Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Swivuriso 22:1-29

22  Ku fanele ku hlawuriwa vito ematshan’weni ya rifuwo ro tala;+ tintswalo ta antswa ku tlula silivhere ni nsuku.+  La fuweke ni loyi a pfumalaka va hlanganile.+ Muendli wa vona hinkwavo i Yehovha.+  U tlharihile la voneke khombo kutani a tumbela,+ kambe la nga riki na ntokoto u ye emahlweni kutani u fanele a xupuriwa.+  Ku titsongahata ni ku chava Yehovha swi tisa rifuwo, ku vangama ni vutomi.+  Mitwa ni swirimbana swi le ndleleni ya lowo homboloka;+ loyi a rindzaka moya-xiviri u va ekule ngopfu na swona.+  Letela mufana hi ndlela leyi nga yakwe;+ hambiloko a kurile a nge hambuki eka yona.+  La fuweke hi loyi a fumaka lava va pfumalaka,+ naswona mulombi i nandza wa mulombisi.+  Loyi a byalaka leswi nga lulamangiki u ta tshovela swo biha,+ kambe nhonga ya ku hlundzuka kakwe yi ta fika emakumu ka yona.+  Loyi a nga ni tihlo leri nga ni musa u ta katekisiwa, hikuva u nyike xisiwana swakudya swakwe.+ 10  Hlongola muhlekuri, leswaku mholovo yi ta hela ni nandzu ni tingana swi ta hela.+ 11  Loyi a rhandzaka ku tenga ka mbilu+—hosi yi ta va nakulobye hikwalaho ka milomu yakwe yo xonga.+ 12  Mahlo ya Yehovha ma hlayise vutivi,+ kambe u onha marito ya muxengi.+ 13  Lolo ri te:+ “Ku ni nghala ehandle!+ Ndzi ta dlayiwa exikarhi ka mintsendzele!” 14  Nomu wa wansati la nga tiviwiki i mugodi wo enta.+ Loyi a soriweke hi Yehovha u ta wela eka wona.+ 15  Vuphukuphuku byi tsimbiwe embilwini ya mufana;+ nhonga ya ndzayo hi yona yi nga ta byi susa byi ya ekule na yena.+ 16  Loyi a dyelelaka xisiwana leswaku a kuma swilo swo tala,+ ni loyi a nyikaka la fuweke, kunene u ta pfumala.+ 17  Rhiya ndleve u yingisa marito ya lavo tlhariha,+ leswaku u ta pfulela mbilu ya wena vutivi bya mina.+ 18  Hikuva swa tsakisa loko u ma hlayisa ekhwirini ra wena,+ leswaku ma ta simekiwa ma tiya emilon’wini ya wena.+ 19  Leswaku ntshembo wa wena wu va eka Yehovha,+ wena ndzi ku nyike vutivi namuntlha. 20  Xana a ndzi ku tsalelanga ku ta fikela sweswi hi switsundzuxo ni vutivi,+ 21  ku ku komba ntiyiso wa marito ya ntiyiso, leswaku u ta tlherisela marito ya ntiyiso—eka loyi a ku rhumeke?+ 22  U nga xi kanganyisi xisiwana hileswi xi nga xisiwana,+ naswona la xanisekaka, u nga n’wi pfotlosi enyangweni.+ 23  Hikuva Yehovha u ta va rivalela,+ hakunene u ta kanganyisa moya-xiviri lowu wu va kanganyisaka.+ 24  U nga vi nakulobye wa loyi a voyameleke eku hlundzukeni;+ naswona u nga ngheni ni munhu la karihaka ngopfu, 25  leswaku u nga yi toloveli ndlela ya yena kutani u vekela moya-xiviri wa wena ntlhamu.+ 26  U nga ngheni exikarhi ka lava va phokotelaka mavoko,+ exikarhi ka lava va tiyisekisaka swikweleti.+ 27  Loko u nga ri na nchumu xo hakela ha xona, ha yini a fanele a teka sangu ra wena ehansi ka wena? 28  U nga wu tlhentlhisi ndzilakana lowu vekiweke khale swinene, lowu endliweke hi vatata wa wena.+ 29  Xana u n’wi vonile munhu la nga ni vuswikoti entirhweni wakwe? U ta yima emahlweni ka tihosi;+ a nge yimi emahlweni ka vanhu lava tolovelekeke.

Tinhlamuselo ta le hansi