Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Vaavanyisi 20:1-48

20  Kutani vana va Israyele hinkwavo va huma,+ ntshungu wu hlengeletana eka Yehovha eMizpa,+ kukota munhu un’we,+ ku sukela eDani+ ku ya fika eBera-xeba+ etlhelo ka tiko ra Giliyadi.+  Hiloko varhangeri va vanhu hinkwavo ni tinyimba hinkwato ta Israyele va yima enhlengeletanweni ya vanhu va Xikwembu xa ntiyiso,+ vavanuna va 400 000 lava va fambaka hi milenge lava tamelaka banga.+  Vana va Benjamini va twa leswaku vana va Israyele va tlhandlukele eMizpa.+ Kutani vana va Israyele va ku: “Vulavulani. Xana nchumu lowu wo biha wu endliwe njhani?”+  Hiloko wanuna loyi, wa Mulevhi,+ nuna wa wansati la dlayiweke hi vomu, a ku: “A ku ri eGibiya,+ wa Benjamini, lowu ndzi fikeke eka wona, mina ni nsati wa mina lontsongo,+ leswaku hi etlela kona.  Kutani vini va tindhawu ta le Gibiya va ndzi pfukela, va rhendzela yindlu ku lwa na mina nivusiku. A va lava ku dlaya mina, kambe va pfinye+ nsati wa mina lontsongo, hakatsongo-tsongo a fa.+  Kutani ndzi khoma nsati wa mina lontsongo ndzi n’wi tsemelela, ndzi n’wi rhumela ensin’wini yin’wana ni yin’wana ya ndzhaka ya Israyele,+ hikuva va endle ku tikhoma ko biha+ ni vuphukuphuku lebyi nyumisaka eIsrayele.+  Waswivo! N’wina vana va Israyele hinkwenu, vulani rito ra n’wina ni xitsundzuxo+ laha.”  Kutani vanhu hinkwavo va yima kukota munhu un’we,+ va ku: “Un’wana ni un’wana wa hina a nge yi entsongeni wakwe, hambi ku ri ku hambukela endlwini yakwe.+  Sweswi hi lowu nchumu lowu hi nga ta wu endla eGibiya. [A hi tlhandlukeni] hi vuhlolotwana+ ku lwa na wona. 10  Hi fanele hi teka vavanuna va khume eka vavanuna va 100 etinyimbeni hinkwato ta Israyele, ni vavanuna va 100 eka va 1 000, ni vavanuna va 1 000 eka va 10 000, leswaku hi kuma swakudya swa vanhu, leswaku va endla swo karhi ku lwa na Gibiya wa Benjamini, hikwalaho ka vuphukuphuku+ hinkwabyo lebyi nyumisaka lebyi va byi endleke eIsrayele.” 11  Kutani vavanuna hinkwavo va Israyele a va hlengeletane ku lwa ni muti va ri munhu un’we, va tirhisana. 12  Hikwalaho tinyimba ta Israyele ti rhumela vanhu eka vavanuna va tinyimba hinkwato ta Benjamini,+ va ku: “Xana i yini nchumu lowu wo biha lowu endliweke exikarhi ka n’wina?+ 13  Sweswi nyiketani vavanuna volavo,+ vavanuna lava nga pfuniki nchumu,+ lava nga eGibiya,+ leswaku hi va dlaya,+ a hi suseni hinkwaswo swo biha eIsrayele.”+ Vana va Benjamini a va swi lavanga ku yingisa rito ra vamakwavo, vana va Israyele.”+ 14  Kutani vana va Benjamini va hlengeletana va huma emitini ya Gibiya, leswaku va huma va ya lwa ni vana va Israyele. 15  Hiloko vana va Benjamini va hlengeletana esikwini rero emitini, vavanuna va 26 000 lava tamelaka banga,+ ku nga hlayiwi vaaki va Gibiya, lava ku hlawuriweke vavanuna va 700 eka vona. 16  Evanhwini lava hinkwavo, a ku ri ni vavanuna va 700 lava va hlawuriweke lava va tirhisaka ximatsi.+ Un’wana ni un’wana wa lava a a ri muhoxi wa maribye hi xipelupelu,+ a a nga hupi hambi ku ri mpimo wa nsisi. 