Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Tinhlayo 5:1-31

5  Yehovha a ya emahlweni a vulavula na Muxe a ku:  “Lerisa vana va Israyele leswaku va n’wi humesela ehandle ka nxaxa munhu+ un’wana ni un’wana la vabyaka hi nhlokonho ni un’wana ni un’wana la nga ni ndzhundzhwana+ ni un’wana ni un’wana la nyameke hikwalaho ka moya-xiviri+ lowu feke.  Mi ta va humesela ehandle ku nga khathariseki leswaku i waxinuna kumbe i waxisati. Mi ta va humesela ehandle ka nxaxa+ leswaku va nga thyakisi+ mixaxa ya lava ndzi tshamaka+ exikarhi ka vona.”  Kutani vana va Israyele va endla tano, va va humesela ehandle ka nxaxa. Vana va Israyele va endla hilaha Yehovha a byeleke Muxe hakona.  Yehovha a ya emahlweni a vulavula na Muxe a ku:  “Byela vana va Israyele u ku, ‘Loko wanuna kumbe wansati, vo tshuka va endla xihi ni xihi xa swidyoho leswi endliwaka hi vanhu, va endla hi ku pfumala ku tshembeka eka Yehovha, moya-xiviri wolowo wu ni nandzu.+  Kutani va fanele va phofula+ xidyoho xa vona lexi va xi endleke, yena u fanele a tlherisa ntsengo wa ndziho wa nandzu wakwe wu helerile, naswona a wu engetela hi vuntlhanu bya wona,+ u fanele a wu nyika loyi a n’wi endleleke xihoxo.  Kambe loko loyi a n’wi endleleke xihoxo a nga ri na xaka leri ku nga tlheriseriwaka ntsengo wa ndziho wa nandzu eka rona, ntsengo wa ndziho wa nandzu lowu tlheriseriwaka eka Yehovha i wa muprista, handle ka khuna ra ku kombela ku rivaleriwa leri a nga ta n’wi kombelela ku rivaleriwa ha rona.+  “‘Kutani munyikelo+ hinkwawo wa swilo hinkwaswo swo kwetsima+ swa vana va Israyele, leswi va nga ta swi nyikela eka muprista swi ta va swa yena.+ 10  Swilo swo kwetsima swa un’wana ni un’wana swi ta tshama swi ri swakwe. Xin’wana ni xin’wana lexi mi nga xi nyikaka muprista xi ta va xa yena.’” 11  Yehovha a ya emahlweni a vulavula na Muxe a ku: 12  “Byela vana va Israyele, u ku eka vona, ‘Loko nsati wa wanuna wihi ni wihi a hambuka hi ku va a n’wi endle xo karhi hi ku pfumala ku tshembeka,+ 13  kunene wanuna un’wana a etlela na yena ivi ku huma mbewu+ ya vununa, swi fihliwile ematihlweni ya nuna+ wakwe naswona swi tshama swi nga tiviwi, kutani yena a tinyamisa kambe ku nga ri na mbhoni leyi n’wi kanetaka, naswona a nga khomiwanga; 14  kutani nuna wakwe a va ni moya wa vukwele,+ yena a sola ku tshembeka ka nsati wakwe, naswona entiyisweni yena a tinyamisile, kumbe a va ni moya wa vukwele, a sola ku tshembeka ka nsati wakwe, kambe entiyisweni yena a nga tinyamisanga; 15  wanuna u fanele a tisa nsati wakwe eka muprista+ naswona a tisa gandzelo ra yena swin’we na yena, vukhume bya mpimo wa efa wa mapa ya maxalana. A nga tshuki a chela mafurha ehenhla ka swona kumbe a veka murhi wa risuna+ ehenhla ka swona, hikuva i gandzelo ra mavele ra vukwele, i gandzelo ra mavele ra xitsundzuxo leri tsundzuxaka munhu xihoxo. 16  “‘Kutani muprista u fanele a n’wi tisa emahlweni a n’wi yimisa emahlweni ka Yehovha.+ 17  Muprista u fanele a ka mati yo kwetsima hi xibya xa vumba, kutani muprista u ta teka ritshuri rin’wana leri tshukaka ri va kona ehansi etabernakeleni, a ri chela ematini. 