Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Tinhlayo 15:1-41

15  Yehovha a ya emahlweni a byela Muxe a ku:  “Byela vana va Israyele u ku eka vona, ‘Loko mi hetelela mi fika etikweni leri mi nga ta tshama eka rona, leri ndzi mi nyikaka rona,+  mi fanele mi endla gandzelo ra Yehovha+ leri endliweke hi ndzilo,+ gandzelo ro hisiwa+ kumbe xitlhavelo xa ku endla xitshembiso lexi hlambanyiweke xo hlawuleka kumbe xa ku tirhandzela kumbe mi ri endla hi nkarhi wa minkhuvo ya n’wina leyi vekiweke,+ leswaku mi endlela Yehovha+ nun’hwelo lowu phyuphyisaka, wu huma entlhambini wa tihomu kumbe entlhambini wa tinyimpfu;  loyi a nyikelaka gandzelo rakwe u fanele a tlhela a nyikela eka Yehovha gandzelo ra mavele ya mapa+ lama silekeke kahle, ku ri vukhume bya mpimo wa efa, ma tsakamisiwe hi vumune bya mpimo wa hini ya mafurha.  U fanele u endla vhinyo yi va gandzelo ra swakunwa,+ vumune bya mpimo wa hini swin’we ni gandzelo ro hisiwa kumbe ri va ra xitlhavelo xin’wana ni xin’wana xa xinyimpfana xa xinuna.  Kumbe eka khuna u ta endla gandzelo ra mavele ra mimpimo yimbirhi ya vukhume bya mapa lama silekeke kahle, ma tsakamisiwe hi vunharhu bya mpimo wa hini ya mafurha.  Kutani u ta nyikela vhinyo yi va gandzelo ra swakunwa, vunharhu bya mpimo wa hini, yi va nun’hwelo lowu phyuphyisaka eka Yehovha.  “‘Kambe loko wo tshuka u nyikela nkunzi yi huma entlhambini wa tihomu leswaku yi va gandzelo ro hisiwa+ kumbe yi va xitlhavelo xa xitshembiso lexi hlambanyiweke xo hlawuleka+ kumbe xitlhavelo xa xinakulobye eka Yehovha,+  munhu u fanele a tlhela a nyikela gandzelo ra mavele+ ra mimpimo yinharhu ya vukhume bya mapa lama silekeke kahle, lama tsakamisiweke hi hafu ya mpimo wa hini ya mafurha, swin’we ni nkunzi leyi humaka entlhambini wa tihomu. 10  Kutani u fanele u nyikela vhinyo yi va gandzelo ra swakunwa,+ hafu ya mpimo wa hini yi va gandzelo leri endliweke hi ndzilo, ri va nun’hwelo lowu phyuphyisaka eka Yehovha. 11  Hi yona ndlela leyi ku faneleke ku endliwa ha yona eka nkunzi yin’wana ni yin’wana kumbe eka khuna rin’wana ni rin’wana kumbe eka nhloko yin’we ya swinyimpfana swa xinuna kumbe eka timbuti. 12  Nhlayo yihi ni yihi leyi mi nga yi nyikelaka, hi yona ndlela leyi mi nga ta endla ha yona eka xin’wana ni xin’wana hi ku ya hi nhlayo ya swona. 13  Munhu un’wana ni un’wana la tumbulukeke kwalaho u ta nyikela leswi hi ndlela leyi, loko a nyikela gandzelo leri endliweke hi ndzilo, ri va nun’hwelo lowu phyuphyisaka eka Yehovha.+ 14  “‘Loko ko tshuka ku va ni muluveri la luveleke eka n’wina kumbe loyi a nga exikarhi ka n’wina eka switukulwana swa n’wina, naswona a fanele a endla gandzelo leri endliweke hi ndzilo, ri va nun’hwelo lowu phyuphyisaka eka Yehovha, hilaha na n’wina mi endlaka hakona, u ta endla tano.+ 15  N’wina lava mi nga va nhlengeletano ni muluveri la luveleke eka n’wina mi ta va ni nawu+ wun’we. Wu ta va nawu wa hilaha ku nga riki na makumu eswitukulwaneni swa n’wina. Muluveri u ta fana na n’wina emahlweni ka Yehovha.+ 16  Ku ta va ni nawu wun’we ni xiboho xin’we xa vuavanyisi eka n’wina ni muluveri la luveleke eka n’wina.’”+ 17  Yehovha a ya emahlweni a byela Muxe a ku: 18  “Byela vana va Israyele u ku eka vona, ‘Loko mi nghena etikweni leri ndzi mi tisaka eka rona,+ 19  kutaku loko mi dya xinkwa xin’wana ni xin’wana xa tiko,+ mi fanele mi nyikela munyikelo eka Yehovha. 20  Mi ta nyikela munyikelo wa swirhangana+ swa swakudya swa n’wina leswi nga silekangiki hi ku helela swo kota swinkwa leswi vumbekeke ku fana ni swingwavila. Mi ta swi nyikela hi ndlela leyi fanaka ni munyikelo wa le xivuyeni. 