Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Mintirho 11:1-30

11  Kutani vaapostola ni vamakwavo lava a va ri eYudiya va twa leswaku vanhu va matiko+ na vona va amukele rito ra Xikwembu.  Kuteloko Petro a tlhandlukele eYerusalema, lava seketelaka mhaka ya ku yimba+ va kanetana na yena,  va vula leswaku u nghene endlwini ya vavanuna lava a va nga yimbanga naswona u dye na vona.  Hiloko Petro a sungula ku va hlamusela vuxokoxoko bya kona, a ku:  “A ndzi ri emutini wa Yopa ndzi khongela, kuteloko ndzi khomiwe hi riphume ndzi vona xivono, xibya xo karhi xi xika ku fana ni nguvu leyikulu ya ntsembyana yi lengeletiwa hi tinhla ta yona ta mune ku suka etilweni, yi fika eka mina.  Loko ndzi yi honolela, ndzi yi xiyisisile kutani ndzi vona swivumbiwa swa milenge ya mune swa misava ni swivandzana ni swilo leswi kokovaka ni tinyenyana ta tilo.+  Nakambe ndzi twa rito ri ku eka mina, ‘Tlakuka, Petro, u tlhava u dya!+  Kambe ndzi ku, ‘Swi nga vi tano nikatsongo, Hosi, hikuva xilo lexi nyameke ni lexi nga basangiki a swi si tshama swi nghena enon’wini wa mina.’+  Ra vumbirhi, rito leri humaka etilweni ri hlamula ri ku, ‘Tshika ku vula leswaku swi nyamile swilo leswi Xikwembu xi swi basiseke.’+ 10  Leswi swi humelela ra vunharhu, naswona xin’wana ni xin’wana xi tlhela xi tlhandlukiseriwa etilweni.+ 11  Nakambe, waswivo, hi xinkarhana xexo a ku ri ni vavanuna vanharhu va yime endlwini leyi a hi ri eka yona, va rhumiwe eka mina va huma eKhezariya.+ 12  Kutani moya+ wu ndzi byela leswaku ndzi famba na vona, ndzi nga kanakani nikatsongo. Kambe vamakwerhu lava va tsevu na vona va fambe na mina, hiloko hi nghena endlwini ya wanuna+ un’wana. 13  “U hi vikele hilaha a yi voneke hakona ntsumi yi yima endlwini yakwe yi ku, ‘Rhuma vavanuna eYopa va ya vitana Simoni loyi a thyiweke Petro,+ 14  kutani u ta ku byela swilo leswi wena ni ndyangu wa wena hinkwawo mi nga ponisiwaka+ ha swona.’ 15  Kambe loko ndzi sungula ku vulavula, moya lowo kwetsima wu xikela ehenhla ka vona hilaha wu endleke hakona ni le ka hina eku sunguleni.+ 16  Hiloko ndzi tsundzuka marito ya Hosi, hilaha a yi hamba yi vula hakona yi ku, ‘Loko ku ri Yohane, u khuvule hi mati,+ kambe n’wina mi ta khuvuriwa hi moya lowo kwetsima.’+ 17  Hikokwalaho, loko Xikwembu xi va nyike nyiko leyi fanaka ya mahala hilaha xi hi nyikeke hakona hina lava kholweke Hosi Yesu Kreste,+ xana mina a ndzo va mani lerova ndzi nga kota ku sivela Xikwembu?”+ 18  Kuteloko va twe swilo leswi, va swi amukela,+ kutani va vangamisa Xikwembu,+ va ku: “Kutani, Xikwembu xi hundzule ni vanhu va matiko+ hi xikongomelo xa leswaku va kuma vutomi.” 19  Hikwalaho lava hangalasiweke+ hi nhlomulo lowu weleke Stefano va tsemakanye va ya fika ni le Fenikiya+ ni le Kipra+ ni le Antiyoka, kambe rito a va nga ri vuli eka van’wana loko ku nga ri eka Vayuda ntsena.+ 20  Hambiswiritano, exikarhi ka vona a ku ri ni vavanuna van’wana va le Kipra ni le Kirena lava teke eAntiyoka kutani va sungula ku vulavula ni vanhu lava vulavulaka Xigriki,+ va vula mahungu lamanene ya Hosi Yesu.+ 21  Ku tlula kwalaho, voko ra Yehovha+ a ri ri na vona, naswona nhlayo leyikulu leyi veke vapfumeri yi hundzukele eHosini.+ 22  Mhaka ya vona yi fike etindleveni ta vandlha leri a ri ri eYerusalema, naswona va rhume Barnaba+ ku ya fika ni le Antiyoka. 23  Loko a fika naswona a vona musa+ lowu nga faneriwiki wa Xikwembu, a tsaka+ kutani a sungula ku va khutaza hinkwavo leswaku va tshama eHosini hi mbilu hinkwayo;+ 24  hikuva a a ri wanuna lonene naswona a a tele moya lowo kwetsima ni ripfumelo. Ntshungu lowukulu wu engetelekile eHosini.+ 25  Kutani a ya eTarso+ a ya lavisisa Sawulo+ hi rixaladza 26  loko a n’wi kumile, a n’wi yisa eAntiyoka. Xisweswo lembe hinkwaro a va hlengeletana na vona evandlheni kutani va dyondzisa ntshungu lowukulu, naswona swi sungule eAntiyoka leswaku vadyondzisiwa va vitaniwa Vakreste+ hi nkongomiso wa Xikwembu. 27  Kutani emasikwini wolawo vaprofeta+ va rhelela eAntiyoka va suka eYerusalema. 28  Un’wana wa vona la vuriwaka Agabo+ a tlakuka, a sungula ku kombisa hi ku tirhisa moya leswaku ndlala leyikulu a yi ri kusuhi ni ku wela misava+ hinkwayo leyi akiweke; leyi, kunene, yi veke kona enkarhini wa Klawudiyo. 29  Kutani vadyondzisiwa va tiyimisela ku rhumela swo phalala+ vamakwavo lava tshamaka eYudiya un’wana ni un’wana wa vona hilaha a kotaka hakona;+ 30  kutani va endla tano, va swi rhumela eka vakulukumba hi voko ra Barnaba na Sawulo.+

Tinhlamuselo ta le hansi