Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Tinhlayo 34:1-29

34  Yehovha a ya emahlweni a byela Muxe a ku:  “Lerisa vana va Israyele u ku eka vona, ‘Mi ya etikweni ra Kanana.+ Leri i tiko leri nga ta va ndzhaka ya n’wina,+ tiko ra Kanana hi ku landza mindzilakana ya rona.+  “‘Tlhelo ra n’wina ra le dzongeni ri fanele ri sukela emananga ya Zini etlhelo ka Edomu,+ kutani ndzilakana wa n’wina wa le dzongeni wu fanele wu sukela emakumu ka Lwandle+ ra Munyu evuxeni.  Ndzilakana wa n’wina wu fanele wu jika ku sukela edzongeni wa ntlhandluko wa Akrabimi+ wu pelela eZini, wu fanele wu helela edzongeni ra Kadexi-baniya;+ wu fanele wu ya eHasara-adara+ wu hundzela eAzimoni.  Ndzilakana wu fanele wu jika eAzimoni wu kongoma enkoveni wa Egipta,+ wu ta helela eLwandle.+  “‘Loko ku ri ndzilakana wa le vupela-dyambu,+ ku ta va Lwandle Lerikulu ni tiko leri lulamaka ni ribuwa eka n’wina. Wolowo wu ta va ndzilakana wa n’wina wa le vupela-dyambu.  “‘Kutani lowu ku ta va ndzilakana wa n’wina wa le n’walungwini: Mi ta wu fungha wu ri ndzilakana wa n’wina ku sukela eLwandle Lerikulu ku ya eNtshaveni ya Hore.+  Ku sukela eNtshaveni ya Hore mi ta fungha ndzilakana ku ya laha ku ngheniwaka ha ko-na eHamati,+ kutani ndzilakana wu ta helela eSedada.+  Ndzilakana wu fanele wu ya eZifironi, naswona wu fanele wu helela eHasara-enana.+ Lowu wu ta va ndzilakana wa n’wina wa le n’walungwini. 10  “‘Kutani mi fanele mi tifunghela ndzilakana wa n’wina wa le vuxeni wu sukela eHasara-enana wu ya eXefamu. 11  Ndzilakana lowu wu fanele wu rhelela ku suka eXefamu wu ya eRibla evuxeni bya Ayini, naswona ndzilakana lowu wu fanele wu rhelela wu ya hundza ehenhla ka rigiyagiya ra lwandle ra le vuxeni bya Kinereti.+ 12  Ndzilakana lowu wu fanele wu rhelela wu kongoma eYordani, naswona wu fanele wu helela eLwandle ra Munyu.+ Leri ri ta va tiko+ ra n’wina hi ku landza mindzilakana leyi yi mi rhendzeleke.’” 13  Hikwalaho Muxe a lerisa vana va Israyele a ku: “Leri i tiko leri mi nga ta tiavanyisela rona ri va ra n’wina hi vuhlolotwana,+ hilaha Yehovha a leriseke hakona ku ri nyika tinyimba ta kaye ni hafu ya nyimba.+ 14  Hikuva nyimba ya vana va ka Ruveni hi yindlu ya vatata wa vona ni nyimba ya vana va ka Gadi hi yindlu ya vatata wa vona ana se va teke ndzhaka ya vona, ni hafu ya nyimba ya Manase ana se yi teke ndzhaka ya yona.+ 15  Tinyimba leti timbirhi ni hafu ya nyimba ana se ti teke ndzhaka ya tona ku sukela exifundzheni xa Yordani ekusuhi na Yeriko etlhelo ra le vuxeni ku ya evuhuma-dyambu.”+ 16  Yehovha a ya emahlweni a byela Muxe a ku: 17  “Lawa i mavito ya vavanuna lava va nga ta mi avela tiko leswaku ri va rifuwo, i Eliyazara+ lowa muprista na Yoxuwa n’wana wa Nuni.+ 18  Mi ta teka ndhuna yin’we eka nyimba yin’wana ni yin’wana mi ava tiko, leswaku ri va rifuwo.+ 19  Mavito ya vavanuna lava, hi lawa: Eka nyimba ya Yuda,+ Kalebe n’wana wa Yefune;+ 20  eka nyimba ya vana va Simiyoni,+ Xemuwele n’wana wa Amihudi; 21  eka nyimba ya Benjamini,+ Elidada n’wana wa Kisiloni; 22  eka nyimba ya vana va Dani,+ ndhuna Buki, n’wana wa Yogili; 23  eka vana va Yosefa,+ eka nyimba ya vana va Manase,+ ndhuna Haniyele, n’wana wa Efodi; 24  eka nyimba ya vana va Efrayimi,+ ndhuna Kemuwele, n’wana wa Xifitani; 25  eka nyimba ya vana va Zebuloni,+ ndhuna Elizafani, n’wana wa Parinaka; 26  eka nyimba ya vana va Isakara,+ ndhuna Palatiyele, n’wana wa Azani; 27  eka nyimba ya vana va Axere,+ ndhuna Ahihudi, n’wana wa Xelomi; 28  eka nyimba ya vana va Neftali,+ ndhuna Padahele, n’wana wa Amihudi.” 29  Lava hi vona lava Yehovha a va leriseke leswaku va endla vana va Israyele va va vini va tiko ra Kanana.+

Tinhlamuselo ta le hansi