Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Vaavanyisi 15:1-20

15  Endzhakunyana ka nkarhi, emasikwini yo tshovela koroni, Samsoni a endzela nsati wakwe a ri ni ximbutana.+ Kutani a ku: “Ndzi ta ya eka nsati wa mina ekamareni ra le mpfungwe.”+ Tata wakwe a nga n’wi pfumelelanga leswaku a nghena.  Kambe tata wakwe u te: “Kunene ndzi tibyele ndzi ku, ‘Handle ko kanakana u fanele u n’wi venga.’+ Waswivo, ndzi n’wi nyikete nxangwana ya wena.+ Xana makwavo wa xisati lontsongo a nga antswi ku n’wi tlula? Ndzi kombela leswaku yena a va wa wena, ematshan’weni ya loyi un’wana.”  Hambiswiritano, Samsoni a ku eka vona: “Sweswi a ndzi fanelanga ndzi va ni nandzu eka Vafilisita loko ndzo tshuka ndzi va endla hi ndlela yo biha.”+  Kutani Samsoni a tifambela, a khoma tinhlati ta 300,+ a teka swisana a hundzula mincila ya tona yi langutana, kutani a veka xisana xin’we exikarhi ka mincila yimbirhi, kwala xikarhi ka yona.  Hiloko a lumeka ndzilo eswisaneni, a ti rhumela emasin’wini ya mavele ya Vafilisita. Xisweswo a hisa hinkwaswo ku sukela enyandzeni ya mavele ku katsa ni mavele lama ha yimeke, ni mirhi ya vhinya ni mirhi ya mitlhwari.+  Vafilisita va ku: “I mani la endleke leswi?” Kutani va ku: “I Samsoni mukon’wana wa Mutimna, hikuva u teke nsati wakwe a n’wi nyika nxangwana ya yena.”+ Hiloko Vafilisita va tlhandluka va ya n’wi hisa hi ndzilo yena ni tata wakwe.+  Kutani Samsoni a va byela a ku: “Loko mi endlisa xileswi, a ku na nchumu wun’wana lowu ndzi faneleke ndzi wu endla loko ku nga ri ku tirihisela eka n’wina,+ endzhaku ka sweswo ndzi ta tshika.”  Hiloko a va ba, a fumba milenge ehenhla ka mindzhumbi hi ku dlaya vanhu vo tala, endzhaku ka sweswo a rhelela a ya tshama ebakweni ra ribye ra Etamu.+  Endzhaku ka sweswo Vafilisita+ va fika va dzima mixaxa etikweni ra Yuda,+ va rhendzeleka etikweni ra Lehi.+ 10  Kutani vanhu va Yuda va ku: “Ha yini mi ta eka hi-na?” vona va ku: “Hi tele ku ta tsimba Samsoni, hi n’wi endla leswi a hi endleke swona.” 11  Hiloko vavanuna va Yuda va 3 000 va rhelela va ya ebakweni ra ribye ra Etamu,+ va ku eka Samsoni: “Xana a wu swi tivi leswaku Vafilisita va hi fuma?+ Xana swi vula yini leswi u swi endleke eka hina?” Kutani a ku eka vona: “Hilaha va endleke hakona eka mina, ndzi endle hakona eka vona.”+ 12  Kambe va ku eka yena: “Hi tele ku ta ku tsimba, hi ku nyiketa evokweni ra Vafilisita.” Kutani Samsoni a ku eka vona: “Ndzi hlambanyeleni leswaku n’wina a mi nge ndzi hlaseli.” 13  Hiloko va ya emahlweni va ku eka yena: “E-e, kambe hi to ku tsimba ntsena, hi ku nyiketa evokweni ra vona; kambe a hi nge ku dlayi.” Kutani va n’wi boha hi mapindza mambirhi lamantshwa,+ va n’wi humesa eribyeni. 14  Loko ku ri yena, u fike etikweni ra Lehi, kasi loko ku ri Vafilisita, va be minkulungwana loko va hlangana na yena.+ Hiloko moya+ wa Yehovha wu sungula ku tirha eka yena, mapindza lawa a ma ri emavokweni yakwe, ma fana ni tingoti ta ntsembyana leti vavuriweke hi ndzilo,+ lerova tinsimbi takwe ti n’oka emavokweni yakwe. 15  Kutani a kuma rihlaya ro tsakama ra mbhongolo ya xinuna, a tshambuluta voko a ri teka, a dlaya vanhu va 1 000 ha rona.+ 16  Hiloko Samsoni a ku: “Hi rihlaya ra mbhongolo ya xinuna—nhulu yin’we, tinhulu timbirhi! Hi rihlaya ra mbhongolo ya xinuna ndzi dlaye vavanuna va 1 000.”+ 17  Kuteloko a heta ku vulavula, xikan’we-kan’we a lahla rihlaya leri a ri ri evokweni rakwe, kutani a thya ndhawu yoleyo Ramati-lehi.+ 18  Kutani a khomiwa hi torha lerikulu, a sungula ku huwelela eka Yehovha a ku: “Hi wena la nyikeke nandza wa wena ku ponisa loku lokukulu,+ xana sweswi ndzi fanele ndzi fa hi torha, ndzi wela evokweni ra lava va nga yimbangiki?”+ 19  Hiloko Xikwembu xi pfula khele leri fanaka ni tshuri leri a ri ri eLehi, mati+ ma sungula ku huma eka rona, a nwa, endzhaku ka sweswo moya+ wakwe wu vuya, a hanyanya.+ Hi yona mhaka leyi a thyeke ndhawu yoleyo vito ra Eni-hakore, leyi nga eLehi ku fikela esikwini leri. 20  A ya emahlweni a avanyisa Israyele emasikwini ya Vafilisita ku ringana malembe ya 20.+

Tinhlamuselo ta le hansi