Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Mintirho 27:1-44

27  Kutani leswi a ku endliwe xiboho xa leswaku hi tluta hi ya eItaliya,+ va nyikete Pawulo swin’we ni vakhotsiwa van’wana eka ndhuna ya vuthu leyi vuriwaka Yuliyo ya vuthu ra Awugusto.  Kuteloko hi khandziye xikepe lexi humaka eAdramita lexi a xi ri kusuhi ni ku tlutela etindhawini ta le vugima-lwandle emugangeni wa Asiya, hi sungula ku tluta, hi ri na Aristako+ wa Mukedoniya la humaka eTesalonika.  Kutani hi siku leri tlhandlamaka hi fika eSidoni, kavaloko Yuliyo a khoma Pawulo hi musa wa vumunhu+ naswona a n’wi pfumelela ku ya eka vanakulobye a ya khathaleriwa hi vona.+  Kuteloko hi suka kona hi teka riendzo ra xikepe hi tluta hi le hansi ka xisirhelelo xa Kipra, hikuva timheho a ti hi sivela;  kutani hi tluta elwandle leri pfulekeke etlhelo ka Kilikiya na Pamfiliya, hi fika ehlalukweni le Mira eLikiya.  Kambe kona ndhuna ya vuthu yi kume xikepe lexi humaka eAleksandriya+ lexi a xi tlutela eItaliya, hiloko yi hi khandziyisa xona.  Endzhaku ko tluta hi ku nonoka masiku yo hlaya swinene hi ya fika eKinida hi ku nonon’hweriwa, hikuva mheho a yi nga hi pfumeleli ku ya emahlweni, hi tlute ehansi ka xisirhelelo xa Kreta eSalmona,  kuteloko hi ri karhi hi lulama ni ribuwa hi ku nonon’hweriwa hi fika endhawini yin’wana leyi vuriwaka Hlaluko ro Saseka, ekusuhi na yona a ku ri ni muti wa Lasiya.  Leswi a ku hundze nkarhi wo leha naswona hi nkarhi lowu se a swi ri ni khombo ku tluta hikuva hambi ku titsona swakudya [ka siku ro kombela ku rivaleriwa+] se a ku hundzile, Pawulo a nyikela xitsundzuxo, 10  a ku eka vona: “Vavanuna, ndzi xiya leswaku ku tluta swi ta vanga ku onhakeriwa ni ku lahlekeriwa lokukulu ku nga ri ka ndzhwalo ni xikepe ntsena, kambe ni ka mimoya-xiviri+ ya hina.” 11  Hambiswiritano, ndhuna ya vuthu yi yingisa mutlutisi ni n’wini wa xikepe ematshan’weni ya leswi vuriweke hi Pawulo. 12  Kutani leswi hlaluko a ri nga swi fanelekeli ku heta vuxika eka rona, vunyingi byi tsundzuxa leswaku ku tlutiwa ku sukiwa kwalaho, ku vona loko hi ndlela yo karhi va ta swi kota ku fika eFenikisi va heta vuxika kona, ehlalukweni ra Kreta leri pfulekelaka en’walungu-vuxa ni le dzonga-vuxa. 13  Ku tlula kwalaho, loko mheho ya le dzongeni yi hunga khwatsi, a va ehleketa leswaku va xi fikelerile xikongomelo xa vona, hiloko va koka nsoma kutani va sungula ku lulama ni ribuwa etlhelo ka Kreta. 14  Hambiswiritano, endzhaku ka nkarhi wo koma, mheho+ ya xidzedze leyi vuriwaka Yurakuloni yi xi ba hi matimba. 15  Leswi xikepe a xi biwa hi ntamu naswona xi nga swi koti ku langutana ni mheho, hi tinyiketa kutani yi hi susumeta. 16  Hiloko hi tluta hi le hansi ka xisirhelelo xa xihlala xin’wana lexitsongo lexi vuriwaka Kawuda, kambe, a hi nga swi koti nikatsongo ku fikelela xikwekwetsu+ encileni. 17  Kambe endzhaku ka ku xi tlakusela exikepeni va sungula ku tirhisa swipfuneto leswaku va boha xikepe hi le hansi; naswona hi ku chava ku nkhisa esaveni eSiriti, va debyisa mapindza xisweswo yi va susumeta. 18  Kambe hikwalaho ka leswi a hi pepetsekisiwa hi matimba hi xidzedze, siku leri landzelaka va sungula ku vevukisa+ xikepe; 19  kutani hi siku ra vunharhu, va cukumeta mapindza ya xikepe hi mavoko. 20  Kuteloko dyambu kumbe tinyeleti swi nga humeleli masiku yo tala, naswona xidzedze+ lexikulu xi ri ehenhla ka hina, ntshembo hinkwawo wa ku ponisiwa ka hina eku heteleleni wu hela. 21  Naswona loko ku ve ni ku titsona swakudya nkarhi wo leha, Pawulo a suka a yima exikarhi+ ka vona a ku: “Vavanuna, hakunene a mi fanele mi amukele xitsundzuxo xa mina, mi nga ri tekanga riendzo ra xikepe ku suka eKreta kutani mi weriwa hi ku onhakeriwa loku ni ku lahlekeriwa.