17  Vavanuna va Israyele va hlengeletanile, va ri vavanuna va 400 000 lava tamelaka banga,+ ku nga hlayiwi nyimba ya Benjamini. Un’wana ni un’wana wa lava a a ri wanuna wa nyimpi. 18  Va suka va tlhandluka va ya eBethele va ya vutisisa Xikwembu.+ Kutani vana va Israyele va ku: “I mani eka hina la faneleke a tlhandluka a rhangela enyimpini yo lwa ni vana va Benjamini?”+ Yehovha a ku: “Yuda a a rhangele.”+ 19  Endzhaku ka sweswo va-na va Israyele va pfuka nimixo va ya dzima mixaxa ku lwa na Gibiya. 20  Vavanuna va Israyele va huma ku ya lwa na Benjamini; vavanuna va Israyele va lunghekela nyimpi ku lwa na vona eGibiya. 21  Kutani vana va Benjamini va huma eGibiya,+ va lovisa vavanuna va 22 000 va Israyele esikwini rero.+ 22  Hambiswiritano, vanhu, ku nga vavanuna va Israyele, va tikomba va ri ni xivindzi, va tlhela va lunghekela nyimpi endhawini leyi a va hlome eka yona esikwini ro sungula. 23  Hiloko vana va Israyele va tlhandluka, va rila+ emahlweni ka Yehovha ku fikela nimadyambu, va vutisa Yehovha, va ku: “Xana ndzi fanele ndzi tlhela ndzi ya lwa ni vana va Benjamini makwerhu?”+ Yehovha a ku: “Tlhandluka u ya lwa na yena.” 24  Kutani vana va Israyele va tshinelela vana va Benjamini esikwini ra vumbirhi.+ 25  Benjamini na yena a huma eGibiya ku ta hlangana na vona esikwini ra vumbirhi, va tlhela va lovisa vavanuna va 18 000 exikarhi ka vana va Israyele,+ hinkwavo ka vona lava va tamelaka banga.+ 26  Hikwalaho ka sweswo vana va Israyele hinkwavo,+ ni vanhu hinkwavo va tlhandluka va ya eBethele, va rila,+ va tshama emahlweni ka Yehovha, va titsona+ swakudya esikwini rero ku fikela nimadyambu, va nyikela magandzelo yo hisiwa+ ni magandzelo ya xinakulobye+ emahlweni ka Yehovha. 27  Endzhaku ka sweswo vana va Israyele va vutisa Yehovha,+ tanihi leswi a ku ri ni areka ya ntwanano+ wa Xikwembu xa ntiyiso emasikwini wolawo. 28  Kutani Finiyasi,+ n’wana wa Eliyazara, n’wana wa Aroni a a yime emahlweni ka yona emasikwini wolawo,+ a ku: “Xana ndzi fanele ndzi huma nakambe ndzi ya lwa ni vana va Benjamini makwerhu kumbe ndzi tshika?”+ Yehovha a ku: “Tlhandluka, hikuva mundzuku ndzi ta n’wi nyiketa evokweni ra wena.”+ 29  Hiloko Israyele a veka vavanuna va tumbelela+ Gibiya matlhelo hinkwawo. 30  Vana va Israyele va tlhandluka ku ya lwa ni vana va Benjamini esikwini ra vunharhu, va fola va hlomile ku lwa na Gibiya, ku fana ni le minkarhini leyin’wana.+ 31  Loko vana va Benjamini va huma ku ya hlangana ni vanhu lava, va kokiwe va huma emutini.+ Kutani, ku fana ni le minkarhini leyin’wana, va sungula ku dlayetela vanhu lava vavisekeke ngopfu emagondzweni lamakulu, rin’wana ra wona ri tlhandlukelaka eBethele+ rin’wana eGibiya,+ ensin’wini, kwalomu ka vavanuna va 30 va Israyele.+ 32  Hiloko vana va Benjamini va sungula ku vula va ku: “Ha va hlula ku fana ni le ku sunguleni.”+ Loko ku ri vana va Israyele, va ku: “A hi balekeni,+ kunene hi ta va koka va huma emutini va ta emagondzweni lamakulu.” 