Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Yeremiya 16:1-21

16  Kutani rito ra Yehovha ri hambeta ri fika eka mina, ri ku:  “U nga tshuki u teka nsati, naswona u nga tshuki u va na vana va majaha ni va vanhwanyana endhawini leyi.+  Hikuva malunghana ni vana va majaha ni va vanhwanyana lava velekiwaka endhawini leyi, ni vamana va vona lava va va velekaka ni vatata va vona lava endlaka leswaku va velekiwa etikweni leri,+ Yehovha u te,  ‘Va ta fa+ va dlayiwa hi mavabyi. A va nge rileriwi,+ ni ku lahliwa a va nge lahliwi.+ Va ta fana ni vulongo ehenhla ka vuandlalo bya misava;+ naswona va ta herisiwa hi banga ni hi ndlala,+ mintsumbu ya vona yi ta va swakudya swa swivumbiwa leswi hahaka swa matilo ni swa swivandzana swa misava.’+  “Hikuva Yehovha u te, ‘U nga tshuki u nghena endlwini ya loyi a nga ni swakudya swa nkosi, naswona u nga va ririsi kumbe ku va tshandzisa.’+ “‘Hikuva ndzi suse ku rhula ka mina eka vanhu lava,’ ku vula Yehovha, hambi ku ri ‘musa wa rirhandzu ni tintswalo.+  Kunene va ta fa, lavakulu ni lavatsongo, etikweni leri. A va nge lahliwi,+ naswona vanhu a va nge va rileli, a ku nge vi na munhu la nga ta tixeka+ kumbe a tsemeta mpandla hikwalaho ka vona.+  A va nge va nyiki xinkwa hikwalaho ka ku rila leswaku va chavelela un’wana hikwalaho ka loyi a feke;+ a va nge va nyiki xinwelo xa nchavelelo va xi nwa hikwalaho ka tatana ni hikwalaho ka manana.+  U nga tshuki u nghena endlwini ya nkhuvo u tshama na vona, u dya u tlhela u nwa.’+  “Hikuva Yehovha wa mavuthu, Xikwembu xa Israyele u te, ‘Maswivo, ematihlweni ya n’wina ni le masikwini ya n’wina ndzi herisa rito ra ku khana ni rito ra ku tsaka, rito ra muteki ni rito ra mutekiwa+ endhawini leyi.’ 10  “Kutaku loko u byela vanhu lava marito lawa hinkwawo kutani va ku angula va ku, ‘Hikwalaho ka yini Yehovha a vule khombo leri lerikulu hinkwaro ehenhla ka hina, naswona hi xihi xihoxo xa hina ni xidyoho xa hina leswi hi dyoheleke Yehovha Xikwembu xa hina ha swona?’+ 11  u fanele u tlhela u va byela u ku, ‘“Hikwalaho ka leswi vatata wa n’wina va ndzi siyeke,”+ ku vula Yehovha, “nileswi va hambeteke va landzelela swikwembu swin’wana, va swi tirhela ni ku swi nkhinsamela.+ Kambe mina va ndzi siyile, ni nawu wa mina a va wu hlayisanga.+ 12  N’wina mi endle leswi tlurisaka eswiendlweni swa n’wina ku tlula vatata wa n’wina,+ kutani un’wana ni un’wana wa n’wina u famba hi ku sihalala+ ka mbilu yakwe yo biha hi ku ka a nga ndzi yingisi.+ 13  Ndzi ta mi lahla mi suka etikweni leri mi ya etikweni leri+ mi nga ri tivangiki,+ hambi ku ri vatata wa n’wina, kutani kona mi ta boheka ku tirhela swikwembu swin’wana+ vusiku ni nhlikanhi, hikuva a ndzi nge mi kombisi tintswalo nikatsongo.”’ 14  “‘Hikokwalaho, waswivo, masiku ma ta,’+ ku vula Yehovha, ‘lawa ku nga ta ka ku nga ha vuriwi leswaku: “Tanihi leswi Yehovha a hanyaka loyi a humeseke vana va Israyele etikweni ra Egipta,”+ 15  kambe: “Tanihi leswi Yehovha a hanyaka loyi a humeseke vana va Israyele etikweni ra le n’walungwini ni le matikweni hinkwawo lawa a va hangalaseleke eka wona,” kunene ndzi ta va tlherisela emisaveni ya vona, leyi ndzi yi nyikeke vatata wa vona.’+ 16  “‘Waswivo, ndzi rhuma vaphasi va tinhlampfi vo tala,’ ku vula Yehovha, ‘kunene va ta va phasa; endzhaku ka sweswo ndzi ta rhuma vahloti vo tala,+ kunene va ta va hlota entshaveni yin’wana ni yin’wana ni le xitsungeni xin’wana ni xin’wana ni le mabakweni ya maribye.+ 17  Hikuva mahlo ya mina ma le henhla ka tindlela ta vona hinkwato. A va tumbelanga emahlweni ka mina, ni xihoxo xa vona a xi fihlekanga emahlweni ka mahlo ya mina.+ 18  Xo sungula, ndzi ta tlherisela hakelo hinkwayo ya xihoxo xa vona+ ni ya xidyoho xa vona, hikwalaho ka leswi va nyamisaka tiko ra mina.+ Va tate ndzhaka ya mina hi mintsumbu ya swilo swa vona leswi nyangatsaka ni hi swilo swa vona leswi nyenyetsaka.’”+ 19  Oho Yehovha ntamu wa mina ni khokholo ra mina, ni ndhawu ya mina yo balekela eka yona esikwini ra maxangu,+ matiko ma ta ta eka wena ma huma emakun’wini ya misava,+ ma ta ku: “Hakunene vatata wa hina a va ri ni mavunwa swinene,+ vuhava ni swilo leswi a swi nga pfuni nchumu.”+ 20  Xana munhu wa nyama a nga tiendlela swikwembu kambe swi nga ri swikwembu?+ 21  “Hikokwalaho waswivo, ndzi va endla leswaku va tiva; enkarhini lowu ndzi ta va endla va tiva voko ra mina ni matimba ya mina,+ kutani va ta tiva leswaku hi mina Yehovha vito ra mina.”+

Tinhlamuselo ta le hansi