Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Swivuriso 16:1-33

16  Ku hlela ka mbilu i ka munhu wa la misaveni,+ kambe nhlamulo ya ririmi i ya Yehovha.+  Tindlela ta munhu hinkwato ti tengile ematihlweni yakwe,+ kambe Yehovha u pima mimoya.+  Andlala mintirho ya wena eka Yehovha,+ kutani makungu ya wena ma ta simekiwa ma tiya.+  Yehovha u endle hinkwaswo, a swi endlela xikongomelo xakwe,+ ina, hambi ku ri munhu wo homboloka u n’wi endlele siku ro biha.+  Un’wana ni un’wana la tikurisaka embilwini i nchumu lowu nyenyetsaka eka Yehovha.+ Voko ri nga ha hlangana ni voko, kambe munhu a nge poni ku xupuriwa.+  Xihoxo xa rivaleriwa hi musa wa rirhandzu ni ntiyiso,+ naswona munhu u fularhela swo biha hikwalaho ka ku chava Yehovha.+  Loko Yehovha a tsakela tindlela ta munhu,+ u endla nileswaku valala vakwe va va ni ku rhula na yena.+  Swa antswa leswitsongo leswi nga ni ku tshembeka+ ematshan’weni ya mihandzu yo tala leyi nga riki na vululami.+  Mbilu ya munhu wa la misaveni yi nga ha ehleketisisa hi ndlela yakwe,+ kambe Yehovha u kongomisa milenge yakwe.+ 10  Xiboho lexi huhuteriweke xi ta va ehenhla ka milomu ya hosi;+ nomu wakwe a wu fanelanga wu tikombisa wu nga tshembekanga ehubyeni.+ 11  Xipimo lexi lulameke ni swikalo i swa Yehovha;+ swipimo hinkwaswo swa ribye swa nkwama i ntirho wakwe.+ 12  Ku endla swo homboloka i nchumu lowu nyenyetsaka eka tihosi,+ hikuva xiluvelo xi simekiwa hi ku lulama xi tiya.+ 13  Milomu ya ku tshembeka yi tsakisa hosi leyikulu;+ naswona u rhandza munhu la vulavulaka swilo leswinene.+ 14  Vukarhi bya hosi i varhumiwa va rifu,+ kambe munhu wo tlhariha hi loyi a byi sivelaka.+ 15  Ku ni vutomi eku vonakaleni ka xikandza xa hosi,+ naswona vunene bya yona byi fana ni papa ra mpfula ya ximun’wana.+ 16  Ku kuma vutlhari swa antswa swinene ku tlula ku kuma nsuku!+ Naswona ku kuma ku twisisa ku fanele ku hlawuriwa ematshan’weni ya ku kuma silivhere.+ 17  Gondzo lerikulu ra lavo lulama i ku fularhela swo biha.+ Loyi a hlayisaka ndlela yakwe u hlayisa moya-xiviri wakwe.+ 18  Ku tinyungubyisa ku le kusuhi ni ku wa,+ ni moya lowu titlakusaka wu le kusuhi ni ku khunguvanyeka.+ 19  Swa antswa ku va ni moya wo rhula ni swisiwana+ ematshan’weni yo avelana leswi phangiweke ni lava va titlakusaka.+ 20  Loyi a nga ni ku twisisa emhakeni u ta kuma leswinene,+ naswona wa tsaka la tshembaka Yehovha.+ 21  Loyi a tlhariheke embilwini u ta vitaniwa la nga ni ku twisisa,+ naswona loyi a nga ni milomu leyi tsokombelaka u engetela ku khorwiseka.+ 22  Ku twisisa i xihlovo xa vutomi+ eka vini va byona; naswona ndzayo ya swiphukuphuku i vuphukuphuku.+ 23  Mbilu ya lowo tlhariha yi endla leswaku nomu wakwe wu kombisa ku twisisa,+ naswona yi engetela ku khorwiseka emilon’wini yakwe.+ 24  Marito lamanene i xihlenge xa vulombe,+ ma tsokombela eka moya-xiviri naswona ma hanyisa marhambu.+ 25  Ku ni ndlela leyi lulameke emahlweni ka munhu,+ kambe endzhaku ka sweswo makumu ya yona i tindlela ta rifu.+ 26  Moya-xiviri wa munhu la tirhaka hi matimba wu n’wi tirhele hi matimba,+ hikuva nomu wakwe wu n’wi susumete hi matimba.+ 27  Munhu la nga pfuniki nchumu u cela swo biha,+ naswona emilon’wini yakwe, swi fana niloko ku ri ni ndzilo lowu vavulaka.+ 28  Munhu wa mano u hambeta a vanga mholovo,+ naswona mulumbeti u hambanisa lava tolovelaneke.+ 29  Munhu wa madzolonga u ta kanganyisa munhu-kulobye,+ entiyisweni a n’wi fambisa endleleni leyi nga riki yinene.+ 30  U tsopeta mahlo leswaku a boha kungu ra mano.+ A pfala milomu yakwe hi matimba, entiyisweni u hetisisa mano yakwe yo biha. 31  Misisi ya mpunga i harhi ya ku saseka+ loko yi kumeka endleleni ya ku lulama.+ 32  Loyi a hlwelaka ku hlundzuka wa antswa ku ri ni wanuna wa matimba,+ ni loyi a lawulaka moya wakwe ku ri ni loyi a tekaka muti.+ 33  Vuhlolotwana byi hoxiwa exifuveni,+ kambe xiboho xin’wana ni xin’wana xa byona xi huma eka Yehovha.+

Tinhlamuselo ta le hansi