Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Mikiya 3:1-12

3  Ndzi ya emahlweni ndzi ku: “Ndzi kombela mi yingisa, n’wina varhangeri va Yakobe na n’wina tindhuna ta yindlu ya Israyele.+ Xana a hi ntirho wa n’wina ku tiva vululami?+  N’wina lava vengaka leswinene,+ lava rhandzaka vubihi,+ lava yevulaka nhlonge ya vanhu ni nyama ya vona emarhambyini;+  n’wina lava dyeke nyama ya vanhu va mina,+ lava yevuleke nhlonge ya vona, kutani mi pfotlosele marhambu ya vona, mi va phyandlasela ku fana ni leswi swi nga embiteni leyikulu ni ku fana ni nyama endzeni ka mbita yo sweka ha yona.+  Hi nkarhi wolowo va ta kombela mpfuno eka Yehovha, kambe a nge va hlamuli.+ U ta va tumbetela xikandza xa yena enkarhini wolowo,+ hilaha va endleke vubihi hakona emintirhweni ya vona.+  “Yehovha u vule leswi eka vaprofeta lava va tsendzelekisaka vanhu va mina,+ lava va lumaka hi meno ya vona,+ lava entiyisweni va huwelelaka va ku, ‘Ku Rhula,’+ lava loko munhu wihi ni wihi a nga nghenisi nchumu emilon’wini ya vona, va lwaka na yena,+  ‘Hikokwalaho mi ta va ni vusiku,+ kambe xivono a xi nge vi kona;+ mi ta va ni munyama, kambe a mi nge hlahluvi. Kunene dyambu ri ta va ehenhla ka vaprofeta, siku ri fanele ri va munyama ehenhla ka vona.+  Lava va vonaka swivono+ va boheka ku khomiwa hi tingana,+ kunene vavhumbhi+ va ta nyuma. Va ta boheka ku funengeta malepfu ya le henhla ka nomu,+ hinkwavo ka vona, hikuva ku hava nhlamulo leyi humaka eka Xikwembu.’”+  Kasi, hi tlhelo lerin’wana, mina ndzi tele matimba, hi moya wa Yehovha, ni vululami ni matimba,+ leswaku ndzi byela Yakobe swiendlo swa yena swa ku pfukela na Israyele xidyoho xakwe.+  Ndzi kombela mi yingisa leswi, n’wina varhangeri va yindlu ya Yakobe na n’wina tindhuna ta yindlu ya Israyele,+ lava va nyenyaka vululami ni lava va gombonyokisaka hinkwaswo leswi ololokeke;+ 10  lava akaka Siyoni hi swiendlo swo halata ngati na Yerusalema hi leswi nga lulamangiki.+ 11  Varhangeri va wona va avanyisa hi xifumbarheriso,+ ni vaprista va wona va letela hi nxavo ntsena,+ ni vaprofeta va wona va hlahluvela ku kuma mali ntsena;+ kambe va hambeta va titshega hi Yehovha, va ku: “Xana Yehovha a nga kona exikarhi ka hina?+ Hina a hi nge weriwi hi khombo.”+ 12  Hikokwalaho Siyoni wu ta rimiwa ku fana ni nsimu hikwalaho ka n’wina, na Yerusalema u ta va tinhulu ta marhumbi,+ ni ntshava ya yindlu yi ta fana ni tindhawu leti tlakukeke ta khwati.

Tinhlamuselo ta le hansi