Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Mintirho 25:1-27

25  Hikokwalaho Festo, loko a nghenile+ eka hulumendhe ya xifundzha, endzhaku ka masiku manharhu u tlhandluke a ya eYerusalema ku suka eKhezariya;+  naswona vaprista lavakulu ni vakulukumba va Vayuda va n’wi nyike rungula+ leri solaka Pawulo. Hiloko va sungula ku n’wi kombela,  va kombela leswaku a va tsakisa hi ndlela leyi nga ta hoxa wanuna loyi ekhombyeni hi ku n’wi vitana a ta eYerusalema, tanihi leswi a va lava ku n’wi tumbelela+ va n’wi dlaya egondzweni.  Hambiswiritano, Festo a hlamula leswaku Pawulo a a ta hlayisiwa eKhezariya ni leswaku yena a a ri kusuhi ni ku ya kona.  A ku: “Hikwalaho lava lawulaka exikarhi ka n’wina a va rhelele na mina kutani va n’wi hehla,+ loko ku ri ni lexi humeke endleleni hi wanuna loyi.”  Kuteloko a hete masiku lama nga tluliki eka nhungu kumbe khume exikarhi ka vona, a rhelela a ya eKhezariya, kutani hi siku leri tlhandlamaka a tshama exitshan’weni xa vuavanyisi+ a lerisa leswaku ku tisiwa Pawulo.  Loko a fika, Vayuda lava a va huma eYerusalema va yima va n’wi rhendzela, va n’wi hehla hi swihehlo+ swo tala leswikulu leswi a va nga swi koti ku kombisa vumbhoni bya swona.  Kambe Pawulo a tihlamulela a ku: “A ndzi endlanga xidyoho+ ehenhla ka Nawu wa Vayuda kumbe ehenhla ka tempele+ kumbe ehenhla ka Khezari.”  Festo, hi ku navela ku tsakeriwa+ hi Vayuda, a angula Pawulo a ku: “Xana a wu swi naveli ku ya eYerusalema kutani u avanyisiwa kona emahlweni ka mina malunghana ni swilo leswi?”+ 10  Kambe Pawulo a ku: “Ndzi yime emahlweni ka xitshamo xa Khezari+ xa vuavanyisi, laha ndzi faneleke ku avanyisiwa kona. A ndzi endlanga leswi hoxeke eka Vayuda,+ hilaha na wena u swi kumisisaka kahle hakona. 11  Loko, hi hala tlhelo, ndzi ri la hoxisaka+ niloko kunene ndzi endle leswi lulameriwaka hi rifu,+ a ndzi ali ku fa; loko, hi tlhelo lerin’wana, xi nga ri kona ni xin’we xa swilo leswi vanhu lava va ndzi hehlaka ha swona, a ku na munhu loyi a nga ndzi yisaka eka vona ku va tsakisa. Ndzi endla xikombelo eka Khezari!”+ 12  Kutani Festo, endzhaku ko vulavula ni huvo ya vatsundzuxi, a angula a ku: “U endle xikombelo eka Khezari; u ta ya eka Khezari.” 13  Kuteloko ku hundze masikunyana, Agripa lowa hosi na Bernike va fika eKhezariya va ri eriendzweni ra xichavo eka Festo. 14  Kutani, loko va tshame masiku yo hlaya kona, Festo a byela hosi timhaka leti khumbaka Pawulo, a ku: “Ku ni wanuna un’wana la siyiweke a ri mukhotsiwa hi Felikisi, 15  naswona loko ndzi ri eYerusalema vaprista lavakulu ni vakulukumba va Vayuda va tise rungula+ malunghana na yena, va kombela vuavanyisi bya ku n’wi cukumeta. 16  Kambe ndzi va angula hi ku vula leswaku a hi endlelo ra Varhoma ku nyiketa munhu hi xikongomelo xo tsakisa van’wana loko munhu loyi a hehliwaka a nga si hlangana ni vahehli+ vakwe a va langutile na vona va n’wi langutile, kutani a kuma nkarhi wo tihlamulela malunghana ni xirilo xa kona. 17  Hikokwalaho loko va hlangane swin’we laha, a ndzi hlwelanga, kambe hi siku leri tlhandlamaka ndzi tshame exitshan’weni xa vuavanyisi kutani ndzi lerisa leswaku wanuna loyi a tisiwa. 18  Loko va suka va yima, vahehli a va xi humesanga xihehlo+ xa swilo swo homboloka leswi a ndzi swi ehleketa ha yena. 19  Va kanetane na yena ntsena malunghana ni ndlela leyi a va gandzela ha yona xikwembu+ ni malunghana na Yesu loyi a ku vuriwa leswaku a a file kambe Pawulo a a hamba a sindzisa leswaku wa hanya.+ 20  Kutani hi ku pfilunganyiwa hi ku kanetana malunghana ni timhaka leti, ndzi vutisile loko a swi tsakela ku ya eYerusalema kutani a avanyisiwa kona malunghana ni timhaka+ leti. 21  Kambe loko Pawulo a endla xikombelo+ xa leswaku a hlayisiwa kukondza xiboho xi endliwa hi Muchaviseki, ndzi lerise leswaku a hlayisiwa ku fikela loko ndzi n’wi rhumela eka Khezari.” 22  Hiloko Agripa a byela Festo a ku: “Na mina ndzi nga swi rhandza ku twa munhu loyi.”+ A ku: “Mundzuku, u ta n’wi twa.” 23  Hikokwalaho, hi siku leri tlhandlamaka, Agripa na Bernike va ta hi ku tinyungubyisa+ lokukulu kutani va nghena endhawini ya vayingiseri ni tindhuna ta nyimpi swin’we ni vavanuna lava tlakukeke emutini, kuteloko Festo a nyike xileriso, Pawulo a tisiwa. 24  Kutani Festo a ku: “Hosi Agripa na n’wina hinkwenu vavanuna lava nga kona swin’we na hina, ma n’wi vona wanuna loyi, loyi vunyingi hinkwabyo bya Vayuda byi endleke xirilo ha yena eka mina eYerusalema ni laha, byi huwelela leswaku a nga fanelanga ku ya emahlweni a hanya.+ 25  Kambe ndzi xiye leswaku a nga endlanga nchumu lexi lulameriwaka hi rifu.+ Loko munhu loyi a endla xikombelo+ eka Muchaviseki, ndzi bohe ku n’wi yisa eka yena. 26  Kambe malunghana na yena a ndzi na nchumu lexi tiyeke lexi ndzi nga xi tsalelaka Hosi ya mina. Hikokwalaho ndzi n’wi tise emahlweni ka n’wina, ngopfu-ngopfu emahlweni ka wena, Hosi Agripa, leswaku, endzhaku ka loko ku endliwe+ nkonaniso wa vuavanyisi, ndzi kuma xo xi tsala. 27  Hikuva swi vonaka swi nga twali eka mina ku rhuma mukhotsiwa kambe ndzi nga kombisi leswi a hehliwaka hi swona.”

Tinhlamuselo ta le hansi