Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Tinhlayo 27:1-23

27  Kutani vana va vanhwanyana va Selofehada+ n’wana wa Hefere, n’wana wa Giliyadi, n’wana wa Makiri, n’wana wa Manase+ va mindyangu ya Manase n’wana wa Yosefa va tshinela. Lawa a ku ri mavito ya vana vakwe va vanhwanyana: Mahela, Nowa, Hogila, Milka na Tirisa.+  Va yima emahlweni ka Muxe ni le mahlweni ka Eliyazara lowa muprista,+ ni le mahlweni ka tindhuna ni le ka ntshungu hinkwawo enyangweni ya ntsonga wa nhlangano, va ku:  “Tatana u fele emananga,+ kambe a a nga ri kona exikarhi ka ntshungu, hileswaku exikarhi ka lava va nga tixaxameta ku pfukela Yehovha entshungwini wa Kora,+ kambe u fele xidyoho xakwe;+ a nga vanga na vana va majaha.  Ha yini vito ra tatana ri fanele ri susiwa exikarhi ka ndyangu wakwe hileswi a nga vangiki na n’wana wa jaha?+ Wena hi nyike ndzhaka exikarhi ka vamakwavo va tatana.”+  Hiloko Muxe a vika mhaka ya vona emahlweni ka Yehovha.+  Kutani Yehovha a byela Muxe a ku:  “Vana va vanhwanyana va Selofehada va vulavula kahle. Hakunene u fanele u va nyika ndzhaka exikarhi ka vamakwavo va tata wa vona, u fanele u va hundzisela ndzhaka ya tata wa vona.+  Kutani u ta byela vana va Israyele u ku, ‘Loko munhu un’wana ni un’wana o tshuka a fa a nga ri na n’wana wa jaha, mi fanele mi hundzisela ndzhaka yakwe eka n’wana wakwe wa nhwanyana.  Loko a nga ri na n’wana wa nhwanyana, ndzhaka yakwe mi fanele mi yi nyika vamakwavo. 10  Kutani loko a nga ri na vamakwavo, ndzhaka yakwe mi fanele mi yi nyika vamakwavo va tata wakwe. 11  Loko tata wakwe a nga ri na vamakwavo, mi fanele mi nyika ndzhaka yakwe eka xaka+ rakwe lerikulu, leri nga ekusuhi na yena ra ndyangu wakwe, rona ri fanele ri yi teka. Wu ta va nawu wa xiboho xa vuavanyisi eka vana va Israyele, hilaha Yehovha a leriseke Muxe hakona.’” 12  Endzhaku ka sweswo Yehovha a byela Muxe a ku: “Tlhandlukela entshaveni leyi ya Abarima+ u vona tiko leri kunene ndzi nga ta ri nyika vana va Israyele.+ 13  Loko u ri vonile, u ta lahliwa eka varikwenu,+ ina, wena, hilaha Aroni makwenu a lahliweke hakona,+ 14  hilaha n’wina mi xandzukeleke xileriso xa mina hakona emananga ya Zini loko ntshungu wu holova,+ malunghana ni ku ndzi hlawulekisa+ hi mati ematihlweni ya vona. Lawa i mati ya Meriba+ eKadexi+ emananga ya Zini.”+ 15  Kutani Muxe a byela Yehovha a ku: 16  “Yehovha Xikwembu xa mimoya+ ya mixaka hinkwayo ya nyama+ a a veke wanuna+ ehenhla ka ntshungu 17  la nga ta rhanga emahlweni ka vona ni loyi a nga ta nghena emahlweni ka vona ni loyi a nga ta va humesa ni loyi a nga ta va nghenisa,+ leswaku nhlengeletano ya Yehovha yi nga fani ni tinyimpfu leti nga riki na murisi.”+ 18  Hikwalaho Yehovha a byela Muxe a ku: “Teka Yoxuwa n’wana wa Nuni, wanuna loyi a nga ni moya,+ u n’wi tlhandleka voko;+ 19  u fanele u n’wi yimisa emahlweni ka Eliyazara lowa muprista ni le mahlweni ka ntshungu hinkwawo, u n’wi lerisa ematihlweni ya wona.+ 20  U fanele u veka xindzhuti xin’wana xa wena ehenhla ka yena,+ leswaku ntshungu hinkwawo wa vana va Israyele wu n’wi yingisa.+ 21  U ta yima emahlweni ka Eliyazara lowa muprista, kutani u ta vutisisa+ evuavanyisini bya Urimi+ malunghana na yena emahlweni ka Yehovha. Hi xileriso xakwe va ta huma naswona hi xileriso xakwe va ta nghena, yena ni vana va Israyele hinkwavo lava va nga na yena ni ntshungu hinkwawo.” 22  Kutani Muxe a endla hilaha Yehovha a n’wi leriseke hakona. Hikwalaho a teka Yoxuwa a n’wi yimisa emahlweni ka Eliyazara+ lowa muprista ni le mahlweni ka ntshungu hinkwawo, 23  a n’wi tlhandleka mavoko, a n’wi lerisa,+ hilaha Yehovha a vuleke hakona ha Muxe.+

Tinhlamuselo ta le hansi