Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Vaavanyisi 18:1-31

18  Emasikwini wolawo a ku nga ri na hosi eIsrayele.+ Naswona emasikwini wolawo nyimba ya va ka Dani+ a yi lava ndzhaka leswaku yi tshama kwalaho; hikuva ku fikela esikwini rero ndzhaka a yi nga welanga eka vona exikarhi ka tinyimba ta Israyele.+  Eku heteleleni vana va Dani va rhumela vanhu va ntlhanu vandyangu wa vona, vavanuna lava a va ri exikarhi ka vona, vavanuna lava a va ri ni vurhena, va huma eSora+ na Exitawoli,+ leswaku va ya kambela+ tiko ni ku ri valanga. Kutani va ku eka vona: “Fambani mi ya valanga tiko.” Hi ku famba ka nkarhi va fika endhawini ya tintshava ya Efrayimi+ ekusuhi ni yindlu ya Mikiya,+ va etlela kona.  Loko va ri ekusuhi ni yindlu ya Mikiya, va tiva rito ra jaha ra Mulevhi, kutani va hambukela kona. Va ku eka rona: “I mani la ku tiseke laha, naswona u endla yini endhawini leyi, u vuyeriwa ha yini laha?”  Rona ri ku eka vona: “Mikiya u ndzi endlele swo karhi ni swo karhi leswaku a ndzi thola,+ nileswaku ndzi va muprista+ wakwe.”  Kutani va ku eka yena: “Hi kombela u vutisa+ Xikwembu+ leswaku hi tiva loko ndlela leyi hi yi fambaka yi ta humelela.”  Kutani muprista a ku eka vona: “Fambani hi ku rhula. Ndlela ya n’wina leyi mi fambaka ha yona yi le mahlweni ka Yehovha.”  Hiloko vavanuna lava va ntlhanu va famba va ya fika eLayixi,+ va vona ndlela leyi vanhu lava a va ri eka wona a va tshama ha yona hi ku titshemba hi ku ya hi ntolovelo wa Vasidoni, va rhulile va nga vileli ha nchumu,+ naswona a ku nga ri na muhluri wa tihanyi loyi a karhataka nchumu hambi wu ri wihi etikweni, va ri ekule swinene ni Vasidoni,+ va nga ri na mhaka ni vanhu.  Va hetelele va fike eka vamakwavo eSora+ ni le Exitawoli,+ vamakwavo va sungula ku va byela va ku: “Xana a swi mi fambela njhani?”  Hiloko va ku: “Pfukani, a hi tlhandlukeni ku ya lwa na vona; hikuva hi vone tiko, maswivo, i rinene ngopfu.+ Naswona ma kanakana. Mi nga hlweli ku ta mi ta teka tiko.+ 10  Loko mi nghena, mi ta fika eka vanhu lava va nga vileriki ha nchumu,+ naswona tiko ri aname ngopfu; hikuva Xikwembu xi ri nyikele evokweni ra n’wina,+ ndhawu leyi muxaka wihi ni wihi wa xilo lexi nga emisaveni wu nga pfumalekiki eka yona.”+ 11  Kutani vavanuna va 600 va khama matlhari ya nyimpi, va huma endyangwini wa va ka Dani,+ va suka kwalaho, hileswaku, ku suka eSora ni le Exitawoli.+ 12  Va khoma ndlela va tlhandluka va ya dzima mixaxa le Kiriyati-yeyarimi+ eYuda. Hi yona mhaka leyi va vitaneke ndhawu yoleyo Mahane-dani+ ku ta fika esikwini leri. Waswivo! Yi le vupela-dyambu bya Kiriyati-yeyarimi. 13  Endzhaku ka sweswo va hundza ku suka endhawini ya tintshava ya Efrayimi va ya fika endlwini ya Mikiya.+ 14  Hiloko vavanuna va ntlhanu lava fambeke va ya kambela+ tiko ra Layixi+ va angula vamakwavo va ku: “Xana ma swi tiva leswaku etindlwini leti ku ni efodi ni terafimi+ ni xifaniso lexi vatliweke+ ni xifaniso lexi n’okisiweke?+ Sweswi anakanyani leswi mi nga ta swi endla.”+ 15  Kutani va hambuka kwalaho va ya endlwini ya jaha, leri nga Mulevhi,+ endlwini ya Mikiya, va sungula ku ri rungurisa ta vutomi.