Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Rhuti 3:1-18

3  Nawomi n’wingi wakwe, a ku eka yena: “N’wananga, xana a ndzi fanelanga ndzi ku lavela ndhawu yo wisela+ eka yona, leswaku swi ku fambela kahle?  Xana Bowasi, loyi u nga tirha ni malandza yakwe ya vanhwanyana, a hi xaka ra hina?+ Waswivo! U peperha+ maxalana exivuyeni vusiku bya namuntlha.  U fanele u hlamba, u tola mafurha,+ u vehela minkhancu ya wena,+ u rhelela u ya exivuyeni. U nga titivisi eka wanuna loyi, kukondza a heta ku dya ni ku nwa.  Kutaku loko a etlela, u fanele u xiya ndhawu leyi a etlelaka eka yona; u fanele u fika u n’wi funungula hi le milengeni, u etlela; loko ku ri yena, u ta ku byela leswi u faneleke u swi endla.”  Kutani a ku eka yena: “Ndzi ta endla hinkwaswo leswi u ndzi byelaka swona.”  Hiloko a rhelela a ya exivuyeni, a endla hilaha n’wingi wakwe a n’wi leriseke hakona.  Hi nkarhi wolowo Bowasi a a dya ni ku nwa, mbilu yakwe a yi tsakile.+ Hiloko a famba a ya etlela emakumu ka nhulu ya mavele. Kutani a nyandlamela, a funungula milenge yakwe, a etlela.  Exikarhi ka vusiku, wanuna loyi a chava. Hiloko a korhamela emahlweni, kutani waswivo, wansati a a etlele hi le milengeni yakwe!  Kutani a ku: “Hi wena mani?” Yena a ku: “Hi mina Rhuti hlonga ra wena ra xisati, u fanele u funengeta hlonga ra wena ra xisati hi dziva ra wena, hikuva u mukutsuri.”+ 10  Hiloko yena a ku: “Onge Yehovha a nga ku katekisa,+ n’wananga. Eku heteleleni u kombise musa wa wena wa rirhandzu+ ku antswa ku tlula enkarhini wo sungula,+ hi ku ka u nga yi eka tintangha ta wena ta majaha, lama nga swisiwana kumbe lama fuweke. 11  Sweswi, u nga chavi n’wananga. Hinkwaswo leswi u swi vulaka, ndzi ta ku endlela swona,+ hikuva un’wana ni un’wana la nga enyangweni ya vanhu va mina wa swi lemuka leswaku u wansati lonene ngopfu.+ 12  Hambileswi ku nga ntiyiso leswaku ndzi mukutsuri,+ kambe u kona mukutsuri la nga ekusuhi ngopfu ku ndzi tlula.+ 13  Tshama laha vusiku bya namuntlha, kutani loko o ku kutsula+ nimixo, swi lulamile! A a ku kutsule. Kambe loko a nga swi tsakeli ku ku kutsula, mina ndzi ta ku kutsula, loko ntsena Yehovha a ha hanya.+ Etlela ri kondza ri xa.” 14  A hambeta a etlela hi le milengeni yakwe ri kondza ri xa, a pfuka ku nga si vonakala. Kutani a ku: “U nga byeli munhu leswaku wansati u tile exivuyeni.”+ 15  A ya emahlweni a ku: “Tisa nkhancu lowu u wu ambaleke, kangatela ha wona.” Hiloko a kangatela ha wona, a pima mimpimo ya maxalana ya tsevu, a n’wi rhwexa, endzhaku ka sweswo a nghena emutini. 16  A khoma ndlela a ya eka n’wingi wakwe, loyi a vuleke a ku: “Hi wena mani, n’wananga?” Hiloko a n’wi byela hinkwaswo leswi wanuna loyi a n’wi endleleke swona. 17  A ya emahlweni a ku: “U ndzi nyike mimpimo leyi ya tsevu ya maxalana, hikuva u ndzi byele a ku, ‘U nga fiki u nga khomanga nchumu eka n’wingi wa wena.’”+ 18  Kutani a ku: “Tshamiseka n’wananga, kukondza u vona lomu mhaka leyi yi nga ta helela kona, hikuva wanuna loyi a nge wisi, handle ka loko a hetile hi mhaka leyi namuntlha.”+

Tinhlamuselo ta le hansi