Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Vaavanyisi 8:1-35

8  Kutani vavanuna va Efrayimi va ku eka yena: “Xana i nchumu wa muxaka muni lowu u wu endleke eka hina hi ku ka u nga hi viti loko u ya lwa na Midiyani?”+ Va ringete hi matimba ku holova na yena.+  Eku heteleleni a ku eka vona: “Xana ndzi endle yini loko ndzi pimanisiwa na n’wina?+ Xana leswi khwajiwaka swa Efrayimi+ a swi antswi ku ri ni madiriva lama hlengeletiwaka hi Abi-ezere?+  Xikwembu xi nyikete tihosana ta Midiyani ku nga Orebe na Zebe+ evokweni ra n’wina, xana mina ndzi endle yini loko ndzi pimanisiwa na n’wina?” Moya wa vona wu vohle hi nkarhi wolowo loko a vula rito leri.+  Emakumu Gidiyoni a fika eYordani, a wu pela, yena ni vavanuna va 300 lava a va ri na yena, va karhele kambe va ya emahlweni va ti hlongorisa.  Endzhaku a byela vavanuna va le Sukoti+ a ku: “Ndzi kombela mi va nyika swinkwa swa swirhendzevutana vanhu lava landzelaka mikondzo ya mina,+ hikuva va karhele, mina ndzi hlongorisa Zeba+ na Salmuna,+ tihosi ta Midiyani.”  Kambe tihosana ta Sukoti ti ku: “Xana swandla swa Zeba na Salmuna se swi le vokweni ra wena lerova vuthu ra wena ri fanele ri nyikiwa xinkwa?”+  Hiloko Gidiyoni a ku: “Hi yona mhaka leyi loko Yehovha o nyiketa Zeba na Salmuna evokweni ra mina, kunene ndzi ta nyika nyama ya n’wina ntshovelo lowu nga ni mitwa ya le mananga ni swigatlu.”+  Hiloko a ya emahlweni ni ndlela yakwe ku suka kwalaho a ya ePenuwele,+ kutani a vulavula na vona hi mukhuva lowu fanaka, kambe vavanuna va Penuwele va n’wi hlamula hilaha vavanuna va Sukoti va n’wi hlamuleke hakona.  Hikwalaho a byela ni vavanuna va Penuwele a ku: “Loko ndzi vuya hi ku rhula, ndzi ta hirimuxa xihondzo lexi.”+ 10  Sweswi Zeba na Salmuna+ a va ri eKariko, vanhu lava a va ri emixaxeni ya vona va ri na vona, va ri kwalomu ka 15 000, ku ri hinkwavo lava siyiweke enxaxeni hinkwawo wa va le Vuxeni;+ lava se va dlayiweke, a ku ri vavanuna va 120 000 lava a va khoma banga.+ 11  Kutani Gidiyoni a ya emahlweni hi ndlela ya lava va tshamaka emintsongeni hi tlhelo ra le vuxeni bya Noba na Yogibeha,+ ivi a sungula ku hlasela nxaxa hi nkarhi lowu nxaxa a wu nga rindziwanga.+ 12  Loko Zeba na Salmuna va baleka, xikan’we-kan’we a va hlongorisa, a khoma tihosi timbirhi ta Midiyani, Zeba na Salmuna;+ kutani a tisa ku chava enxaxeni hinkwawo. 13  Gidiyoni n’wana wa Yowasi a sungula ku tlhela enyimpini hi ndlela leyi tlhandlukelaka eHerese. 14  Endleleni a khoma jaha ra le Sukoti,+ a ri vutisa.+ Kutani ri n’wi tsalela mavito ya tihosana+ ta Sukoti ni vakulukumba va wona, vavanuna va 77. 15  Hiloko a ya eka vavanuna va Sukoti kutani a ku: “Hi loyi Zeba na Salmuna lava mi ndzi tlhontlheke ha vona, mi ku, ‘Xana swandla swa Zeba na Salmuna se swi le vokweni ra wena lerova vavanuna va wena lava karhaleke va fanele va nyikiwa xinkwa?’”+ 16  Hiloko a teka vakulukumba va muti ni mitwa ya le mananga ni swigatlu, a va hoxa ni vavanuna va le Sukoti, a va nyika dyondzo.+ 17  A hirimuxa+ xihondzo xa Penuwele,+ a dlaya vavanuna va muti wolowo. 18  Kutani a byela Zeba na Salmuna+ a ku: “Xana a ku ri vavanuna va muxaka muni lava mi va dlayeke eTaboro?”