Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Mintirho 26:1-32

26  Agripa+ a ku eka Pawulo: “U pfumeleriwile ku tivulavulela.” Hiloko Pawulo a tshambuluta+ voko rakwe a tihlamulela+ a ku:  “Malunghana ni swilo hinkwaswo leswi ndzi hehliwaka+ ha swona hi Vayuda, Hosi Agripa, ndzi tihlaya la tsakeke leswi ndzi tihlamulelaka emahlweni ka wena namuntlha,  ngopfu-ngopfu leswi u yi tivaka khwatsi mikhuva+ hinkwayo swin’we ni minjhekanjhekisano leyi nga kona exikarhi ka Vayuda. Hikokwalaho ndzi kombela leswaku u ndzi yingisa hi ku lehisa mbilu.  “Hakunene, malunghana ni mukhuva wa vutomi+ lebyi ndzi byi hanyeke ku sukela eku sunguleni evuntshweni bya mina exikarhi ka tiko ra rikwerhu ni le Yerusalema, Vayuda hinkwavo  lava a va ndzi toloverile ku sukela eku sunguleni va swi tiva, loko va navela ku nyikela vumbhoni, leswaku hi ku ya hi mpambukwa+ wa rilondzo leri tlurisaka, wa muxaka wa hina wa vugandzeri a ndzi hanya ndzi ri Mufarisi.+  Kasi sweswi hikwalaho ka ntshembo+ wa xitshembiso+ lexi endliweke hi Xikwembu eka vatata wa hina ndzi vitaneriwa ku avanyisiwa;  kasi tinyimba ta hina ta 12 ti ni ntshembo wo fikelela ku hetiseka ka xitshembiso lexi, hi ku xi endlela ntirho wo kwetsima hi vuenti vusiku ni nhlikanhi.+ Vayuda va ndzi hehla+ malunghana ni ntshembo lowu, Wena hosi.  “Ha yini mi swi teka swi nga khorwisi eka n’wina leswaku Xikwembu xi pfuxa lava feke?+  Hi xikombiso, mina kahle-kahle a ndzi ehleketa leswaku ndzi fanele ku endla swiendlo swo tala swo lwisana ni vito ra Yesu wa Munazareta; 10  leswi, entiyisweni, ndzi swi endleke eYerusalema, naswona vakwetsimi vo tala ndzi va pfalerile emakhotsweni,+ tanihi leswi ndzi kumeke mfanelo eka vaprista lavakulu;+ kutani loko va lava ku dlayiwa, ndzi hlawule ku ka ndzi nga yimi na vona. 11  Hi ku va xupula minkarhi yo tala emasinagogeni+ hinkwawo a ndzi ringeta ku va sindzisa ku landzula vupfumeri bya vona; leswi a ndzi va hlundzukele ngopfu, ndzi kale ndzi va xanisa hambi ehandle ka miti. 12  “Loko ndzi ri karhi ndzi endla matshalatshala lawa naswona ndzi ya eDamaska+ hi mfanelo ni mpfumelelo lowu humaka eka vaprista lavakulu, 13  Wena hosi, ninhlikanhi egondzweni ndzi vone ku vonakala loku tlulaka ku vangama ka dyambu loku humaka etilweni ku tlhava ematlhelweni ka mina ni le matlhelweni ka lava a va famba na mina.+ 14  Kuteloko hinkwerhu hi wele ehansi, ndzi twe rito ri ndzi byela hi ririmi ra Xiheveru ri ku, ‘Sawulo, Sawulo, u ndzi xanisela yini? Ku tshamela ku raha tinsungunu swi nonon’hwisela wena.’+ 15  Kambe ndzi te, ‘Hi wena mani, Hosi?’ Kutani Hosi yi ku, ‘Hi mina Yesu loyi u n’wi xanisaka.+ 16  Nilokoswiritano, pfuka u yima hi milenge.