Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Tinhlayo 6:1-27

6  Yehovha a ya emahlweni a vulavula na Muxe a ku:  “Byela vana va Israyele u ku eka vona, ‘Loko wanuna kumbe wansati o tshuka a endla xitshembiso lexi hlambanyiweke xo hlawuleka leswaku a va Munaziri+ eka Yehovha,  u ta papalata vhinyo ni xakunwa lexi pyopyaka. A nga tshuki a nwa ntsuvi wa vhinyo kumbe ntsuvi wa swakunwa+ leswi pyopyaka, kumbe a nwa mati wahi ni wahi lama humaka eka madiriva, kumbe a dya madiriva, lama tsakamaka kumbe lama omeke.  Masiku hinkwawo ya Vunaziri byakwe a nga tshuki a dya nchumu wihi ni wihi lowu endliweke wu huma eka murhi wa vhinya, ku suka eka madiriva lama nga wupfangiki ku ya eka makamba ya kona.  “‘Rikari ri nga tshuki ri byewula nhloko+ yakwe emasikwini hinkwawo ya xitshembiso lexi hlambanyiweke xa Vunaziri byakwe; kukondza ma hela masiku lawa a hlawuleriweke Yehovha ha wona, u ta tikombisa a kwetsima hi ku tshika miluko+ ya misisi ya nhloko yakwe yi kula.  A nge tshineleli moya-xiviri+ wihi ni wihi lowu feke emasikwini hinkwawo ya ku tshama a hlawuleriwe Yehovha.  Hambi wu ri wa tata wakwe kumbe wa mana wakwe kumbe wa makwavo wa xinuna kumbe wa makwavo wa xisati, a nge tinyamisi ha wona loko wu fa,+ hikuva mfungho wa Vunaziri byakwe eka Xikwembu xakwe wu le nhlokweni yakwe.  “‘Emasikwini hinkwawo ya Vunaziri byakwe wa kwetsima eka Yehovha.  Kambe loko munhu un’wana ni un’wana loyi a faka o tshuka a fa hi xitshuketa etlhelo ka yena+ lerova a nyamisa nhloko ya Vunaziri byakwe, u fanele a byewula+ nhloko yakwe esikwini rero ra ku tiyisekisa ku tenga kakwe. U ta byewula hi siku ra vunkombo. 10  Kutani hi siku ra vunhungu u ta tisa magugurhwana mambirhi kumbe swituvana swimbirhi eka muprista enyangweni ya ntsonga wa nhlangano.+ 11  Muprista u ta teka rin’we ri va gandzelo ra xidyoho+ ivi lerin’wana ri va gandzelo ro hisiwa+ kutani a n’wi kombelela ku rivaleriwa, hikuva u dyohile hikwalaho ka moya-xiviri lowu feke. Kutani u fanele a hlawulekisa nhloko esikwini rero. 12  U fanele a hanya a ri Munaziri+ wa Yehovha hi masiku ya Vunaziri byakwe, naswona u fanele a tisa khuna leritsongo leri nga elembeni ra rona ro sungula ri va gandzelo ra nandzu;+ kutani masiku lama hundzeke ma ta hundza ma nga ha tsundzukiwi hikuva u nyamisile Vunaziri byakwe. 13  “‘Kutani lowu i nawu malunghana ni Munaziri: Esikwini leri masiku yakwe ya Vunaziri ma nga ta hela+ ha rona, u ta tisiwa enyangweni ya ntsonga wa nhlangano. 14  Kutani u fanele a nyikela Yehovha gandzelo, ku nga khuna leritsongo leri hanyeke kahle leri nga elembeni ra rona ro sungula, ri va gandzelo ro hisiwa+ ni xinyimpfana xa ntswele lexi hanyeke kahle lexi nga elembeni ra xona ro sungula, xi va gandzelo ra xidyoho+ ni khuna leri hanyeke kahle ri va xitlhavelo xa xinakulobye+ 15  ni xirhundzu xa swinkwa leswo-ke-comela leswi vumbekeke ku fana ni swingwavila swa mapa+ lamanene, leswi tsakamisiweke hi mafurha+ ni swiphampha leswo-ke-comela, leswi totiweke mafurha+ ni gandzelo ra swona ra mavele+ ni magandzelo ya swona ya swakunwa.+ 16  Muprista u fanele a swi nyikela emahlweni ka Yehovha, a n’wi endlela gandzelo rakwe ra xidyoho ni gandzelo+ rakwe ro hisiwa. 17  U ta endla khuna ri va xitlhavelo+ xa xinakulobye eka Yehovha swin’we ni xirhundzu xa swinkwa leswo-ke-comela; kutani muprista u fanele a endla gandzelo ra swona ra mavele+ ni gandzelo ra swona ra swakunwa. 18  “‘Munaziri u fanele a byewula+ nhloko ya Vunaziri byakwe enyangweni ya ntsonga wa nhlangano, kutani yena u fanele a teka misisi ya nhloko ya Vunaziri byakwe a yi veka endzilweni lowu nga ehansi ka xitlhavelo xa xinakulobye. 19  Kutani muprista u fanele a teka katla leri swekiweke+ ra khuna ni xinkwa xin’we lexo-ke-comela lexi vumbekeke ku fana ni xingwavila, xi huma exirhundzwini ni xiphampha xin’we lexo-ke-comela,+ a swi veka eswandleni swa Munaziri endzhaku ka ku va a byewule mfungho wa Vunaziri byakwe. 20  Kutani muprista u fanele a swi ndziwita swi va gandzelo leri ndziwitiwaka emahlweni ka Yehovha.+ I nchumu wo kwetsima eka muprista swin’we ni xifuva+ xa gandzelo leri ndziwitiwaka ni nenge wa munyikelo.+ Endzhaku ka sweswo Munaziri a nga nwa vhinyo.+ 21  “‘Nawu lowu i wa Munaziri+ loyi a endlaka xitshembiso xakwe lexi hlambanyiweke—xi va gandzelo eka Yehovha eVunazirini byakwe, handle ka leswi a nga swi kotaka. Hi ku ya hi xitshembiso xakwe lexi hlambanyiweke lexi a nga xi endlaka, u ta endla tano, hikuva i nawu wa Vunaziri byakwe.’” 22  Kutani Yehovha a vulavula na Muxe a ku: 23  “Byela Aroni ni vana vakwe u ku, ‘Mi ta katekisa+ vana va Israyele mi ku eka vona: 24  “Onge Yehovha a nga mi katekisa+ a mi hlayisa.+ 25  Onge Yehovha a nga voningisa xikandza xakwe eka n’wina,+ a mi komba tintswalo.+ 26  Onge Yehovha a nga tlakusela xikandza xakwe eka n’wina+ a mi nyika ku rhula.”’+ 27  Va fanele va veka vito+ ra mina ehenhla ka vana va Israyele leswaku mina ndzi va katekisa.”+

Tinhlamuselo ta le hansi