+ Vona va ku: “Vona a va fana na n’wina, ha un’we, a va ri ni xivumbeko lexi fanaka ni xa vana va hosi.” 19  Hiloko yena a ku: “A va ri vamakwerhu, vana va manana. Leswi Yehovha a ha hanyaka, loko a mi va londzovote va hanya, a ndzi nga ta boheka ku mi dlaya.”+ 20  Kutani a byela Yetere mativula yakwe a ku: “Suka u yima, u va dlaya.” Kambe jaha a ri ri hlomulanga banga ra rona, hikuva a ri chava, a ra ha ri jaha.+ 21  Xisweswo Zeba na Salmuna va ku: “Wena suka u yima u hi dlaya, hikuva hilaha wanuna a nga hakona, ni matimba yakwe ma tano.”+ Hikwalaho Gidiyoni a suka a yima a dlaya+ Zeba na Salmuna, a teka swin’wetsin’wetsi swa xivumbeko xa n’weti leswi a swi ri etinhan’wini ta tikamela ta vona. 22  Endzhaku vavanuna va Israyele va byela Gidiyoni va ku: “Hi fume,+ wena ni vana va wena ni vatukulu va wena, hikuva u hi ponisile evokweni ra Midiyani.”+ 23  Kambe Gidiyoni a ku eka vona: “Mina a ndzi nge mi fumi, hambi ku ri n’wana wa mina a nge mi fumi.+ Yehovha hi yena la nga ta mi fuma.”+ 24  Gidiyoni a ya emahlweni a ku eka vona: “Inge ndzi hundzisela xikombelo eka n’wina: Un’wana ni un’wana wa n’wina a a ndzi nyike xingwavila+ xakwe xa le nhompfini lexi a xi phangeke.” (Phela a va ri ni swingwavila swa le nhompfini swa nsuku, hikuva a va ri Vaiximayele.)+ 25  Hiloko va ku: “Kunene hi ta ku nyika.” Xikan’we-kan’we va andlala nkhancu, un’wana ni un’wana a hoxela eka wona xingwavila xa le nhompfini lexi a xi phangeke. 26  Ntiko wa swingwavila swa le nhompfini swa nsuku leswi a swi kombeleke wu endle tixikele ta 1 700, ku nga hlayiwi swin’wetsin’wetsi swa xivumbeko xa n’weti+ ni swingwavila leswikulu swa le tindleveni ni tinguvu ta voya lebyi pendiweke byi va bya xivunguvungu+ ehenhla ka tihosi ta Midiyani, ku nga hlayiwi ni masindza ya le nhan’wini lawa a ma ri etinhan’wini ta tikamela.+ 27  Gidiyoni a swi endla swi va efodi,+ a swi endla nkombiso emutini wakwe wa Ofira;+ tiko hinkwaro ra Israyele ri sungula ku va ni rimbewu leri nga amukelekiki na yona kwalaho,+ lerova yi va ntlhamu eka Gidiyoni ni le ka vandyangu wakwe.+ 28  Midiyani+ u hluriwe hi ndlela yoleyo emahlweni ka vana va Israyele, a va ha tlhelanga va tlakusa nhloko ya vona; tiko a ra ha kavanyetekanga ku ringana malembe ya 40 emasikwini ya Gidiyoni.+ 29  Kutani Yerubali+ n’wana wa Yowasi a famba a ya tshama endlwini yakwe. 30  Gidiyoni a va ni vana+ va 70 lava humeke emasengeni yakwe, hikuva a a ri ni vasati vo tala. 31  Loko ku ri nsati wakwe lontsongo loyi a a ri eXikeme, na yena u n’wi tswalele n’wana. Kutani a n’wi thya vito ra Abimeleke.+ 32  Eku heteleleni Gidiyoni n’wana wa Yowasi a fa a dyuharile swinene, kutani a lahliwa exilahlweni xa Yowasi tata wakwe eOfira wa Vaabi-ezere.+ 33  Hi ku hatlisa loko Gidiyoni a file, vana va Israyele va tlhela va endla rimbewu leri nga amukelekiki na Vabali,+ lerova va veka Bali-beriti a va xikwembu xa vona.+ 34  Vana va Israyele a va n’wi tsundzukanga Yehovha Xikwembu xa vona,+ loyi a va kutsuleke evokweni ra valala va vona hinkwako-nkwako;+ 35  a va va kombanga musa wa rirhandzu+ vandyangu wa Yerubali, ku nga Gidiyoni, ku nkhensa vunene hinkwabyo lebyi a byi endleleke Israyele.+

Tinhlamuselo ta le hansi