete.+ 13  Kutani tindlu ta Yerusalema ni tindlu ta tihosi ta Yuda ti ta fana ni ndhawu ya Tofete,+ lava nga basangiki, ku nga tindlu hinkwato leti emalwangwini ya tona va mbulukiseleke xitlhavelo xa vuthu hinkwaro ra le matilweni,+ ku tlhela ku chululeriwa swikwembu swin’wana magandzelo ya swakunwa.’”+ 14  Kutani Yeremiya a ta a huma eTofete,+ laha Yehovha a a n’wi rhume kona ku ya profeta, a yima exivaveni xa yindlu ya Yehovha ni ku byela vanhu hinkwavo a ku:+ 15  “Yehovha wa mavuthu, Xikwembu xa Israyele u te, ‘Maswivo, ehenhla ka muti lowu ni le henhla ka miti ya wona hinkwayo ndzi tisa khombo hinkwaro leri ndzi ri vuleke ehenhla ka wona, hikuva va nonon’hwise tinhamu ta vona leswaku va nga ma yingisi marito ya mina.’”+

Tinhlamuselo ta le hansi