Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Vakolosa 4:1-18

4  N’wina vini, hambetani mi endla leswi nga swo lulama ni leswi nga swinene eka mahlonga+ ya n’wina, mi ri karhi mi tiva leswaku na n’wina mi ni N’wini etilweni.+  Phikelelani exikhongelweni,+ mi tshama mi hiteka eka xona hi ku nkhensa,+  hi nkarhi lowu fanaka mi hi khongelela na hina,+ leswaku Xikwembu xi hi pfulela nyangwa+ ya marito, leswaku hi vula xihundla xo kwetsima+ hi ta Kreste, lexi entiyisweni ndzi nga etimpecanini+ ta khotso hikwalaho ka xona;  leswaku ndzi xi kombisa hilaha ndzi fanelaka ku vulavula hakona.+  Hambetani mi famba hi vutlhari eka lava nga ehandle,+ mi tixavela nkarhi lowunene.+  Marito ya n’wina a ma ve ni nsovo+ nkarhi hinkwawo, ma lungiwe hi munyu,+ leswaku mi tiva ndlela leyi mi faneleke ku hlamula+ un’wana ni un’wana ha yona.  Timhaka ta mina hinkwato Tixiko,+ makwerhu la rhandzekaka ni mutirheli wo tshembeka ni hlonga-kulorhi eHosini, u ta mi tivisa tona.  Hi xikongomelo xa leswaku mi tiva swilo leswi yelanaka na hina ni leswaku a chavelela timbilu+ ta n’wina, ndzi n’wi rhuma eka n’wina  swin’we na Onesima,+ makwerhu la tshembekaka ni la rhandzekaka, loyi a humaka exikarhi ka n’wina. Hinkwaswo swilo leswi nga laha va ta mi tivisa swona. 10  Aristako+ khumbi-kulorhi wa mi rungula, na Marka+ makwavo wa Barnaba wa mi rungula, (malunghana na yena mi kume swileriso swo n’wi amukela+ loko a tshuka a tile eka n’wina,) 11  na Yesu loyi a vuriwaka Yusto, lava hi lava va yimbeke. Lava hi vona ntsena lava nga vatirhi-kulorhi emfun’weni wa Xikwembu, naswona vona lava va ve mpfuno lowu tiyisaka eka mina. 12  Epafrasi,+ loyi a humaka exikarhi ka n’wina, hlonga ra Kreste Yesu, wa mi rungula, nkarhi hinkwawo u tikarhatela n’wina eswikhongelweni swakwe, leswaku eku heteleleni mi yima mi hetiseka+ naswona mi va ni ku khorwiseka loku tiyeke hi ku rhandza ka Xikwembu hinkwako. 13  Kunene ndzi nyikela vumbhoni malunghana na yena leswaku u endla matshalatshala lamakulu hikwalaho ka n’wina ni hikwalaho ka lava nga eLawodikiya+ ni lava nga eHiyerapoli. 14  Luka+ n’anga leyi rhandzekaka wa mi rungula, na Demasi+ wa mi rungula. 15  Ndzi runguleleni vamakwerhu lava nga eLawodikiya na Nimfa ni vandlha leri nga endlwini+ yakwe. 16  Kutani loko papila leri ri hlayiwile exikarhi ka n’wina, endlani leswaku ri hlayiwa+ evandlheni ra Valawodikiya ni leswaku na n’wina mi hlaya leri humaka eLawodikiya. 17  Nakambe, byelani Arkipo+ mi ku: “Tshama u ri karhi u languta vutirheli lebyi u byi amukeleke eHosini, leswaku u byi hetisisa.” 18  Hi lawa marungula ya mina Pawulo, lama tsariweke hi voko+ ra mina. Tshamani mi ri karhi mi tsundzuka timpecana+ ta mina ta khotso. Musa lowu nga faneriwiki a wu ve na n’wina.

Tinhlamuselo ta le hansi