+ Hikuva hikwalaho ka leswi ndzi tivonakarisile eka wena leswaku ndzi ku hlawula u va mulanguteri ni mbhoni+ ya swilo leswi u swi voneke ni swilo leswi ndzi nga ta endla leswaku u swi vona malunghana na mina; 17  ndzi ku kutsula eka vanhu lava ni le matikweni lawa ndzi ku rhumaka eka wona,+ 18  leswaku u pfula mahlo ya vona,+ u va susa emunyameni+ va ya eku vonakaleni+ ni le ka vulawuri bya Sathana+ va ya eka bya Xikwembu, leswaku va amukela ndzivalelo wa swidyoho+ ni ndzhaka+ exikarhi ka lava kwetsimisiwaka+ hi ripfumelo ra vona eka mina.’ 19  “Hikwalaho, Hosi Agripa, a ndzi alanga ku yingisa xivono+ xa le tilweni, 20  kambe ku sungula eka lava nga eDamaska+ ni le ka lava nga eYerusalema,+ kutani u hundzela eYudiya hinkwaro, ni le matikweni+ ndzi yise rungula ra leswaku va fanele va hundzuka kutani va tlhelela eka Xikwembu hi ku endla mintirho leyi fambelanaka ni ku hundzuka.+ 21  Hikwalaho ka swilo leswi Vayuda va ndzi khomile etempeleni, va ringeta ku ndzi dlaya.+ 22  Hambiswiritano, hikwalaho ka leswi ndzi kumeke mpfuno+ lowu humaka eka Xikwembu ndzi ya emahlweni ku fikela namuntlha ndzi nyikela vumbhoni eka lavatsongo swin’we ni le ka lavakulu, kambe a ndzi vuli swin’wana handle ka swilo leswi Vaprofeta+ swin’we na Muxe+ va vuleke leswaku swi ta endleka, 23  leswaku Kreste a a ta xaniseka,+ naswona leswi a nga wo sungula ku pfuxiwa+ eka lava feke, a a ta twarisa ku vonakala+ eka vanhu lava ni le matikweni.”+ 24  Kuteloko a ha vula swilo leswi a tihlamulela, Festo a vula hi rito lerikulu a ku: “Wa penga,+ Pawulo! Ku dyondza ngopfu swa ku pengisa!” 25  Kambe Pawulo a ku: “A ndzi pengi, Muchaviseki Festo, kambe ndzi vulavula marito ya ntiyiso ni ya mianakanyo yo hluteka. 26  Hakunene, hosi leyi ndzi vulavulaka na yona hi ntshunxeko wo vulavula yi swi tiva kahle swilo leswi; hikuva ndza khorwiseka leswaku ku hava ni xin’we xa swilo leswi lexi xi yi kohlaka, hikuva xilo lexi a xi endliwanga exihundleni.+ 27  Xana wena, Hosi Agripa, wa va kholwa Vaprofeta? Ndza swi tiva leswaku wa kholwa.”+ 28  Kambe Agripa a ku eka Pawulo: “Hi nkarhi wo koma a wu ta ndzi kucetela leswaku ndzi va Mukreste.” 29  Hiloko Pawulo a ku: “Ndzi nga navela eka Xikwembu ku nga khathariseki leswaku hi nkarhi wo koma kumbe hi nkarhi wo leha leswaku ku nga vi wena ntsena kambe ni hinkwavo lava va ndzi twaka namuntlha va kotisa mina, handle ka timpecana leti.” 30  Hiloko hosi yi tlakuka kutani swi va tano ni hi ndhuna-nkulu na Bernike ni vavanuna lava a va tshame na vona. 31  Kambe loko va suka, va sungula ku vulavurisana, va ku: “Munhu loyi a nga endli nchumu lexi lulameriwaka hi rifu+ kumbe timpecana.” 32  Ku tlula kwalaho, Agripa a byela Festo a ku: “Munhu loyi a a ta va a ntshunxiwile loko a a nga endlanga xikombelo+ eka Khezari.”

Tinhlamuselo ta le hansi