Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Vaavanyisi 12:1-15

12  Kutani vana va Efrayimi a va hlengeletanile va pelela etlhelo ra n’walungu ivi va ku eka Yefta: “Ha yini u pelele ku ya lwa ni vana va Amone, kambe hina u nga hi rhambi leswaku hi famba na wena?+ Yindlu ya wena hi ta yi hisa hi ndzilo.”+  Kambe Yefta a ku eka vona: “Ndzi ve mulwi lonkulu, mina ni vanhu va mina, hi lwa ni vana va Amone.+ Ndzi kombele leswaku mi ndzi pfuna, kambe a mi ndzi ponisanga evokweni ra vona.  Loko ndzi vona leswaku a mi nga ri muponisi, kutani ndzi tiyimisela ku veka moya-xiviri wa mina exandleni+ xa mina, ndzi famba ku ya lwa ni vana va Amone.+ Hiloko Yehovha a va nyiketa evokweni ra mina. Kutani, ha yini mi ndzi pfukela esikwini leri ku lwa na mina?”  Hi ku hatlisa Yefta a hlengeleta vavanuna hinkwavo va Giliyadi,+ a lwa na Efrayimi; vavanuna va Giliyadi va dlaya Efrayimi, hikuva va te: “N’wina vanhu va Giliyadi, mi balekile emahlweni ka Efrayimi, endzeni ka Efrayimi, endzeni ka Manase.”  Kutani Giliyadi a teka mahlaluko ya Yordani+ emahlweni ka va ka Efrayimi; loko vavanuna va ka Efrayimi lava va balekaka va ku: “Ndzi kombela ku tsemakanya,” kutani vavanuna va Giliyadi va va vutisa va ku: “Xana u wa ka Efrayimi?” Loko a ku: “E-e,”  kutani a va ku eka yena: “Hi kombela u ku Xiboleti.”+ Yena a ku: “Siboleti,” tanihi leswi a a nga swi koti ku ri vula kahle rito leri. Xisweswo a va n’wi khoma, va n’wi dlayela emahlalukweni ya Yordani. Kutani ku wa vanhu va 42 000 va Efrayimi.+  Yefta a ya emahlweni a avanyisa Israyele malembe ya tsevu, endzhaku ka sweswo Yefta lowa Mugiliyadi a fa, a lahliwa emutini wakwe eGiliyadi.  Kutani Ibizani la humaka eBetlehema+ a sungula ku avanyisa Israyele endzhaku kakwe.+  Hiloko a va ni vana va majaha va 30 ni va vanhwanyana va 30. A rhumela rito ehandle, kutani vana vakwe va majaha va tiseriwa vanhwanyana va 30 ehandle. A ya emahlweni a avanyisa Israyele malembe ya nkombo. 10  Kutani Ibizani a fa, a lahliwa eBetlehema. 11  Endzhaku kakwe, Elone wa le Zebuloni+ a sungula ku avanyisa Israyele. A ya emahlweni a avanyisa Israyele malembe ya khume. 12  Kutani Elone lowa le Zebuloni a fa, a lahliwa le Ayaloni etikweni ra Zebuloni. 13  Endzhaku kakwe Abidoni n’wana wa Hilele lowa Mupiratoni+ a sungula ku avanyisa Israyele. 14  A va ni vana va majaha va 40 ni vatukulu va majaha va 30, lava a va gada timbhongolo letikulu ta 70.+ A ya emahlweni a avanyisa Israyele malembe ya nhungu. 15  Kutani Abidoni n’wana wa Hilele lowa Mupiratoni a fa, a lahliwa le Piratoni etikweni ra Efrayimi entshaveni ya Vaamaleke.+

Tinhlamuselo ta le hansi