Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Mintirho 19:1-41

19  Eka swiendlakalo sweswo, loko Apolosi+ a ri eKorinto, Pawulo a tsemakanya etindhawini ta le xikarhi ka tiko, a rhelela a ya aEfesa,+ kutani a kuma vadyondzisiwa van’wana;  hiloko a ku eka vona: “Xana mi wu amukerile moya lowo kwetsima+ loko mi va vapfumeri?” Va ku eka yena: “Phela, a hi si tshama hi swi twa ni leswaku ku ni moya lowo kwetsima.”+  Hiloko a ku: “Kutani, xana mi khuvuriwe hi yini?” Va ku: “Hi nkhuvulo+ wa Yohane.”  Pawulo a ku: “Yohane u khuvule hi nkhuvulo lowu yimelaka ku hundzuka,+ a byela vanhu leswaku va pfumela eka loyi a taka endzhaku+ ka yena, hileswaku, eka Yesu.”  Loko va twa sweswo, va khuvuriwa hi vito ra Hosi Yesu.+  Kuteloko Pawulo a va tlhandleke mavoko,+ moya lowo kwetsima wu ta ehenhla ka vona, kutani va sungula ku vulavula hi tindzimi ni ku profeta.+  Hinkwavo ka vona a va ri vavanuna va kwalomu ka 12.  Loko a nghena esinagogeni,+ a vulavula hi vurhena ku ringana tin’hweti tinharhu, a nyikela tinkulumo a tlhela a tirhisa timhaka leti khorwisaka malunghana ni mfumo+ wa Xikwembu.  Kambe loko van’wana va tinonon’hwisa va nga pfumeli,+ va vulavula ku biha malunghana ni Ndlela+ emahlweni ka vunyingi, a va sukela+ kutani a teka vadyondzisiwa va hambana na vona,+ siku ni siku a nyikela tinkulumo eholweni ya xikolo xa Tirano. 10  Leswi swi endleke tano ku ringana malembe mambirhi,+ lerova hinkwavo lava tshamaka emugangeni wa Asiya+ va twe rito ra Hosi, Vayuda swin’we ni Magriki. 11  Kutani Xikwembu xi ya emahlweni xi endla mintirho leyi nga tolovelekangiki ya matimba hi mavoko ya Pawulo,+ 12  lerova a ku tekiwa malapi ni mafasikoti emirini wakwe swi yisiwa eka vanhu+ lava vabyaka, kutani swifo swi va sukela, ni mimoya yo homboloka yi huma.+ 13  Kambe van’wana va Vayuda lava yingayingaka lava a va tolovele ku hlongola madimona+ na vona va ringeta ku vitana vito ra Hosi Yesu+ ehenhla ka lava nga ni mimoya yo homboloka, va ku: “Ndza mi lerisa+ swinene-nene hi Yesu loyi Pawulo a chumayelaka ha yena.” 14  Kutani a ku ri ni vana va nkombo va majaha va loyi va nge i Skevha, muprista lonkulu wa Muyuda, va endla sweswo. 15  Kambe moya wo homboloka wu va hlamula wu ku: “Yesu+ ndza n’wi tiva naswona Pawulo+ ndzi n’wi toloverile; kambe mi vamani n’wina?” 16  Hiloko munhu loyi a a ri ni moya wo homboloka a va tlulela,+ a va pfinya ehansi ha un’we-un’we, kutani a va hlula, lerova va baleka va huma endlwini yoleyo va nga ambalanga, va vavisekile. 17  Leswi swi tiveka eka hinkwavo, Vayuda ni Magriki lawa a ma tshama aEfesa; kutani hinkwavo va fikeriwa hi ku chava,+ vito ra Hosi Yesu ri ya emahlweni ri twarisiwa.+ 18  Kutani vo tala va lava va veke vapfumeri va ta, va vula+ ni ku vika mikhuva ya vona erivaleni. 19  Hakunene, vo hlaya swinene lava a va hanya hi masalamusi+ va hlengeleta tibuku ta vona kutani va ti hisa emahlweni ka vanhu hinkwavo. Kutani va hlayela nxavo wa tona, va kuma ti ringana swiphemu swa silivhere swa 50 000. 20  Xisweswo rito ra Yehovha ri ya ri engeteleka ni ku hlula hi matimba.+ 21  Kuteloko swilo leswi swi herile, Pawulo a tiyimisela emoyeni wakwe leswaku, loko a hundze eMakedoniya+ ni le Akaya, u ta ya eYerusalema,+ a ku: “Loko ndzi fika kona ndzi fanele ku ya vona ni le Rhoma.”+ 22  Kutani a rhuma vambirhi va lava a va n’wi tirhela eMakedoniya, Timotiya+ na Erasto,+ kambe yena a hlwela nkarhinyana emugangeni wa Asiya. 