21  Swin’wana swa swirhangana swa swakudya swa n’wina leswi nga silekangiki kahle mi ta swi nyikela swi va munyikelo eka Yehovha eswitukulwaneni swa n’wina hinkwaswo. 22  “‘Kutani loko mo tshuka mi endla xihoxo, mi nga swi endli swileriso+ leswi hinkwaswo, leswi Yehovha a swi byeleke Muxe, 23  hinkwaswo leswi Yehovha a mi leriseke swona ha Muxe ku sukela siku leri Yehovha a leriseke ha rona eka switukulwana swa n’wina ku ya emahlweni, 24  kutaku loko swi endliwe hi xihoxo ekule ni mahlo ya ntshungu, ntshungu hinkwawo wu fanele wu nyikela nkunzi yin’we leyitsongo yi va gandzelo ro hisiwa, yi va nun’hwelo lowu phyuphyisaka eka Yehovha ni gandzelo ra yona ra mavele ni gandzelo ra yona ra swakunwa, hi ku ya hi endlelo+ ra nkarhi ni nkarhi ni ximbutana xin’we xi va gandzelo ra xidyoho.+ 25  Muprista u fanele a kombela leswaku ntshungu hinkwawo wa vana va Israyele wu rivaleriwa,+ kutani wu ta rivaleriwa; hikuva a ku ri xihoxo+ naswona vona va tise gandzelo ra Yehovha leri endliweke hi ndzilo, ri ri gandzelo ra vona ni gandzelo ra xidyoho emahlweni ka Yehovha hikwalaho ka xihoxo xa vona. 26  Kutani ntshungu hinkwawo wa vana va Israyele wu fanele wu rivaleriwa+ ni muluveri la luveleke exikarhi ka vona, hikuva a ku ri hikwalaho ka xihoxo xa vanhu hinkwavo. 27  “‘Kutani loko moya-xiviri wo tshuka wu endla xihoxo+ wu dyoha, wu fanele wu nyikela mbuti leyi nga elembeni ra yona ro sungula yi va gandzelo ra xidyoho.+ 28  Muprista u fanele a wu kombelela ku rivaleriwa moya-xiviri lowu wu endleke xihoxo wu dyoha hi ku dyoha ku nga ri ha vomu emahlweni ka Yehovha, lerova wu kombeleriwa ku rivaleriwa, kutani wu fanele wu rivaleriwa.+ 29  Loko ku ri munhu la tumbulukeke kwalaho exikarhi ka vana va Israyele ni muluveri la luveleke exikarhi ka vona, ku ta va ni nawu wun’we eka n’wina malunghana ni ku endliwa ka xo karhi ku nga ri ha vomu.+ 30  “‘Kambe moya-xiviri lowu endlaka nchumu wo karhi hi vomu,+ ku nga khathariseki leswaku i munhu la tumbulukeke kwalaho kumbe i muluveri, wona wu vula swo biha hi Yehovha,+ moya-xiviri wolowo wu fanele wu dlayiwa eka varikwavo.+ 31  Hikuva i rito ra Yehovha leri wu ri languteleke ehansi+ naswona wu tlule xileriso xakwe,+ moya-xiviri wolowo wu fanele wu dlayiwa hakunene.+ Xihoxo xa wona xi le henhla ka wona.’”+ 32  Loko vana va Israyele va ha ri emananga, va tshame va kuma munhu la rhotelaka tihunyi hi siku ra savata.+ 33  Hiloko lava va n’wi kumeke a rhotela tihunyi va n’wi tisa eka Muxe na Aroni ni ntshungu hinkwawo. 34  Kutani va n’wi nghenisa ekhotsweni+ hikuva leswi a a fanele a endliwa swona a swi nga hlamuseriwanga khwatsi. 35  Hi ku famba ka nkarhi Yehovha a byela Muxe a ku: “Munhu yoloye u fanele a dlayiwa+ hakunene, ntshungu hinkwawo wu fanele wu n’wi khandla hi maribye ehandle ka nxaxa.”+ 36  Kutani ntshungu hinkwawo wu n’wi humesela ehandle ka nxaxa, wu n’wi khandla hi maribye kukondza a fa, hilaha Yehovha a leriseke Muxe hakona. 37  Yehovha a ya emahlweni a byela Muxe a ku: 38  “Byela vana va Israyele leswaku va tiendlela madziva emakumu ka tinguvu ta vona eswitukulwaneni swa vona, va fanele va veka ngoti ya wasi emakumu ka dziva,+ 39  ‘Ma ta va madziva ya n’wina, mi ta ma vona ivi mi tsundzuka swileriso+ hinkwaswo swa Yehovha, kutani mi swi endla, mi nga tshuki mi famba hi ku landzela timbilu ta n’wina ni mahlo ya n’wina,+ leswi mi swi landzelaka hi rimbewu leri nga amukelekiki.+ 40  Hi xikongomelo xa leswaku mi tsundzuka kunene mi endla swileriso swa mina hinkwaswo, hakunene mi va lava kwetsimaka eka Xikwembu+ xa n’wina. 41  Hi mina Yehovha Xikwembu xa n’wina la mi humeseke etikweni ra Egipta leswaku ndzi tikombisa ndzi ri Xikwembu+ xa n’wina. Hi mina Yehovha Xikwembu+ xa n’wina.’”

Tinhlamuselo ta le hansi