Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Mintirho 28:1-31

28  Kuteloko hi fika laha ku hlayisekeke, hi kuma leswaku xihlala xexo a xi vuriwa Melita.+  Kutani vanhu lava vulavulaka ririmi rimbe va hi kombe musa lowu nga tolovelekangiki wa vumunhu,+ hikuva va tshivele ndzilo kutani va hi amukela hinkwerhu va hi pfuna hikwalaho ka mpfula leyi a yi na ni hikwalaho ka xirhami.+  Kambe loko Pawulo a hlengelete nyandza yin’wana ya mahlahla, a yi tlhandleka endzilweni, mhiri yi huma hikwalaho ka ku hisa kutani yi titsondzela evokweni rakwe.  Loko vanhu volavo lava vulavulaka ririmi rimbe va vona xivumbiwa xa vuxungu xi lengalenga evokweni rakwe, va sungula ku byelana va ku: “Hakunene loyi i mudlayi, hambileswi a fikeke laha ku hlayisekeke a huma elwandle, vululami byo rihisela a byi n’wi pfumelelanga ku ya emahlweni a hanya.”  Hambiswiritano, a dzudza xivumbiwa xa vuxungu xi wela endzilweni kambe a nga vavisekanga.+  Kambe a va langutela leswaku u ta pfimba hi ndzhumbelo kumbe a wa a fela kwalaho. Endzhaku ko rindza nkarhinyana kutani va nga voni nchumu lowu vavisaka wu endleka eka yena, va hundzula mianakanyo ya vona va sungula ku vula leswaku i xikwembu.+  Kutani ekusuhi ni ndhawu yoleyo nkulukumba wa xihlala xexo, la vuriwaka Publiyo, a a ri ni masimu; naswona u hi amukele hi malwandla kutani a hi rhurhela hi tintswalo masiku manharhu.  Kambe ku kumeke leswaku tata wa Publiyo a a etlele ehansi a karhatiwa hi ku hisa ka miri ni magagana, hiloko Pawulo a ya eka yena kutani a khongela, a n’wi tlhandleka mavoko+ kutani a n’wi horisa.+  Endzhaku ka loko leswi swi humelerile, ni vanhu lavan’wana exihlaleni xexo lava a va ri ni mavabyi va ta eka yena, va hanyisiwa.+ 10  Naswona va hi fundzhe hi tinyiko to tala, kutani loko hi sungula ku tluta, va hi longele swilo leswi a hi swi lava. 11  Hi n’hweti ya vunharhu hi tlute hi xikepe ku suka eAleksandriya+ lexi a xi hete vuxika exihlaleni naswona a xi ri ni mfungho lowu nge “Vana va Zewusi.” 12  Loko hi fika ehlalukweni eSirakusa hi tshame masiku manharhu, 13  ku nga ndhawu leyi hi rhendzelekeke eka yona kutani hi fika eRegiyo. Naswona endzhaku ka siku rero ku pfuke mheho ya le dzongeni kutani hi ya fika ePuteyoli hi siku ra vumbirhi. 14  Hi fike kona hi kuma vamakwerhu kutani hi komberiwa ku tshama na vona nkombo wa masiku; kutani hi ndlela leyi hi kongoma eRhoma. 15  Ku suka kwalaho, loko vamakwerhu va twa mahungu lama khumbanaka na hina, va ta va ta hi hlangaveta eNdhawini ya ku Xavisela ya Apiyo ni le Tihotela Tinharhu, kutani loko a va vona, Pawulo a nkhensa Xikwembu, a tiya nhlana.+ 16  Eku heteleleni, loko hi nghena eRhoma, Pawulo u pfumeleriwe+ ku tshama a ri swakwe ni socha leri a ri n’wi rindza. 17  Hambiswiritano, hi siku ra vunharhu u hlengelete lava a va ri vakulukumba va Vayuda. Loko va hlengeletanile, a va byela a ku: “Vavanuna, vamakwerhu, hambileswi ndzi nga endlangiki nchumu lexi lwisanaka ni vanhu kumbe mikhuva ya vatata wa hina,+ ndzi nyiketiwe ndzi ri mukhotsiwa ku suka eYerusalema emavokweni ya Varhoma.+ 18  Naswona vona, endzhaku ko konanisa,+ a va navela ku ndzi ntshunxa,+ tanihi leswi a ku ri hava xivangelo xa leswaku ndzi fa.+ 19  Kambe loko Vayuda va hambeta va kaneta sweswo, ndzi boheke ku endla xikombelo+ eka Khezari, kambe ku nga ri swona leswaku a ndzi ri ni xo karhi xo hehla tiko ra ka hina ha xona. 20  Hikwalaho, kahle-kahle ndzi kombele ku mi vona ni ku vulavula na n’wina, hikuva ndzi bohiwe hi nketana leyi hikwalaho ka ntshembo+ wa Israyele.”+ 21  Va ku eka yena: “A hi amukelanga mapapila malunghana na wena ku suka eYudiya, hambi ku ri un’wana wa vamakwerhu lava fikeke a nga vikanga kumbe ku vula xilo xo homboloka malunghana na wena. 22  Kambe hi ehleketa leswaku swi fanerile ku twa miehleketo ya wena, hikuva entiyisweni malunghana ni mpambukwa+ lowu ha swi tiva leswaku kun’wana ni kun’wana wa kanetiwa.”+ 23  Hiloko va hlela siku na yena, kutani va ta endhawini leyi a tshamaka eka yona va tele. Kutani a va hlamusela mhaka leyi hi ku nyikela vumbhoni bya rixaladza malunghana ni mfumo wa Xikwembu+ ni hi ku tirhisa timhaka leti khorwisaka malunghana na Yesu hi ku landza nawu wa Muxe+ ni Vaprofeta,+ ku sukela nimixo ku fikela nimadyambu. 24  Van’wana va sungula ku kholwa+ swilo leswi vuriwaka; van’wanyana va nga kholwi.+ 25  Kutani, leswi a va nga pfumelelani, va sungula ku suka va famba, Pawulo a ri karhi a vula marito lawa: “Moya lowo kwetsima wu vule hilaha ku faneleke hi Esaya lowa muprofeta eka vatata wa n’wina, 26  wu ku, ‘Yana eka vanhu lava u ku: “Ku twa, mi ta twa kambe a mi nge twisisi nikatsongo; naswona ku languta mi ta languta kambe a mi nge voni nikatsongo.+ 27  Hikuva timbilu ta vanhu lava ti sihalarile, naswona hi tindleve ta vona va twile va nga anguli, kutani va pfale mahlo ya vona; leswaku va nga tshuki va vona hi mahlo ya vona ni ku twa hi tindleve ta vona ni ku twisisa hi timbilu ta vona va hundzuka, kutani ndzi va horisa.”’+ 28  Hikokwalaho tivani leswaku leyi, ku nga ndlela leyi Xikwembu xi ponisaka ha yona, yi rhumeriwe ematikweni;+ hakunene ma ta yi yingisa.”+ 29  — 30  Hiloko a tshama malembe mambirhi hinkwawo endlwini yakwe leyi a yi hirheke,+ naswona a a va amukela hi musa hinkwavo lava a va ta eka yena, 31  a chumayela hi mfumo wa Xikwembu eka vona ni ku dyondzisa swilo leswi khumbaka Hosi Yesu Kreste hi ntshunxeko lowukulu wo vulavula,+ handle ka xihinga.

Tinhlamuselo ta le hansi