18  Kutani muprista u fanele a yimisa wansati emahlweni ka Yehovha, a ntshunxa misisi ya nhloko ya wansati, a veka gandzelo ra mavele ra xitsundzuxo eswandleni swakwe, hileswaku gandzelo ra mavele leri nga ra vukwele,+ evokweni ra muprista ku ta va ni mati yo bava lama tisaka ndzhukano.+ 19  “‘Kutani muprista u fanele a n’wi hlambanyisa, u ta byela wansati a ku: “Loko ku nga ri na wanuna la etleleke na wena, naswona loko u nga hambukelanga eka thyaka rihi ni rihi enkarhini lowu a wu ri ehansi ka nuna+ wa wena, u nga tshuki u weriwa hi khombo ra mati lawa yo bava lama tisaka ndzhukano. 20  Kambe loko wena u hambukile enkarhini lowu a wu ri ehansi ka nuna+ wa wena, u tinyamisile naswona wanuna un’wana a nghenise mbewu+ yakwe ya vununa eka wena, handle ka nuna wa wena,—” 21  Kutani muprista u fanele a hlambanyisa wansati hi xihlambanyo lexi rhukanaka,+ muprista u ta byela wansati a ku: “Onge Yehovha a nga endla leswaku u rhukaniwa ni ku va xihlambanyo exikarhi ka vanhu va ka n’wina hi ku va Yehovha a pfumelela leswaku masenge+ ya wena ma onhaka nileswaku khwiri ra wena ri pfimba. 22  Kutani mati lama tisaka ndzhukano ma fanele ma nghena emarhumbyini ya wena ma endla leswaku khwiri ra wena ri pfimba ni leswaku masenge ya wena ma onhaka.” Eka leswi, wansati u fanele a ku: “Amen! Amen!” 23  “‘Muprista u fanele a tsala ndzhukano lowu ebukwini+ naswona u fanele a wu sulela+ ematini yo bava. 24  Kutani u fanele a endla leswaku wansati a nwa mati yo bava lama tisaka ndzhukano,+ mati lama tisaka ndzukano ma ta nghena endzeni ka yena ma ri nchumu lowu bavaka. 25  Muprista u fanele a teka gandzelo ra mavele+ ri va ra vukwele evokweni ra wansati a ndziwita gandzelo ra mavele emahlweni ka Yehovha, kutani a ri tisa ekusuhi ni alitari. 26  Muprista u fanele a khoma rin’wana ra gandzelo ra mavele ri va xitsundzuxo+ xa rona, ivi a ri mbulukisa ealitarini, kutani endzhaku ka sweswo u ta endla leswaku wansati a nwa mati wolawo. 27  Loko a n’wi endle leswaku a nwa mati wolawo, kutaku loko a tinyamisile hi ku va a endle hi ku pfumala ku tshembeka eka nuna+ wakwe, mati lama tisaka ndzhukano ma ta nghena endzeni ka yena ma ri nchumu lowu bavaka, kutani khwiri ra yena ri ta pfimba, naswona masenge ya yena ma ta onhaka, wansati u ta va ndzhukano eka varikwavo.+ 28  Hambiswiritano, loko wansati a nga tinyamisanga kambe a basile, u ta pona ku xupuriwa+ koloko; u fanele a tikisiwa hi mbewu ya vununa. 29  “‘Lowu i nawu wa vukwele,+ laha wansati a nga hambukaka+ enkarhini lowu a nga ehansi ka nuna+ wakwe, kutani a tinyamisa, 30  kumbe malunghana ni wanuna loyi a nga vaka ni moya wa vukwele, ivi a ehleketelela nsati wakwe leswaku a nga tshembekanga; u fanele a yimisa nsati loyi emahlweni ka Yehovha, kutani muprista u fanela a hetisisa nawu lowu hinkwawo eka yena. 31  Kutani wanuna u ta pfumala nandzu, kambe wansati yoloye u ta hlamula hikwalaho ka xihoxo xakwe.’”

Tinhlamuselo ta le hansi