Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Tinhlayo 20:1-29

20  Kutani vana va Israyele, ntshungu hinkwawo, va fika emananga ya Zini+ hi n’hweti yo sungula, naswona vanhu va tshama eKadexi.+ Meriyamu+ u fele kwalaho naswona u lahliwe kwalaho.  Ntshungu+ a wu nga ri na mati kutani wu hlengeletana ku pfukela Muxe na Aroni.+  Vanhu va holovela+ Muxe va ku: “Loko a hi lo fa swin’we ni vamakwerhu loko va fa emahlweni ka Yehovha!+  Ha yini n’wina mi tise nhlengeletano ya Yehovha emananga lawa leswaku hina ni swifuwo swa hina swa ndzhwalo hi ta fela kona?+  Ha yini mi hi rhangele hi huma aEgipta leswaku mi hi tisa endhawini leyi yo biha?+ I ndhawu leyi pfumalaka timbewu ni makuwa ni mirhi ya vhinya ni magrenada,+ naswona a ku na mati yo nwa.”  Hiloko Muxe na Aroni va ta va huma emahlweni ka nhlengeletano va ya enyangweni ya ntsonga wa nhlangano, va wa ehansi hi swikandza swa vona,+ kutani ku vangama ka Yehovha ku sungula ku humelela eka vona.+  Hiloko Yehovha a byela Muxe a ku:  “Teka nhonga+ kutani u vitana ntshungu, wena na Aroni makwenu, mi fanele mi vulavula ni ribye ematihlweni ya vona leswaku kunene ri humesa mati ya rona; mi ta va humesela mati ma huma eribyeni ivi mi nyika ntshungu ni swifuwo swa vona swa ndzhwalo, va nwa.”+  Kutani Muxe a teka nhonga emahlweni ka Yehovha+ hilaha a n’wi leriseke hakona. 10  Endzhaku ka sweswo Muxe na Aroni va vitana nhlengeletano emahlweni ka ribye, kutani yena a va byela a ku: “Twanani, sweswi, n’wina vaxandzuki!+ Xana hi ta mi humesela mati eribyeni leri?”+ 11  Hiloko Muxe a tlakusa voko a ba ribye kambirhi hi nhonga yakwe; kutani mati yo tala ma sungula ku huma, ntshungu ni swifuwo swa yona swa ndzhwalo va sungula ku nwa.+ 12  Endzhaku Yehovha a byela Muxe na Aroni a ku: “Hikwalaho ka leswi mi nga pfumelangiki eka mina leswaku mi ndzi hlawulekisa+ ematihlweni ya vana va Israyele, hikokwalaho a mi nge yi nghenisi nhlengeletano leyi etikweni leri kunene ndzi nga ta ri nyika yona.”+ 13  Lawa i mati ya Meriba,+ hikuva vana va Israyele va holovele Yehovha, lerova a hlawulekisiwa exikarhi ka vona. 14  Endzhaku ka sweswo Muxe a rhuma varhumiwa va suka eKadexi va ya eka hosi ya Edomu,+ va ku: “Makwenu Israyele+ u te, ‘Wena u tiva ku nonon’hweriwa hinkwako loku ku hi fikeleke.+ 15  Kutani vatata wa hina va rhelela aEgipta,+ hina hi hambeta hi tshama aEgipta masiku yo tala;+ Vaegipta va sungula ku hi vavisa, hina ni vatata wa hina.+ 16  Eku heteleleni hi huwelele eka Yehovha+ kutani u twe rito ra hina naswona a rhuma ntsumi+ yi hi humesa aEgipta; sweswi hi le Kadexi, muti lowu nga emakumu ka ndhawu ya wena. 17  Hi kombela u hi pfumelela hi hundza etikweni ra wena. A hi nge hundzi exikarhi ka nsimu kumbe ensin’wini ya vhinya, naswona a hi nge nwi mati ya xihlovo. Hi ta famba egondzweni ra hosi.+ A hi nge hambukeli etlhelweni ra xinene kumbe ra ximatsi,+ kukondza hi hundza endhawini ya wena.’” 18  Kambe, Edomu a ku eka yena: “U nga tshuki u hundza hi le ka mina, u chava leswaku ndzi nga huma ni banga ndzi ta hlangana na wena.” 19  Hiloko vana va Israyele va ku eka yena: “Hi ta tlhandluka hi gondzo lerikulu; loko mina ni swifuwo swa mina ho nwa mati ya wena, kunene ndzi ta ku nyika leswi ringaneke wona.+ A ndzi lavi nchumu lowu engetelekeke handle ka leswaku ndzi tsemakanya ndzi famba hi milenge.”+ 20  Hambiswiritano, a ku: “U nga tshuki u tsemakanya.”+ Hiloko Edomu+ a huma a ta hlangana na yena a ri ni vanhu vo tala swinene ni hi voko ra matimba. 21  Hikwalaho Edomu a ala ku pfumelela Israyele leswaku a hundza endhawini yakwe.+ Kutani Israyele a n’wi fularhela.+ 22  Hiloko vana va Israyele, ntshungu hinkwawo, va suka eKadexi+ va ya fika eNtshaveni ya Hore.+ 23  Kutani Yehovha a byela Muxe na Aroni eNtshaveni ya Hore endzilakaneni wa tiko ra Edomu a ku: 24  “Aroni u ta lahliwa eka varikwavo,+ hikuva a nge ngheni etikweni leri kunene ndzi nga ta ri nyika vana va Israyele, hikwalaho ka leswi n’wina mi xandzukeleke xileriso xa mina malunghana ni mati ya Meriba.+ 25  Teka Aroni na Eliyazara n’wana wakwe u va tisa eNtshaveni ya Hore. 26  U hluvurisa Aroni tinguvu+ takwe, u ta ti ambexa Eliyazara+ n’wana wakwe; kutani Aroni u ta vekiwa, a fela kona.”+ 27  Hiloko Muxe a endla hilaha Yehovha a leriseke hakona; kutani va khandziya Ntshava ya Hore ematihlweni ya ntshungu hinkwawo. 28  Kutani Muxe a hluvula Aroni tinguvu takwe, a ti ambexa Eliyazara n’wana wakwe loyi a a ri na vona, endzhaku ka sweswo Aroni a fela kwalaho ehenhla ka ntshava.+ Hiloko Muxe na Eliyazara va rhelela va suka entshaveni. 29  Kutani ntshungu hinkwawo wu swi vona leswaku Aroni u timekile, hiloko yindlu hinkwayo ya Israyele yi hambeta yi rila Aroni masiku ya 30.+

Tinhlamuselo ta le hansi