Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Rhuti 1:1-22

1  Emasikwini lawa vaavanyisi+ a va endla vululami ha wona, ku we ndlala+ etikweni, wanuna un’wana a suka eBetlehema+ wa Yuda a ya luvela emasin’wini ya Mowabu,+ yena ni nsati wakwe ni vana vakwe va majaha vambirhi.  Vito ra wanuna loyi a ku ri Elimeleke, vito ra nsati wakwe a ku ri Nawomi, kasi mavito ya vana vakwe vambirhi a ku ri Mahaloni na Khiliyoni, Vaefurata+ lava humaka eBetlehema wa Yuda. Va hetelela va fike etikweni ra Mowabu, va tshama kona.  Hi ku famba ka nkarhi Elimeleke nuna wa Nawomi a fa, yena a sala ni vana vakwe vambirhi.  Endzhaku vavanuna lava va teka vasati, vaxisati va Mowabu.+ Vito ra un’wana a ku ri Orpa, kasi vito ra loyi un’wana a ku ri Rhuti.+ Va tshama kona malembe ya kwalomu ka khume.  Hi ku famba ka nkarhi, havumbirhi bya vona, Mahaloni na Khiliyoni, na vona va fa, kutani wansati loyi a lahlekeriwa hi vana vakwe vambirhi ni nuna wakwe.  Hiloko a suka ni tinhlomi takwe va vuya hi le tikweni ra Mowabu, hikuva u swi twile a ri etikweni ra Mowabu leswaku Yehovha u hundzuluxele nyingiso wakwe eka vanhu+ vakwe hi ku va nyika xinkwa.+  Kutani a suka endhawini leyi a a tshama eka yona,+ tinhlomi takwe hatimbirhi ti ri na yena, va ya emahlweni va famba egondzweni va tlhelela etikweni ra Yuda.  Eku heteleleni Nawomi a byela tinhlomi takwe hatimbirhi, a ku: “Fambani, ha un’we wa n’wina a a tlhelele endlwini ya mana wakwe. Onge Yehovha a nga mi komba musa wa rirhandzu,+ hilaha mi wu kombiseke hakona eka vavanuna lava sweswi va feke, ni le ka mina.+  Onge Yehovha a nga mi nyika nyiko,+ ha un’we a kuma ndhawu yo wisela+ eka yona endlwini ya nuna wakwe.” Kutani a va ntswontswa,+ va sungula ku tlakusa marito ya vona va rila. 10  Va hambeta va ku eka yena: “E-e, hi ta tlhelela na wena eka varikwenu.”+ 11  Kambe Nawomi a ku: “Tlhelani, vana vanga. Ha yini mi fanele mi famba na mina? Xana ndza ha ri ni vana eswirhweni swa mina swa le ndzeni, xana va nga va vanuna va n’wina?+ 12  Tlhelani vana vanga, fambani, hikuva mina ndzi kurile swinene lerova ndzi nga kuma nuna. Loko a ndzi vule leswaku ndzi ni ntshembo nileswaku ndzi ta va ni wanuna vusiku lebyi, kunene ndzi tswala ni vana va majaha,+ 13  xana a mi ta va rindza va kondza va kula? Xana a mi ta tshama mi rindze vona lerova mi nga tekiwi hi vavanuna van’wana? E-e, vana vanga, ndzi twa ku vava ngopfu hikwalaho ka n’wina, leswi voko ra Yehovha ri humeke ku lwa na mina.”+ 14  Hiloko va tlakusa marito ya vona va rila hilaha ku engetelekeke, endzhaku ka sweswo Orpa a ntswontswa n’wingi wakwe. Loko ku ri Rhuti, a n’wi namarhela.+ 15  Hiloko a ku: “Waswivo! Nkati-kuloni la nga noni u tlhelele eka vanhu va ka vona ni le ka swikwembu swakwe.+ Tlhela ni nkati-kuloni la nga noni.”+ 16  Rhuti a ku: “U nga ndzi kombeli leswaku ndzi ku tshika, ndzi tlhela ndzi nga ha fambi na wena; hikuva laha u yaka kona, ndzi ta ya kona, naswona laha u etlelaka kona, ndzi ta etlela kona.+ Vanhu va wena va ta va vanhu va mina,+ Xikwembu xa wena xi ta va Xikwembu xa mina.+ 17  Laha u nga ta fela kona,+ ndzi ta fela kona, kwalaho na mina ndzi ta lahliwa kona. Onge Yehovha a nga ndzi endla tano, a engetela+ eka swona loko ndzo hambana na wena kambe ku nga ri hikwalaho ka rifu.” 18  Loko a vona leswaku a a phikelela malunghana ni ku famba na yena,+ hiloko a tshika ku vulavula na yena. 19  Hiloko havambirhi va ya emahlweni ni ndlela ya vona kukondza va ya fika eBetlehema.+ Kuteloko va fike eBetlehema, muti hinkwawo wu va hlamala swinene,+ vavasati va hambeta va ku: “Xana loyi i Nawomi?”+ 20  Yena a a hlamula vavasati lava a ku: “Mi nga ndzi vitani Nawomi. Ndzi vitaneni Marha, hikuva Lowa Matimba Hinkwawo+ u ndzi endlele swo vava ngopfu.+ 21  A ndzi tele loko ndzi famba,+ kambe Yehovha u ndzi vuyise ndzi nga khomanga nchumu.+ Ha yini ma ha ndzi vitana Nawomi, kasi i Yehovha loyi a ndzi tsongahateke+ ni Lowa Matimba Hinkwawo la ndzi vangeleke khombo?”+ 22  Nawomi a vuya hi ndlela yoleyo, Rhuti lowa Mumowabu, nhlomi yakwe, a a ri na yena loko va vuya ku suka etikweni ra Mowabu;+ va fike eBetlehema+ eku sunguleni ka ntshovelo wa maxalana.+

Tinhlamuselo ta le hansi