23  Enkarhini wolowo ku pfuke mpfilumpfilu+ lowukulu malunghana ni Ndlela.+ 24  Hikuva wanuna un’wana la vuriwaka Demetriyo, mufuri wa silivhere, hi ku endla tindhumbha ta silivhere ta Artemi u tisele lava tivaka ntirho wa mavoko mpindzulo lowukulu ngopfu;+ 25  hiloko a va hlengeleta swin’we ni lava a va tirha eka swilo swo tano+ a ku: “Vavanuna, mi swi tiva kahle leswaku hi kuma rifuwo+ ra hina entirhweni lowu. 26  Naswona, ma swi vona ni ku swi twa hilaha Pawulo a khorwiseke ntshungu lowukulu hakona kutani a wu hambukisela eka mavonelo man’wana, a vula leswaku leswi endliweke hi mavoko+ a hi swikwembu, ku nga ri aEfesa+ ntsena kambe ni le ndhawini leyikulu ya muganga wa Asiya. 27  Ku tlula kwalaho, khombo ri kona ku nga ri ntsena ra leswaku ntirho lowu wa hina wu ta heleriwa hi ndhuma kambe ni ra leswaku tempele ya xikwembu-kati lexikulu Artemi+ yi ta langutiwa yi nga ri nchumu hambi ku ri vukulukumba bya xona lebyi muganga hinkwawo wa Asiya ni misava leyi akiweke yi byi gandzelaka byi le kusuhi ni ku herisiwa.” 28  Loko va twa sweswo, va hlundzuka ngopfu, vanhu va huwelela, va ku: “Artemi wa Vaefesa u nkulu!” 29  Hiloko muti wu tala hasahasa, kutani hi mianakanyo yin’we va tsutsumela endlwini ya mintlango, va famba na Gayo na Aristako+ hi nkani, vanhu va le Makedoniya, lava va nga vaendzi-kulobye va Pawulo. 30  Loko ku ri Pawulo a a swi lava ku nghena endzeni laha vanhu a va ri kona, kambe vadyondzisiwa a va nga n’wi pfumeleli. 31  Hambi ku ri valawuri van’wana va minkhuvo ni mintlango, lava a va ri ni xinakulobye eka yena, va rhumela vanhu eka yena, va kombela leswaku a nga tinghenisi ekhombyeni hi ku ya endlwini ya mintlango. 32  Mhaka hileswaku, van’wana a va huwelela leswi kasi van’wanyana a va huwelela swin’wana;+ hikuva nhlengeletano a yi pfilunganyekile, naswona vunyingi bya vona a byi nga xi tivi xivangelo xa ku hlengeletana ka vona. 33  Kutani va humesa Alekzanda entshungwini, Vayuda va n’wi dlidlimbetela emahlweni; hiloko Alekzanda a koweta hi voko rakwe naswona a lava ku tihlamulela evanhwini. 34  Kambe loko va xiya leswaku a a ri Muyuda, hinkwavo va huwelela hi rito rin’we kwalomu ka tiawara timbirhi: “Artemi wa Vaefesa u nkulu!”+ 35  Eku heteleleni, loko mulanguteri wa muti a miyete+ ntshungu, u te: “Vanhu va Efesa, kunene i mani exikarhi ka vanhu loyi a nga swi tiviki leswaku muti wa Vaefesa i muhlayisi wa tempele ya Artemi lonkulu ni wa xifaniso lexi weke xi huma etilweni? 36  Hikokwalaho leswi swilo leswi swi nga kanetekiki, swa fanela leswaku mi tshama mi rhula, mi nga endli hi ku jaha.+ 37  Hikuva n’wina mi tise vavanuna lava lava nga riki swigevenga etitempeleni kumbe vasandzi va xikwembu-kati xa hina. 38  Hikokwalaho loko Demetriyo+ ni lava tivaka ntirho wa mavoko lava nga na yena va ri ni mhaka ehenhla ka un’wana, masiku ya huvo+ ma kona naswona tihosana ti kona;+ a va hehlane. 39  Kambe, loko mi lavisisa leswi tlulaka sweswo, swi fanele ku bohiwa enhlengeletanweni leyi tolovelekeke. 40  Hikuva hakunene hi le khombyeni ra ku hehliwa hi ku pfukela mfumo emhakeni ya namuntlha, ku hava nchumu ni wun’we lowu nga ta hi pfumelela ku nyika xivangelo xa ntshungu lowu wa vapfukeri lava nga hlelekangiki.” 41  Kuteloko a vule swilo+ leswi, a hangalasa nhlengeletano.+

Tinhlamuselo ta le hansi