Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Mintirho 3:1-26

3  Petro na Yohane a va tlhandlukela etempeleni hi awara ya xikhongelo, ku nga awara+ ya vukaye,  naswona a ku rhwariwe wanuna un’wana loyi a a lamarile ku sukela embelekweni+ wa mana wakwe, kutani siku ni siku a va n’wi veka ekusuhi ni nyangwa ya tempele leyi a yi vuriwa Leyo Saseka,+ leswaku a kombela tinyiko ta tintswalo eka lava nghenaka etempeleni.+  Loko a vona Petro na Yohane va ri ekusuhi ni ku nghena etempeleni a kombela ku nyikiwa tinyiko ta tintswalo.+  Kambe Petro, swin’we na Yohane, va n’wi honolela+ va ku: “Hi langute.”  Hiloko a va langutisisa, a langutela ku kuma swo karhi eka vona.  Hambiswiritano, Petro a ku: “Silivhere ni nsuku a ndzi na swona, kambe leswi ndzi nga na swona ndzi ku nyika+ swona: Hi vito ra Yesu Kreste wa Munazareta,+ famba!”+  Hiloko a n’wi khoma hi voko ra xinene+ a n’wi yimisa. Hi ku hatlisa mikondzo ya milenge yakwe ni marhambu ya mahlakala yakwe swi tiya;+  kutani a tlula,+ a yima a sungula ku famba, a nghena na vona etempeleni,+ a famba, a tlula-tlula a vonga Xikwembu.  Kutani vanhu+ hinkwavo va n’wi vona a famba a vonga Xikwembu. 10  Ku tlula kwalaho, va n’wi lemuka, leswaku a ku ri munhu loyi a a hamba a tshamela tinyiko ta tintswalo eNyangweni leyo Saseka+ ya tempele, kutani va hlamala ngopfu ni ku tshuka+ hi leswi n’wi endlekeleke. 11  Kutani, leswi wanuna loyi a a namarhele Petro na Yohane, vanhu hinkwavo va tsutsumela eka vona laha a ku vuriwa rikupakupa+ ra Solomoni, va hlamale swinene. 12  Loko Petro a vona leswi, a byela vanhu a ku: “Vavanuna va Israyele, ha yini mi hlamarisiwa hi leswi, kumbe ha yini mi hi honolela onge hiloko hi n’wi endle leswaku a famba+ hi matimba ya hina kumbe hi ku tinyiketela loku nga ni vukwembu? 13  Xikwembu xa Abrahama na Isaka na Yakobe,+ Xikwembu xa vatata wa hina, xi vangamise+ Nandza+ wa xona, Yesu, loyi n’wina, hi xiviri, mi n’wi nyiketeke+ ni ku n’wi landzula emahlweni ka Pilato, kasi yena a a bohe ku n’wi ntshunxa.+ 14  Ina, mukwetsimi yoloye, lowo lulama+ mi n’wi landzurile, kambe mi kombele ku nyikiwa mahala wanuna loyi a dlayaka+ hi vomu, 15  kasi mi dlaye Murhangeri Lonkulu wa vutomi.+ Kambe Xikwembu xi n’wi pfuxile eka lava feke, ku nga mhaka leyi hi nga timbhoni ta yona.+ 16  Hikwalaho vito ra yena, hi ripfumelo ra hina evitweni rakwe, ri tiyise wanuna loyi mi n’wi vonaka, loyi mi n’wi tivaka, naswona ripfumelo leri teke hikwalaho ka yena ri nyike wanuna loyi rihanyo leri heleleke emahlweni ka n’wina hinkwenu. 17  Kutani, vamakwerhu, ndza swi tiva leswaku mi endle hi ku pfumala vutivi,+ hilaha vafumi+ va n’wina na vona va endleke hakona. 18  Kambe hi ndlela leyi Xikwembu xi hetisise swilo leswi xi swi tiviseke ka ha ri emahlweni hi nomu wa vaprofeta hinkwavo, leswaku Kreste wa xona a a ta xaniseka.+ 19  “Hikokwalaho, hundzukani+ mi hundzuluka+ leswaku ku hlanguriwa+ swidyoho swa n’wina, leswaku tinguva ta ku phyuphyisiwa+ ti ta ta ti huma eka Yehovha hi xiviri 20  ni leswaku a rhuma Kreste la hlawuleriweke n’wina, Yesu, 21  loyi tilo, hakunene, ri faneleke ri n’wi tamela+ ku fikela eminkarhini ya ku vuyeteriwa+ ka swilo hinkwaswo leswi Xikwembu xi vulavuleke ha swona hi nomu wa vaprofeta+ va xona vo kwetsima va nkarhi wa khale. 22  Entiyisweni, Muxe u te, ‘Yehovha Xikwembu u ta mi yimisela muprofeta+ wo fana na mina exikarhi ka vamakwenu. Mi fanele ku n’wi yingisa hi ku landza swilo hinkwaswo leswi a mi byelaka+ swona. 23  Hakunene, moya-xiviri wun’wana ni wun’wana lowu nga n’wi yingisiki Muprofeta yoloye wu ta lovisiwa hi ku helela evanhwini.’+ 24  Naswona vaprofeta hinkwavo, entiyisweni, ku sukela eka Samuwele ni lava tlhandlameke, hinkwavo lava vulavuleke, na vona va ma vule erivaleni masiku+ lawa. 25  Mi vana+ va vaprofeta ni va ntwanano lowu Xikwembu xi wu endleke ni vatata wa n’wina, xi byela Abrahama xi ku, ‘Naswona mindyangu hinkwayo ya misava yi ta katekisiwa+ hi mbewu ya wena.’ 26  Endzhaku ka ku humesa Nandza wa xona, Xikwembu xi rhange+ hi ku n’wi rhuma eka n’wina leswaku a mi katekisa hi ku susa un’wana ni un’wana eswiendlweni swa n’wina swo homboloka.”

Tinhlamuselo ta le hansi