Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Mikiya 1:1-16

1  Rito ra Yehovha leri ri fikeke eka Mikiya+ wa le Morexeti, emasikwini ya Yohatama,+ Akazi,+ Hezekiya,+ tihosi ta Yuda,+ leri a ri voneke exivonweni malunghana na Samariya+ na Yerusalema:+  “Yingisani, N’wina hinkwenu; nyikela nyingiso, Wena misava ni leswi swi teleke eka wena,+ naswona Yehovha, Hosi leyi Lawulaka a a ve mbhoni leyi yi mi kanetaka,+ Yehovha a ri etempeleni yakwe yo kwetsima.+  Hikuva waswivo, Yehovha u huma endhawini yakwe,+ kunene u ta rhelela, a pyanya tindhawu leti tlakukeke ta misava.+  Tintshava ti fanele ti n’oka ehansi ka yena,+ ni timbala ta le hansi ti ta avana, ku fana ni mhula lowu n’okisiwaka hi ndzilo,+ ku fana ni mati lama chuluriwaka endhawini leyi rhelelaka.  “Leswi hinkwaswo swi vangiwa hi ku pfukela ka Yakobe, ni hikwalaho ka swidyoho swa yindlu ya Israyele?+ Hi kwihi ku pfukela ka Yakobe? Xana a hi yena Samariya?+ Hi tihi tindhawu leti tlakukeke ta Yuda?+ Xana a hi yena Yerusalema?  Kunene ndzi ta endla Samariya wu va nhulu ya marhumbi ya le masin’wini,+ tindhawu ta nsimu ya vhinya; maribye ya wona ndzi ta ma chulula enkoveni, masungulo ya wona ndzi ta ma funungula.+  Swifaniso swa wona hinkwaswo leswi vatliweke swi ta pfotloseriwa,+ ni tinyiko hinkwato leti wu nyikiweke tona ti va hakelo ti ta hisiwa hi ndzilo;+ swifaniso swa wona hinkwaswo swa hava ndzi ta swi lovisa. Hikuva wu swi teke eka swilo leswi nyikiweke nghwavava swi va hakelo ya yona, kutani swi ta tlhelela eka swilo leswi nyikiweke nghwavava swi va hakelo ya yona.”+  Ndzi ta kalakala,+ ndzi kolola hikwalaho ka leswi; ndzi ta famba ndzi nga vehelanga nchumu emilengeni,+ naswona ndzi mbyinyile. Ndzi ta kalakala kukota timhungubye, ndzi rila kukota tinca ta mimbhaha.  Timbanga ta wona a ti tshunguleki;+ hikuva wu fike eYuda,+ ntungu wu fike enyangweni ya vanhu va mina, ku ya fika eYerusalema.+ 10  “Mi nga tshuki mi swi twarisa eGati; kunene mi nga rili.+ “Vumbulukani entshurini endlwini ya Afra.+ 11  Tsemakanya, Wena muaki wa xisati wa Xafiri, hi vuhava lebyi nyumisaka.+ Muaki wa xisati wa Zanani a nga humanga. Ku kalakala ka Beta-esele ku ta yima exikarhi ka n’wina. 12  Hikuva muaki wa xisati wa Maroti u rindzele leswinene,+ kambe leswo biha leswi humaka eka Yehovha swi tile enyangweni ya Yerusalema.+ 13  Boha kalichi eka swipani swa tihanci, Wena muaki wa xisati wa Lakixi.+ A a ri masungulo ya xidyoho eka nhwanyana wa Siyoni,+ hikuva swiendlo swa ku pfukela swa Israyele swi kumeke eka wena.+ 14  Hikokwalaho u ta nyika Morexeti+ tinyiko to lelana. Tindlu ta Akizibi+ a ti fana ni nchumu wa vuxisi eka tihosi ta Israyele. 15  Ndza ha ta ku tisela loyi a tekaka swilo,+ Wena muaki wa xisati wa Marixa.+ Ku vangama ka Israyele ku ya fika eAdulamu.+ 16  Vana ni mpandla, u tsemeta misisi ya wena hikwalaho ka vana va wena va ntsako lowu heleleke.+ Anamisa mpandla ya wena ku fana ni ya gama, hikuva va sukile eka wena va ya evukhumbini.”+

Tinhlamuselo ta le hansi