Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Tinhlayo 31:1-54

31  Hiloko Yehovha a byela Muxe a ku:  “Rihiselela+ vana va Israyele eka Vamidiyani.+ Endzhaku ka sweswo u ta lahliwa eka varikwenu.”+  Hikwalaho Muxe a byela vanhu a ku: “Hlomisani vavanuna exikarhi ka n’wina mi va hlomisela nyimpi, leswaku va lwa ni Vamidiyani va hetisisa ku rihisela ka Yehovha eka Vamidiyani.+  Eka nyimba yin’wana ni yin’wana ya tinyimba hinkwato ta Israyele mi ta rhuma 1 000 enyimpini.”  Hikwalaho eka magidi+ ya Israyele ku averiwe vanhu va 1 000 eka nyimba yin’wana ni yin’wana, vanhu va 12 000 a va hlomele nyimpi.+  Kutani Muxe a va rhuma, vanhu va 1 000 eka nyimba ha yin’we va ya enyimpini, vona na Finiyasi+ n’wana wa Eliyazara lowa muprista, va ya enyimpini, evokweni rakwe a a ri ni swingolongondzwana swo kwetsima ni timhalamhala+ ta ku yimba ha tona.  Kutani va lwa ni Vamidiyani hilaha Yehovha a leriseke Muxe hakona, va dlaya waxinuna un’wana ni un’wana.+  Va dlaya tihosi ta Midiyani swin’we ni van’wana lava va tlhaviweke, ku nga Evhi, Rekemu, Suru, Huru na Reba, tihosi ta ntlhanu ta Midiyani;+ naswona va dlaye Balama+ n’wana wa Beyori hi banga.  Kambe vana va Israyele va teka vavasati va Midiyani ni vana va vona va va endla makhumbi;+ kutani va phanga swifuwo swa vona hinkwaswo ni mintlhambi ya vona hinkwayo ni swilo swa vona hinkwaswo swo tihlayisa. 10  Va hisa hi ndzilo miti ya vona hinkwayo leyi a va tshama eka yona ni mixaxa ya vona hinkwayo leyi biyeleriweke.+ 11  Kutani va ya emahlweni va teka leswi phangiweke+ hinkwaswo ni rifuwo hinkwaro leri phangiweke ku nga vanhu ni swifuwo. 12  Va tisa lava va nga makhumbi ni rifuwo ni leswi phangiweke eka Muxe na Eliyazara lowa muprista ni le ka ntshungu wa vana va Israyele, enxaxeni, etimbaleni ta le kwandzasini ra Mowabu+ leti nga ekusuhi na Yordani, eYeriko. 13  Hiloko Muxe na Eliyazara lowa muprista ni tindhuna hinkwato ta ntshungu va huma va ya hlangana na vona ehandle ka nxaxa. 14  Kutani Muxe a hlundzukela vavanuna lava vekiweke va mavandla lama hlaselaka,+ varhangeri va vanhu va magidi ni varhangeri va vanhu va madzana lava a va ta va huma etsimeni ra nyimpi. 15  Hikwalaho Muxe a ku eka vona: “Xana mi londzovote vaxisati hinkwavo va hanya?+ 16  Maswivo! Hi vona lava hi rito ra Balama va nga kucetela vana va Israyele ku endla hi ku pfumala vutshembeki+ eka Yehovha emhakeni ya Peyori,+ lerova ntungu wu wela ntshungu wa Yehovha.+ 17  Kutani sweswi, dlayani waxinuna un’wana ni un’wana exikarhi ka lavatsongo, mi dlaya ni wansati un’wana ni un’wana loyi a nga tshama a tivana ni wanuna hi ku etlela ni waxinuna.+ 18  Mi tilondzovotela vana hinkwavo va hanya exikarhi ka vavasati lava nga wu tivangiki mukhuva wa ku etlela ni waxinuna.+ 19  Loko ku ri n’wina, tshamani ehandle ka nxaxa ku ringana masiku ya nkombo. Un’wana ni un’wana la dlayeke moya-xiviri+ ni un’wana ni un’wana la khumbeke loyi a dlayiweke,+ mi fanele mi titengisa+ hi siku ra vunharhu ni hi siku ra vunkombo, n’wina ni lava va nga makhumbi ya n’wina. 20  Nguvu yin’wana ni yin’wana ni xilo xin’wana ni xin’wana xa dzovo ni swilo hinkwaswo leswi endliweke hi dzovo ra mbuti ni xilo xin’wana ni xin’wana xa ntsandza, mi fanele mi swi tengisa exidyohweni.”+ 21  Kutani Eliyazara lowa muprista a byela vavanuna va nyimpi lava a va ye enyimpini a ku: “Lexi i xileriso xa nawu lowu Yehovha a leriseke Muxe a ku, 22  ‘Nsuku, silivhere, koporo, nsimbi, thini ni ntsopfu ntsena, 23  hinkwaswo leswi hundzaka endzilweni+ mi ta swi hundzisa endzilweni, swi ta va swi tengile. Ntsena swi fanele swi tengisiwa hi mati ku ri ku swi basisa.+ Kutani hinkwaswo leswi nga hundziki endzilweni mi ta swi hundzisa ematini.+ 24  Mi fanele mi hlantswa tinguvu ta n’wina hi siku ra vunkombo, mi va lava tengeke, endzhaku ka sweswo mi nga nghena enxaxeni.’”