Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Swivuriso 20:1-30

20  Vhinyo i muhlekuri,+ swakunwa leswi pyopyaka swi ni matimba,+ naswona loyi swi n’wi pepetsekisaka a nga tlharihanga.+  Ku chaviwa ka hosi ka bonga ku fana ni xinghalana xa ntshiva.+ Un’wana ni un’wana la yi hlundzukelaka u dyohela moya-xiviri wakwe.+  I ku vangama eka munhu loko a tshika ku holova,+ kambe un’wana ni un’wana la nga xiphukuphuku u ta tinyiketela eka kona.+  Lolo a ri nge rimi hikwalaho ka vuxika;+ ri ta va ri kombela hi nkarhi wa ntshovelo, kambe ku ta va ku nga ri na nchumu.+  Xitsundzuxo lexi nga embilwini ya munhu xi fana ni mati yo enta,+ kambe munhu wa ku twisisa hi loyi a nga ta xi humesa.+  Vanhu vo tala, ha un’we-un’we va ta huwelela musa wa vona wa rirhandzu,+ kambe i mani la nga kumaka munhu wo tshembeka?+  La lulameke u famba hi vutshembeki.+ Va tsaka vana vakwe lava n’wi landzelelaka.+  Hosi yi tshama exiluvelweni xa vuavanyisi,+ yi hangalasa vubihi hinkwabyo hi mahlo ya yona.+  I mani la nga vulaka a ku: “Ndzi basise mbilu ya mina;+ ndzi basile exidyohweni xa mina”?+ 10  Swipimo swa mixaka yimbirhi leswi hambaneke ni mimpimo ya mixaka yimbirhi leyi hambaneke ya efa+—hayimbirhi ka yona i nchumu lowu nyenyetsaka eka Yehovha.+ 11  Mufana u tiviwa hi ndlela leyi a hanyaka ha yona loko mintirho yakwe yi tengile naswona yi lulamile.+ 12  Ndleve leyi twaka ni tihlo leri vonaka—Yehovha u swi endle haswimbirhi.+ 13  U nga byi rhandzi vurhongo, leswaku u nga vi xisiwana.+ Pfula mahlo ya wena; xurha hi xinkwa.+ 14  “Swi bihile, swi bihile,” ku vula muxavi, naswona wa famba.+ Endzhaku ka sweswo wa tibuma.+ 15  Ku ni nsuku ni tikorala to tala; kambe milomu ya vutivi, i swibya swa risima.+ 16  Teka nguvu ya yena, loko wo tshuka u endle xitiyisekiso ni mufambi;+ kasi emhakeni ya wansati wumbe, teka xitiyisekiso xa nandzu eka yena.+ 17  Xinkwa lexi kumiweke hi mavunwa xi tsakisa munhu,+ kambe endzhaku ka sweswo nomu wakwe wu ta tala rikhwarha.+ 18  Makungu ma simekiwa ma tiya hi xitsundzuxo,+ naswona yana emahlweni u lwa nyimpi ya wena hi ku landza nkongomiso wa vutshila.+ 19  Loyi a famba-fambaka a lumbeta u paluxa xihundla;+ naswona u nga vi na xinakulobye ni loyi a yengiwaka hi milomu yakwe.+ 20  Loko ku ri loyi a rhukanaka tata wakwe ni mana wakwe,+ rivoni rakwe ri ta timiwa loko ku tshinela munyama.+ 21  Ndzhaka yi kumiwa hi makwanga eku sunguleni,+ kambe vumundzuku bya yona a byi nge katekisiwi.+ 22  U nga vuli u ku: “Ndzi ta tlherisela vubihi!”+ Tshemba Yehovha,+ u ta ku ponisa.+ 23  Swipimo swa mixaka yimbirhi leswi hambaneke i nchumu lowu nyenyetsaka eka Yehovha,+ naswona swikalo leswi xisaka a hi swinene.+ 24  Tindlela ta munhu la tiyeke emirini+ ti huma eka Yehovha. Loko ku ri munhu wa la misaveni, xana a nga yi xiya njhani ndlela yakwe?+ 25  I ntlhamu loko munhu wa la misaveni a hatlise a huwelela a ku, “Xa kwetsima,”+ endzhaku ka switshembiso leswi hlambanyiweke+ a voyamela eku kambisiseni.+ 26  Hosi yo tlhariha yi hangalasa vanhu vo homboloka,+ naswona yi khunguluxela vhilwa ehenhla ka vona.+ 27  Ku hefemula+ ka munhu wa la misaveni i rivoni ra Yehovha, leri lavisisaka hi vukheta tindlela hinkwato ta le swiphen’wini swa le ndzeni-ndzeni ka khwiri.+ 28  Musa wa rirhandzu ni ntiyiso—swi rindza hosi;+ naswona yi seketele xiluvelo xa yona hi musa wa rirhandzu.+ 29  Ku saseka ka majaha i matimba ya wona,+ naswona ku vangama ka vakulukumba i mpunga wa vona.+ 30  Ku boxa timbanga ku susa swo biha;+ ni minkhavi yi susa swiphemu swa le ndzeni-ndzeni ka khwiri.+

Tinhlamuselo ta le hansi