33  Kutani vavanuna hinkwavo va Israyele va huma etindhawini ta vona, va lunghekela nyimpi eBali-tamara, loko vavanuna va Israyele lava a va tumbelerile+ va huma etindhawini ta vona va hlasela tindhawu ta le kusuhi na Gibiya.+ 34  Kutani vavanuna va 10 000 lava hlawuriweke etikweni hinkwaro ra Israyele va fika emahlweni ka Gibiya, nyimpi a yi hisa; va ka Benjamini a va nga swi tivi leswaku khombo+ ri le kusuhi ni ku va wela. 35  Yehovha a hlula Benjamini+ emahlweni ka Israyele, lerova vana va Israyele esikwini rero va lovisa eka Benjamini vavanuna va 25 100, hinkwavo lava tamelaka banga.+ 36  Hambiswiritano, vana va Benjamini a va ehleketa leswaku vavanuna va Israyele va ta hluriwa loko va ya emahlweni va baleka+ Benjamini, hikuva a va tshembe lava a va va vekile va tumbelela Gibiya. 37  Loko ku ri lava va tumbeleleke, va endla hi ku hatlisa, va tsutsuma va nghena eGibiya.+ Kutani lava tumbeleleke+ va hangalaka ni ku hlasela muti hinkwawo hi banga.+ 38  Vavanuna va Israyele a va twanane ni lava va tumbeleleke leswaku va va endlela xikombiso hi musi lowu tlhandlukaka emutini.+ 39  Loko vana va Israyele va hundzuluka enyimpini, Benjamini a sungula ku dlaya vavanuna va 30 lava va vavisekeke ngopfu exikarhi ka Israyele,+ hikuva a va ku: “Swi le rivaleni leswaku ha va hlula ku fana ni le nyimpini yo sungula.”+ 40  Kutani xikombiso+ xi sungula ku tlhandluka emutini xi ri musi lowukulu.+ Loko Benjamini a hundzuluxela xikandza xakwe endzhaku, waswivo, muti hinkwawo a wu tlhandlukela etilweni.+ 41  Kavaloko vavanuna va Israyele va hundzuluka,+ vavanuna va Benjamini a va karhatekile,+ hikuva a va swi vona leswaku khombo ri va fikerile.+ 42  Hiloko va hundzuluka emahlweni ka vana va Israyele va ya etlhelo ra le mananga, nyimpi yi va landzelela ekusuhi, loko vavanuna lava a va huma emutini va ri karhi va va lovisa exikarhi ka vona. 43  Va rhendzela Benjamini.+ Va n’wi hlongorisa a pfumala ndhawu yo wisela eka yona.+ Va n’wi kandziyela hi ku kongoma emahlweni ka Gibiya+ ku ya evuhuma-dyambu. 44  Eku heteleleni ku wa vavanuna va 18 000 va Benjamini, hinkwavo ka vona va ri vavanuna va vurhena.+ 45  Xisweswo va hundzuluka va balekela emananga eribyeni ra Rimoni.+ Va kukula vavanuna va 5 000 emagondzweni lamakulu,+ va va landzelela ekusuhi ku ya fika eGidomo, kutani va dlaya vavanuna va 2 000 lava engetelekeke eka vona. 46  Emakumu vavanuna hinkwavo va Benjamini lava weke esikwini rero a va ri vavanuna va 25 000 lava tamelaka banga,+ hinkwavo ka vona ku ri vavanuna va vurhena. 47  Kambe vavanuna va 600 va hundzuluka va balekela emananga eribyeni ra Rimoni, va hambeta va tshama eribyeni ra Rimoni+ tin’hweti ta mune. 48  Vavanuna va Israyele va vuya eku lweni ni vana va Benjamini, va ya emahlweni va dlaya lava a va ri emutini hi banga, ku sukela eka vanhu ku ya eka xifuwo, ni hinkwaswo leswi kumekeke.+ Nakambe, miti hinkwayo leyi kumekeke va yi hise hi ndzilo.+

Tinhlamuselo ta le hansi