+ 16  Hi nkarhi wolowo hinkwawo, vavanuna va 600, va khame matlhari ya vona ya nyimpi,+ lava a va ri vana va Dani,+ a va yime enyangweni ya vungheno. 17  Vavanuna va ntlhanu lava fambeke va ya kambela tiko,+ va tlhandluka sweswi, leswaku va nghena va teka xifaniso lexi vatliweke+ ni efodi+ ni terafimi+ ni xifaniso lexi endliweke hi ku n’okisiwa.+ (Muprista+ a a yime enyangweni ya vungheno a ri ni vavanuna va 600 va tikhame hi matlhari ya nyimpi.) 18  Vona va nghena endlwini ya Mikiya va teka xifaniso lexi vatliweke, efodi ni terafimi ni xifaniso lexi endliweke hi ku n’okisiwa.+ Hiloko muprista+ a ku eka vona: “Xana mi endla yini?” 19  Kambe va ku eka yena: “Miyela. Pfala nomu wa wena, u famba na hina u va tata+ wa hina ni muprista+ wa hina. Xana ku antswa yini, leswaku u hambeta u va muprista endlwini ya munhu un’we+ kumbe leswaku u va muprista eka nyimba ni ndyangu wa Israyele?”+ 20  Hiloko mbilu ya muprista yi tsaka,+ kutani a teka efodi ni terafimi ni xifaniso+ lexi vatliweke a ta exikarhi ka tiko. 21  Kutani va hundzuluka va famba, va veka vana va vona ni swifuwo ni swilo swa nkoka emahlweni ka vona.+ 22  Vona a va ri ekule ni yindlu ya Mikiya loko vanhu lava a va ri etindlwini leti nga ekusuhi ni yindlu ya Mikiya+ va hlengeletana, va ringeta ku ya kuma vana va Dani. 23  Loko va hambeta va huwelela eka vana va Dani, kutani va hundzuluxa swikandza swa vona va ku eka Mikiya: “Swo yini leswi mi+ hlengeletaneke?” 24  Yena a ku: “Mi teke swikwembu+ swa mina leswi ndzi swi endleke,+ ni muprista,+ mi famba, xana ndza ha ri na yini xin’wana?+ Xana mi nga vurisa ku yini eka mina mi ku, ‘Swo yini ha wena?’” 25  Hiloko vana va Dani va ku eka yena: “U nga tshuki u endla leswaku rito ra wena ri twakala ekusuhi na hina, hi ku chava leswaku vanhu lava moya-xiviri+ wa vona wu vavisekeke va nga mi hlasela, mi lahlekeriwa hi moya-xiviri wa n’wina ni moya-xiviri wa vandyangu wa n’wina.” 26  Vana va Dani va hambeta va famba; Mikiya a vona leswaku a va ri ni matimba ku n’wi tlula,+ hiloko a hundzuluka a tlhelela endlwini yakwe. 27  Loko ku ri vona, va teke leswi Mikiya a swi endleke ni muprista+ loyi a a ri wa yena, va ya emahlweni eLayixi,+ ku ya lwa ni vanhu vo rhula lava nga vileriki ha nchumu.+ Va va hlasela hi banga,+ muti va wu hisa hi ndzilo.+ 28  A ku nga ri na mukutsuri, hikuva a ku ri ekule swinene na Sidoni,+ naswona a va nga ri na mhaka nikatsongo ni vanhu; a ku ri erivaleni ra le hansi ra Beta-rehobo.+ Hiloko va aka muti va tshama eka wona.+ 29  Ku tlula kwalaho, vito ra muti va ri thya Dani, ku nga vito ra tata wa vona Dani,+ loyi a velekeriweke eIsrayele.+ Kambe, eku sunguleni vito ra muti a ku ri Layixi.+ 30  Endzhaku ka sweswo vana va Dani va tiyimisela xifaniso+ lexi vatliweke; kutani Yonathani+ n’wana wa Gerixomu,+ n’wana wa Muxe, yena ni vana vakwe va va vaprista enyimbeni ya va ka Dani ku fikela esikwini leri tiko ri yisiweke evukhumbini ha rona.+ 31  Va hlayisa xifaniso lexi vatliweke xa Mikiya, lexi a xi endleke, xi va xa vona emasikwini hinkwawo lawa yindlu+ ya Xikwembu xa ntiyiso a yi ri eXilo ha wona.+

Tinhlamuselo ta le hansi