Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Vagalatiya 2:1-21

2  Endzhaku ka malembe ya 14 ndzi tlhele ndzi tlhandlukela eYerusalema+ ndzi ri na Barnaba,+ nakambe ndzi fambe swin’we na Tito.  Kambe ndzi tlhandlukile hikwalaho ko hlavuteriwa.+ Kutani ndzi va andlalela+ mahungu lamanene lawa ndzi ma chumayelaka exikarhi ka matiko, hambiswiritano, lava a va ri vanhu lava tivekaka a ndzi va vekela wona exihundleni, hi ku chava leswaku hi ndlela yo karhi a ndzi tsutsuma+ kumbe ndzi tsutsumele swa hava.+  Nilokoswiritano, hambi ku ri Tito,+ loyi a a ri na mina, a nga bohekanga ku yimbisiwa,+ hambileswi a a ri Mugriki.  Kambe hikwalaho ka vamakwerhu va mavunwa+ lava nghenisiweke hi ku nyandlamela,+ lava ngheneke hi ku tumbela va ta kambela ntshunxeko+ wa hina lowu hi nga na wona evun’weni na Kreste Yesu, leswaku va hi endla mahlonga+ hi ku helela—  a hi tinyiketanga eka vona hi ku titsongahata,+ e-e, hambi hi nkarhinyana, leswaku ntiyiso+ wa mahungu lamanene wu tshama wu ri eka n’wina.  Kambe loko ku ri lava a va vonaka va ri xo karhi+ —a ku na ku hambana eka mina+ leswaku a va ri vanhu va muxaka muni eku sunguleni—Xikwembu a xi yi hi ku languteka+ ka munhu—entiyisweni, vanhu volavo lava tivekaka a va hundziselanga nchumu lexintshwa eka mina.  Kambe, ku hambana ni sweswo, loko va vona leswaku ndzi tamerisiwe+ mahungu lamanene ya lava nga yimbangiki,+ hilaha Petro a a tamerisiwe hakona ya lava va yimbeke+  hikuva Loyi a nyikeke Petro matimba lama faneleke ya ku va muapostola wa lava va yimbeke na mina+ u ndzi nyike matimba eka lava va nga va matiko;  ina, loko va tiva musa lowu nga faneriwiki+ lowu ndzi nyikiweke wona,+ Yakobo+ na Khefasi na Yohane, lava a va vonaka va ri tiphuphu,+ va nyike mina na Barnaba+ voko ra xinene ra ku hlangana swin’we,+ leswaku hi fanele ku ya ematikweni, kambe vona va ya eka lava va yimbeke. 10  Ntsena hina hi fanele ku tsundzuka+ swisiwana. Ndzi tlhele ndzi tiyimisela ku swi endla leswi hi mbilu hinkwayo.+ 11  Hambiswiritano, loko Khefasi+ a ta eAntiyoka,+ ndzi n’wi kanete hi langutanile, hikuva a a ri ni xisolo.+ 12  Hikuva ku nga si fika vavanuna van’wana lava humaka eka Yakobo,+ a a tshamela ku dya+ ni vanhu va matiko; kambe loko va fika, a suka kutani a tihlawula, hi ku chava+ va ntlawa+ lowu yimbeke. 13  Vayuda lavan’wana hinkwavo na vona va tihlanganisa na yena eka vukanganyisi+ lebyi, lerova hambi a ri Barnaba+ u fambisane na vona eka vukanganyisi bya vona. 14  Kambe loko ndzi vona leswaku a va nga fambi va lulama hi ku ya hi ntiyiso wa mahungu lamanene,+ ndzi byele Khefasi emahlweni ka vona hinkwavo:+ “Loko wena, hambileswi u nga Muyuda, u hanya kukota leswi matiko ma hanyisaka xiswona, ku nga ri leswi Vayuda va hanyisaka xiswona, swi endlekisa ku yini leswaku u sindzisa vanhu va matiko ku hanya hi ku ya hi mukhuva+ wa Vayuda?” 15  Hina lava hi nga Vayuda hi ntumbuluko,+ naswona hi nga riki vadyohi+ lava humaka eka vamatiko, 16  hilaha hi tivaka hakona leswaku munhu u vuriwa la lulameke+ ku nga ri hikwalaho ka mintirho ya nawu, kambe hi ripfumelo+ ntsena eka Kreste Yesu, tanihi leswi na hina hi veke ni ripfumelo eka Kreste Yesu, leswaku hi vuriwa lava lulameke hikwalaho ka ripfumelo eka Kreste,+ naswona ku nga ri hikwalaho ka mintirho ya nawu, hikuva ku hava nyama leyi nga ta vuriwa leyi lulameke+ hikwalaho ka mintirho ya nawu. 17  Kutani loko na hina hi kumiwe hi ri vadyohi,+ hi ku lava ku vuriwa lava lulameke hikwalaho ka Kreste,+ xana Kreste hakunene i mutirheli wa xidyoho?+ Sweswo swi nga tshuki swi endleka! 18  Hikuva loko ndzi tlhela+ ndzi aka swilo leswi ndzi tshameke ndzi swi wisa, ndzi tikombisa ndzi ri mutlula-nawu.+ 19  Loko ku ri mina, hikwalaho ka nawu ndzi file enawini,+ leswaku ndzi ta hanya eka Xikwembu.+ 20  Ndzi beleriwe swin’we na Kreste.+ A ka ha ri mina loyi a hanyaka,+ kambe i Kreste loyi a hanyaka evun’weni na mina.+ Hakunene, vutomi lebyi ndzi byi hanyaka+ sweswi ndzi ri wa nyama ndzi hanya hi ripfumelo leri nga eka N’wana wa Xikwembu, loyi a ndzi rhandzeke kutani a tinyiketa hikwalaho ka mina.+ 21  A ndzi wu bakanyi musa lowu nga faneriwiki wa Xikwembu;+ hikuva loko ku lulama ku tisiwa hi nawu,+ kahle-kahle Kreste a nga felanga nchumu.+

Tinhlamuselo ta le hansi