Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Mintirho 14:1-28

14  Kuteloko va ri eIkoniya+ va nghena swin’we esinagogeni+ ya Vayuda kutani va vulavula lerova vunyingi lebyikulu bya Vayuda swin’we ni Magriki+ byi va vapfumeri.  Kambe Vayuda lava nga pfumelangiki va kucetela+ ni ku hlohlotela hi ndlela leyi hoxeke mimoya-xiviri ya vanhu va matiko leswaku va lwisana ni vamakwavo.+  Hikokwalaho va heta nkarhi wo leha va vulavula hi vurhena hi vulawuri bya Yehovha, loyi a nyikeleke vumbhoni malunghana ni rito ra musa wakwe lowu nga faneriwiki hi ku pfumelela masingita ni swihlamariso swi humelela hi mavoko+ ya vona.  Hambiswiritano, vunyingi bya muti byi avana, naswona van’wana a va yima ni Vayuda kambe van’wanyana a va yima ni vaapostola.  Kuteloko ku pfuka hasahasa yo chavisa eka vanhu va matiko ni Vayuda swin’we ni vafumi va vona, leswaku va va rhukana ni ku va khandla hi maribye,+  loko vona va tivisiwile ha swona, va balekela+ emitini ya Likawoniya, eListra ni le Derbe ni le matlhelweni ya tiko;  kutani va ma vula kwalaho mahungu lamanene.+  EListra a ku tshama wanuna un’wana loyi a a lamale milenge, a a ri xigono ku sukela embelekweni+ wa mana wakwe, naswona a a nga si tshama a famba nikatsongo.  Wanuna loyi a a yingisa Pawulo a vulavula, kuteloko a n’wi languta swinene a tlhela a vona leswaku a a ri ni ripfumelo+ ra leswaku u ta hanyisiwa, 10  a vulavula hi rito lerikulu a ku: “Yima u ololoka hi milenge ya wena.” Hiloko a tlula a sungula ku famba.+ 11  Kutani mintshungu, hi ku vona leswi Pawulo a swi endleke, yi tlakusa marito ya yona, yi vula hi ririmi ra Valikawoniya yi ku: “Swikwembu+ se swi fana ni vanhu naswona swi xikele eka hina!” 12  Hiloko va vitana Barnaba va ku i Zewusi, kambe Pawulo va ku i Hermesi, hikuva hi yena loyi a a rhangela eku vulavuleni. 13  Muprista wa Zewusi, loyi tempele yakwe a yi ri emahlweni ka muti, a tisa tinkunzi ni tiharhi to saseka etinyangweni naswona a a navela ku endla switlhavelo+ a ri ni mintshungu. 14  Hambiswiritano, loko muapostola Barnaba na Pawulo va swi twa, va handzula tinguvu ta vona ta le handle kutani va tlulela entshungwini, va huwelela 15  va ku: “Vavanuna, xana mi swi endlela yini swilo leswi? Na hina hi vanhu+ lava nga ni vulema+ lebyi fanaka ni bya n’wina, naswona hi vula mahungu lamanene eka n’wina, leswaku mi hundzuka eka swilo leswi swa hava+ mi ya eka Xikwembu+ lexi hanyaka, lexi endleke tilo+ ni misava ni lwandle ni swilo hinkwaswo leswi nga eka swona. 16  Eka switukulwana leswi hundzeke xi pfumelele matiko hinkwawo leswaku ma famba hi tindlela ta wona,+ 17  hambileswi, hakunene, xi nga titshikangiki xi nga ri na vumbhoni bya leswaku xi endle leswinene,+ xi mi nyika timpfula+ ta le tilweni ni tinguva ta mihandzu, xi tata timbilu ta n’wina hi ku helela hi swakudya ni ku khana lokukulu.”+ 18  Kambe hi ku vula swilo leswi a va yi sivelanga nikatsongo mintshungu leswaku yi va endlela switlhavelo. 19  Kambe Vayuda va fika va huma eAntiyoka ni le Ikoniya kutani va kucetela mintshungu,+ hiloko yi khandla Pawulo hi maribye, yi n’wi kokela ehandle ka muti, yi anakanya leswaku u file.+ 20  Hambiswiritano, loko vadyondzisiwa va n’wi rhendzerile, a tlakuka a nghena emutini. Naswona esikwini leri tlhandlamaka a famba na Barnaba va ya eDerbe.+ 21  Kutani endzhaku ko vula mahungu lamanene emutini wolowo ni ku endla vadyondzisiwa vo hlayanyana,+ va tlhelele eListra ni le Ikoniya ni le Antiyoka, 22  va tiyisa mimoya-xiviri ya vadyondzisiwa,+ va va khutaza leswaku va tshama eripfumelweni, va ku: “Hi fanele ku nghena emfun’weni wa Xikwembu hi mahlomulo+ yo tala.” 23  Ku tlula kwalaho, va va vekele vakulukumba+ eka vandlha rin’wana ni rin’wana, naswona va endla xikhongelo hi ku titsona swakudya,+ va va nyikela eka Yehovha+ loyi va veke vapfumeri eka yena. 24  Kutani va tsemakanya ePisidiya va ya fika ePamfiliya,+ 25  naswona, endzhaku ko vula rito ePerge, va rhelele eAtaliya. 26  Kutani ku suka kwalaho va tlutela eAntiyoka,+ laha va nyiketiweke eka musa lowu nga faneriwiki wa Xikwembu hikwalaho ka ntirho lowu va wu endleke+ hi xitalo. 27  Kuteloko va fikile naswona va hlengelete vandlha, va rungula+ swilo swo tala leswi Xikwembu xi swi endleke ha vona, ni leswaku xi pfulele matiko nyangwa ya ripfumelo.+ 28  Kutani va tshama nkarhi wo leha va ri ni vadyondzisiwa.

Tinhlamuselo ta le hansi