Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Swivuriso 29:1-27

29  Munhu la tshinyiwaka+ hi ku phindha-phindha kambe a nonon’hwisa nhamu,+ u ta tshoveka hi xitshuketa, a nge hanyi.+  Loko lavo lulama va tala, vanhu va tsaka;+ kambe loko lowo homboloka a fuma, vanhu va va ni nhlomulo.+  Munhu la rhandzaka vutlhari u tsakisa tata wakwe,+ kambe loyi a nga ni vunakulobye ni tinghwavava, u lovisa swilo swa nkoka.+  Hosi yi endla tiko ri tshama ri yimile hi vululami,+ kambe munhu wa swifumbarheriso wa ri hirimuxa.+  Munhu la tiyeke emirini la kurisaka nakulobye+ u tiandlalela rikoka emilengeni.+  Ku tlula nawu ka munhu wo biha, ku ni ntlhamu,+ kambe lowo lulama u ba nkulungwana, naswona u tsakile.+  Lowo lulama wa xi tiva xirilo xa swisiwana.+ Loyi a hombolokeke a nga ehleketi hi vutivi byo tano.+  Vanhu va mavulavulelo ya ku tibuma va hisa muti,+ kambe lavo tlhariha va tlherisa ku hlundzuka.+  Loko munhu wo tlhariha a nghene ehubyeni ni xiphukuphuku—wa tsaka a tlhela a hleka, kambe a ku na ku wisa.+ 10  Vanhu lava nga ni torha ra ngati va venga un’wana ni un’wana la pfumalaka xisandzu;+ loko ku ri lavo lulama, va hambeta va lava moya-xiviri wa un’wana ni un’wana.+ 11  Xihunguki xi humesa moya wa xona hinkwawo, kambe lowo tlhariha u tshama a rhulile ku fika emakumu.+ 12  Loko mufumi a nyikela nyingiso eka marito ya vunwa, hinkwavo lava n’wi tirhelaka va ta va vo homboloka.+ 13  Munhu la pfumalaka ni munhu la tshikilelaka va hlanganile;+ kambe Yehovha u voninga mahlo ya vona havambirhi.+ 14  Loko hosi yi avanyisa swisiwana hi ku landza ntiyiso,+ xiluvelo xa yona xi ta simekiwa xi tiya hi nkarhi lowu nga heriki.+ 15  Nkhavi ni ku tshinya swi nyika vutlhari;+ kambe mufana la tshikiweke a ntshunxekile u ta n’wi khomisa tingana mana wakwe.+ 16  Loko lavo homboloka va tala, ku tlula nawu ka andza; kambe lavo lulama va ta vona ku wa ka vona.+ 17  Bana n’wana wa wena, kutani u ta ku wisisa, naswona u ta wu tsakisa swinene moya-xiviri wa wena.+ 18  Laha ku nga riki na xivono, vanhu a va lawuleki,+ kambe va tsaka lava hlayisaka nawu.+ 19  Nandza a nge pfumeli ku lulamisiwa hi marito ntsena,+ hikuva wa twisisa kambe a nga yingisi.+ 20  Xana u vone munhu la hatlisaka ku vula xo karhi?+ Ku ni ntshembo hi xihunguki ku tlula yena.+ 21  Loko munhu a lema nandza wakwe ku sukela evuntshweni, evuton’wini byakwe lebyi landzelaka u ta va la nga nkhensiki. 22  Munhu la talaka ku hlundzuka u pfuxa mholovo,+ naswona un’wana ni un’wana la voyameleke evukarhini u wu tlula ngopfu nawu.+ 23  Ku titlakusa ka munhu wa la misaveni ku ta n’wi tsongahata,+ kambe loyi a titsongahataka emoyeni wakwe u ta vangama.+ 24  Loyi a tirhisanaka ni khamba u venga moya-xiviri wakwe.+ A nga ha twa xihlambanyo lexi fambisanaka ni ndzhukano, kambe a nga viki nchumu.+ 25  Ku chava vanhu swi veka ntlhamu,+ kambe loyi a tshembaka Yehovha u ta sirheleriwa.+ 26  Va tele lava va lavaka xikandza xa mufumi,+ kambe ku avanyisiwa ka vanhu ku huma eka Yehovha.+ 27  Munhu wo kala vululami i nchumu lowu nyenyetsaka eka lavo lulama,+ naswona loyi a lulameke endleleni yakwe i nchumu lowu nyenyetsaka eka lowo homboloka.+

Tinhlamuselo ta le hansi