Swivuriso 24:1-34
24 U nga va vondzoki vanhu vo biha,+ naswona u nga naveli ku tihlanganisa na vona.+
2 Hikuva timbilu ta vona ti tshamela ku anakanyisisa hi ku phanga, naswona milomu ya vona yi tshamela ku vulavula swo biha.+
3 Yindlu yi ta akiwa hi vutlhari,+ naswona yi ta simekiwa yi tiya+ hi ku twisisa.
4 Hi vutivi makamara ya le mpfungwe ma ta tala swilo hinkwaswo swa risima ni leswi tsakisaka swa nkoka.+
5 Munhu la tlhariheke hi matimba i munhu la tiyeke emirini,+ naswona munhu wa vutivi u tiyisa matimba.+
6 Hikuva u ta lwa nyimpi+ ya wena hi nkongomiso wa vutshila, naswona ku ni ku pona+ laha ku nga ni vatsundzuxi vo tala.
7 Eka xiphukuphuku vutlhari bya ntiyiso byi le henhla ngopfu;+ a xi nge wu pfuli nomu enyangweni.
8 Loko ku ri mani na mani la bohaka makungu yo endla swo biha, u ta vitaniwa n’wini lonkulu wa mianakanyo yo biha.+
9 Ku tikhoma ko biha ka xiphukuphuku i xidyoho,+ naswona muhlekuri i nchumu lowu nyenyetsaka evanhwini.+
10 Xana u tikombise u hele matimba hi siku ra maxangu?+ Matimba ya wena ma ta va matsongo.
11 Kutsula lava va yisiwaka eku feni; ni lava va tshetshelekelaka eku dlayiweni, Onge u nga va ponisa.+
12 Loko wo tshuka u ku: “Waswivo! A hi nga swi tivi leswi,”+ xana loyi a pimanyetaka timbilu a nge swi xiyi,+ ni loyi a xiyaka moya-xiviri wa wena a nge swi tivi+ kunene a tlherisela munhu wa la misaveni hi ku ya hi ntirho wakwe?+
13 N’wananga, dyana vulombe, hikuva i byinene; naswona veka xihlenge lexi tsokombelaka emalakeni ya wena.+
14 Hi ndlela leyi fanaka, tiva vutlhari bya moya-xiviri wa wena.+ Loko u byi kumile, kutani kwalaho ku ni vumundzuku, naswona ntshembo wa wena a wu nge herisiwi.+
15 Wena u nga fani ni lowo homboloka u tumbelela lowo lulama laha a tshamaka kona;+ u nga yi teki ndhawu yakwe yo wisela eka yona.+
16 Hikuva lowo lulama a nga ha wa ka nkombo, kunene u ta pfuka;+ kambe lavo homboloka va ta khunguvanyisiwa hi khombo.+
17 Loko nala wa wena a wa, u nga tsaki; naswona loko a khunguvanyeka, mbilu ya wena yi nga tsaki,+
18 leswaku Yehovha a nga swi voni kutani swi va swo biha ematihlweni yakwe kutani a susa ku hlundzuka kakwe eka yena.+
19 U nga va kariheli lava endlaka swo biha. U nga va naveli vanhu vo homboloka.+
20 Hikuva a byi nge vi kona vumundzuku eka lowo biha;+ rivoni ra lavo homboloka ri ta timiwa.+
21 N’wananga, chava Yehovha ni hosi.+ U nga tihlanganisi ni lava va cinca-cincaka.+
22 Hikuva khombo ra vona ri ta fika hi xitshuketa,+ hikuva i mani la lemukaka ku herisiwa ka lava va cinca-cincaka?+
23 Marito lawa i ya lava va tlhariheke:+ Ku ya hi nghohe loko u avanyisa a hi swinene.+
24 Loyi a byelaka lowo homboloka a ku: “U lulamile,”+ vanhu va ta n’wi sandza, vanhu va matiko va ta n’wi sola.
25 Kambe lava n’wi tshinyaka va ta tsaka,+ naswona ku ta ta nkateko ni leswinene eka vona.+
26 Loyi a angulaka hi ku kongoma u ta ntswontswa milomu.+
27 Lunghiselela ntirho wa wena u ri ehandle, naswona wu endle wu lungheka wa ha ri ensin’wini.+ Endzhaku ka sweswo u ta tlhela u aka vandyangu wa wena.
28 U nga vi mbhoni leyi lwisanaka ni munhu-kuloni ku nga ri na xivangelo.+ Kutani u va xiphukuphuku hi milomu ya wena.+
29 U nga vuli u ku: “Hilaha a endleke hakona eka mina, na mina ndzi ta endla hilaha ku fanaka eka yena.+ Ndzi ta tlherisela un’wana ni un’wana hi ku ya hi ndlela leyi a endlaka ha yona.”+
30 Ndzi hundze hi le nsin’wini ya lolo+ ni le nsin’wini ya vhinya ya munhu la nga ni mbilu yo hunguka.+
31 Kambe waswivo, hinkwayo ka yona yi humesa mfava.+ Swigatlu swi funengete vuandlalo bya yona, ni rirhangu ra yona ra maribye ri hirimuxiwile.+
32 Kutani mina ndzi sungula ku languta; ndzi swi anakanya embilwini;+ ndzi languta, kutani ndzi kuma dyondzo:+
33 Ku etlelanyana, ku khudzehelanyana, ku khondla mavoko leswaku u etlela,+
34 vusiwana bya wena byi ta ta ku fana ni nsulavoya ni ku pfumala ka wena ku fana ni munhu la hlomeke.+
