Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Swivuriso 4:1-27

4  N’wina vana, yingisani ndzayo ya tatana+ naswona mi nyikela nyingiso, leswaku mi ta kuma ku twisisa.+  Kunene ndzi ta mi nyika xiletelo lexinene.+ Mi nga wu tshiki nawu wa mina.+  Hikuva ndzi ve n’wana wa xiviri eka tatana,+ wo olova, la nga yexe eka manana.+  A a ndzi letela+ a ndzi byela a ku: “Onge mbilu+ ya wena yi nga khoma marito ya mina swi tiya.+ Hlayisa swileriso swa mina kutani u hambeta u hanya.+  Kuma vutlhari,+ kuma ku twisisa.+ U nga rivali, naswona u nga hambuki emaritweni ya nomu wa mina.+  U nga byi tshiki, byi ta ku hlayisa. Byi rhandze, byi ta ku sirhelela.  Vutlhari i nchumu wa risima.+ Kuma vutlhari; naswona eka hinkwaswo leswi u swi kumaka, kuma ku twisisa.+  Byi xixime swinene, byi ta ku tlakusa.+ Byi ta ku vangamisa hikuva wa byi angarha.+  Byi ta veka harhi ya ku xonga enhlokweni ya wena;+ byi ta tlhandleka harhi ya ku saseka ehenhla ka wena.”+ 10  N’wananga, yingisa u tlhela u amukela marito ya mina.+ Kutani malembe ya wena ya ku hanya ma ta tala.+ 11  Ndzi ta ku letela hi ndlela ya vutlhari;+ ndzi ta ku fambisa emintileni ya ku lulama.+ 12  Loko u famba, magoza ya wena a ma nge manyeki;+ naswona loko u tsutsuma, a wu nge khunguvanyeki.+ 13  Namarhela ndzayo;+ u nga yi tshiki yi famba.+ Yi hlayise, hikuva i vutomi bya wena.+ 14  U nga ngheni endleleni ya lavo homboloka,+ naswona u nga fambi u lulama u ya nghena endleleni ya lavo biha.+ 15  Yi papalate,+ u nga hundzi etlhelo ka yona;+ yi kendlukele, u hundza.+ 16  Hikuva a va etleli va nga si endla swo biha,+ naswona a va khomiwi hi vurhongo va nga si khunguvanyisa van’wana.+ 17  Hikuva va dye xinkwa xa vuhomboloki,+ naswona va nwa vhinyo ya swiendlo swa madzolonga.+ 18  Kambe ndlela ya lavo lulama yi fana ni ku vonakala ko vangama loku vonakalaka hakatsongo-tsongo kukondza siku ri simekiwa ri tiya.+ 19  Ndlela ya lavo homboloka yi fana ni ku dzwihala;+ a va swi tivanga leswi swi hambetaka swi va khunguvanyisa.+ 20  N’wananga, yingisa marito ya mina.+ Rhiya ndleve eka leswi ndzi swi vulaka.+ 21  Swi nga suki ematihlweni+ ya wena. Swi hlayise exikarhi ka mbilu ya wena.+ 22  Hikuva i vutomi eka lava va swi kumaka+ ni rihanyo enyameni ya vona hinkwayo.+ 23  Hlayisa mbilu+ ya wena ku tlula hinkwaswo leswi swi faneleke swi hlayisiwa, hikuva swihlovo swa vutomi swi le ka yona.+ 24  Susa rito ro homboloka+ eka wena; ni milomu leyi kanganyisaka yi veke ekule na wena.+ 25  Loko ku ri mahlo ya wena, ma fanele ma languta+ emahlweni hi ku kongoma, ina, mahlo ya wena lama vangamaka ma fanele ma honolela emahlweni ka wena hi ku kongoma.+ 26  Khulela nenge wa wena ndlela,+ naswona onge tindlela ta wena hinkwato ti nga simekiwa ti tiya.+ 27  U nga voyameli evokweni ra xinene kumbe ra ximatsi.+ Susa nenge wa wena eka leswo biha.+

Tinhlamuselo ta le hansi