+ 25  Yehovha a ya emahlweni a byela Muxe leswi, a ku: 26  “Hlaya ntsengo wa leswi swi phangiweke, lava va nga makhumbi, eka vanhu ni le ka swifuwo, wena na Eliyazara lowa muprista ni varhangeri va vatata wa ntshungu. 27  U fanele u swi avanyisa hi le xikarhi leswi phangiweke, u nyika lava va hlanganyelaka enyimpini, lava ngheneleke tsima ni lavan’wana hinkwavo va ntshungu.+ 28  Eka vavanuna va nyimpi lava ngheneleke tsima, u fanele u teka moya-xiviri wun’we eka vanhu va 500 wu va xibalo+ eka Yehovha, eka vanhu ni le ka ntlhambi wa tihomu ni le ka timbhongolo ni le ka ntlhambi wa tinyimpfu. 29  Xiphemu xa swona u ta xi teka u xi nyika Eliyazara lowa muprista ku ri munyikelo wa Yehovha.+ 30  Kutani eka xiphemu xa leswi nga swa vana va Israyele u fanele u teka xin’we eka swa 50, eka vanhu, eka ntlhambi wa tihomu, eka timbhongolo ni le ka ntlhambi wa tinyimpfu, eka muxaka wun’wana ni wun’wana wa xifuwo, kutani u fanele u swi nyika Valevhi,+ vahlayisi va xiboho xa tabernakela ya Yehovha.”+ 31  Muxe na Eliyazara lowa muprista va endla hilaha Yehovha a leriseke Muxe hakona.  32  Kutani rifuwo, leswin’wana hinkwaswo leswi phangiweke leswi vanhu lava ngheneleke tsima va swi phangeke, swi endla tinyimpfu ta 675 000, 33  tihomu ta 72 000, 34  ni timbhongolo ta 61 000. 35  Loko ku ri mimoya-xiviri+ leyi nga vanhu, ku sukela eka vavasati lava nga si tshamaka va tiva mukhuva wa ku etlela ni waxinuna,+ mimoya-xiviri hinkwayo a yi ri 32 000. 36  Kutani xiphemu lexi a xi ri xiavelo xa lava va ngheneleke tsima xi endla nhlayo ya 337 500 entlhambini wa tinyimpfu. 37  Xibalo+ xa Yehovha lexi humaka entlhambini wa tinyimpfu xi endla 675. 38  Entlhambini wa tihomu a ku ri 36 000, kutani xibalo xa Yehovha eka tona a xi ri 72. 39  Timbhongolo a ti ri 30 500, kutani xibalo xa Yehovha eka tona a xi ri 61. 40  Mimoya-xiviri leyi nga vanhu a yi ri 16 000, kutani xibalo xa Yehovha eka vona a xi ri mimoya-xiviri ya 32. 41  Hiloko Muxe a nyika xibalo eka Eliyazara lowa muprista xi va munyikelo wa Yehovha,+ hilaha Yehovha a leriseke Muxe hakona.+ 42  Kutani eka xiphemu lexi nga xa vana va Israyele, lexi Muxe a xi aveke eka leswi nga swa vavanuna lava lweke nyimpi: 43  Xiphemu xa leswi nga swa ntshungu lexi humaka entlhambini wa tinyimpfu xi endla 337 500, 44  entlhambini wa tihomu xi endla 36 000, 45  etimbhongolweni xi endla 30 500, 46  eka mimoya-xiviri leyi nga vanhu xi endla 16 000. 47  Eka xiphemu lexi nga xa vana va Israyele Muxe a teka xin’we lexi faneleke xi humesiwa eka swa 50, eka vanhu ni le ka swifuwo, a swi nyika Valevhi,+ vaendli va ntirho+ wa le tabernakeleni ya Yehovha, hilaha Yehovha a leriseke Muxe hakona. 48  Kutani vavanuna lava vekiweke lava a va ri va vanhu va magidi va nyimpi,+ varhangeri va vanhu va 1 000 ni varhangeri va vanhu va 100+ va tshinela eka Muxe, 49  va byela Muxe va ku: “Malandza ya wena ma teke ntsengo wa vavanuna va nyimpi lava va languteriwaka hi hina, a nga kona ni un’we la vikiweke a kayivela eka hina.+ 50  Hikwalaho pfumelela un’wana ni un’wana wa hina a nyikela hi leswi a swi kumeke, swi va gandzelo ra Yehovha,+ swilo swa nsuku, tinketana leti nga sindza ra le nengeni, vusenga, swingwavila swo fungha ha swona,+ swingwavila swa tindleve ni swin’wetsin’wetsi+ swa vaxisati, leswaku hi yi kombelela ku rivaleriwa mimoya-xiviri ya hina emahlweni ka Yehovha.” 51  Kutani Muxe na Eliyazara lowa muprista va amukela nsuku lowu humaka eka vona,+ ni swin’wetsin’wetsi hinkwaswo. 52  Nsuku hinkwawo wa munyikelo lowu va wu nyikeleke eka Yehovha wu endla tixikele ta 16 750, wu huma eka varhangeri va vanhu va magidi ni varhangeri va vanhu va madzana. 53  Un’wana ni un’wana wa vavanuna va nyimpi a a titekele leswi phangiweke.+ 54  Hiloko Muxe na Eliyazara lowa muprista va amukela nsuku lowu humaka eka varhangeri va vanhu va magidi ni varhangeri va vanhu va madzana, va wu tisa entsongeni wa nhlangano wu va xitsundzuxo+ eka vana va Israyele emahlweni ka Yehovha.

Tinhlamuselo ta le hansi