+ 22  Kambe, sweswi ndzi mi tsundzuxa leswaku mi va ni ku khana lokukulu, hikuva ku hava moya-xiviri wa n’wina lowu nga ta lahleka, ku ta lahleka xikepe ntsena. 23  Hikuva evusikwini lebyi ekusuhi na mina ku yime ntsumi+ ya Xikwembu lexi ndzi nga wa xona ni lexi ndzi xi endlelaka ntirho wo kwetsima,+ 24  yi ku, ‘U nga chavi, Pawulo. U fanele ku yima emahlweni ka Khezari,+ kutani waswivo, Xikwembu xi ku nyike hinkwavo lava tlutaka na wena mahala.’ 25  Hikokwalaho vanani ni ku khana lokukulu, vavanuna; hikuva ndza xi kholwa Xikwembu+ leswaku swi ta va hilaha ndzi byeriweke hakona. 26  Hambiswiritano, hi fanele ku cukumeteriwa eribuweni eka xihlala+ xin’wana.” 27  Kuteloko ku fika vusiku bya vu-14, hi ri karhi hi ndlengandlengisiwa hi ya hala ni hala elwandle ra Adriya, exikarhi ka vusiku vatluti va sungula ku ehleketa leswaku a va tshinela eribuweni. 28  Hiloko va pima vuenti kutani va kuma ku ri tifatomo ta 20; kavaloko va ya emahlweni mpfhuka wo koma va tlhela va pima kutani va kuma ku ri tifatomo ta 15. 29  Kutani hi ku chava leswaku hi nga ha cukumeteriwa kun’wana emaribyeni, va hoxa tinsoma ta mune hi le ncileni wa xikepe ivi va navela onge ri nga xa. 30  Kambe loko vatluti va sungula ku lava ku baleka exikepeni naswona va nembeleta xikwekwetsu elwandle va endla onge va kunguhata ku ehlisa tinsoma exifuveni xa xikepe, 31  Pawulo a byela ndhuna ya vuthu ni masocha a ku: “Loko vavanuna lava va nga tshami exikepeni, a mi nge poni.”+ 32  Hiloko masocha ma tsema mapindza ya xikwekwetsu+ kutani ma xi tshika xi wa. 33  Kuteloko ri lava ku xa, Pawulo a sungula ku va khutaza hinkwavo leswaku va dya, a ku: “Namuntlha i siku ra vu-14 mi rindzile, kutani mi hambete mi titsona swakudya, hikuva a mi dyanga nchumu. 34  Hikokwalaho ndzi mi khutaza leswaku mi dya, leswi swi endleriwa leswaku mi hlayiseka; hikuva ku hava nsisi+ ni wun’we wa nhloko ya un’wana wa n’wina lowu nga ta lova.” 35  Loko a vule leswi, na yena a teka xinkwa, a nkhensa+ Xikwembu emahlweni ka vona hinkwavo kutani a xi phema a sungula ku dya. 36  Hiloko hinkwavo va khana kutani va dya. 37  Kutani, hinkwerhu ka hina, mimoya-xiviri leyi a yi ri exikepeni a hi ri 276. 38  Loko va xurhe, va sungula ku vevukisa+ xikepe hi ku lahlela koroni ehandle ka xikepe elwandle. 39  Eku heteleleni loko ri xile, a va nga yi lemuki ndhawu yoleyo kambe a va vona nsonga wun’wana lowu nga ni ribuwa, kutani a va tiyimiserile ku xi yisa+ kona xikepe, loko va swi kota. 40  Kutani, va tsema tinsoma, va ti tshika ti wela elwandle, hi nkarhi lowu fanaka va ntshunxa tingoti ta swihundzulo leswitsongo, endzhaku ko tlakusela tsanga ra le mahlweni emhehweni, va kongoma eribuweni. 41  Kuteloko va gomula ndhundhuma ya sava leyi biwaka hi lwandle matlhelo hinkwawo, va nkhisa esaveni hi xikepe kutani xifuva xa xikepe xi khwekela xi tshama xi nga tsekatseki, kambe ncila wu sungula ku tshoveka hi matimba wu va swipetlu.+ 42  Hiloko masocha ma tiyimisela ku dlaya vakhotsiwa, leswaku ku nga vi na munhu la hlambelaka, a baleka. 43  Kambe ndhuna ya vuthu a yi navela ku ponisa Pawulo kutani yi va sivela eka xikongomelo xa vona. Hiloko yi lerisa lava kotaka ku hlambela leswaku va tihoxa endzeni ka lwandle va rhanga va ya fika eribuweni, 44  ni lavan’wana leswaku va endla tano, van’wana va khandziya mapulanga kasi van’wana va khandziya swilo swin’wana leswi a swi ri exikepeni. Xisweswo hinkwavo va fika eribuweni+ va hlayisekile.

Tinhlamuselo ta le hansi