Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Matewu 28:1-20

28  Endzhaku ka savata, loko ri ya eku xeni, hi siku ro sungula ra vhiki, Mariya Magadala na Mariya loyi un’wana va ta ku ta languta sirha.+  Kutani waswivo, ku ve ni ku tsekatseka lokukulu ka misava; ntsumi ya Yehovha yi xike etilweni yi fika yi khunguluxa ribye, naswona a yi tshame ehenhla ka rona.+  A yi languteka ku fana ni rihati,+ naswona swiambalo swa yona a swi base ku fana ni gamboko.+  Ina, vavanuna lava rindzeke va rhurhumela hi ku yi chava naswona va fana ni vanhu lava feke.  Kambe ntsumi+ yi angula vavasati yi ku: “Mi nga chavi, hikuva ndza swi tiva leswaku mi lava Yesu+ la beleriweke.  A nga kona laha, hikuva u pfuxiwile,+ hilaha a vuleke hakona. Tanani, mi ta vona ndhawu leyi a a etlele eka yona.  Kutani fambani hi ku hatlisa mi ya byela vadyondzisiwa vakwe leswaku u pfuxiwile+ eka lava feke, naswona maswivo, wa mi rhangela ku ya eGaleliya;+ mi ta n’wi vona kwale. Maswivo! Ndzi mi byerile.”+  Kutani, hi ku hatlisa va suka eka sirha-bako ra xitsundzuxo, hi ku chava ni ku tsaka lokukulu, va tsutsuma va ya vikela vadyondzisiwa vakwe.+  Kutani waswivo, Yesu a hlangana na vona ivi a ku: “Xewani!” Va n’wi tshinelela ivi va n’wi khoma milenge va n’wi nkhinsamela. 10  Kutani Yesu a ku eka vona: “Mi nga chavi! Fambani, mi ya vikela vamakwerhu,+ leswaku va ya eGaleliya; va ta ndzi vona kwale.” 11  Loko va ha ri endleleni, waswivo, varindzi+ van’wana va ya emutini va ya vikela vaprista lavakulu swilo hinkwaswo leswi endlekeke. 12  Kuteloko va hlengeletane ni vakulukumba naswona va bohe makungu, va nyika masocha+ ntsengo lowu ringaneke wa swiphemu swa silivhere 13  ivi va ku: “Vulani mi ku, ‘Vadyondzisiwa+ vakwe va te ni vusiku va ta n’wi yiva loko ha ha etlele.’ 14  Kutani loko leswi swi fika etindleveni ta ndhuna-nkulu, hi ta yi khorwisa naswona hi ta endla leswaku mi nga karhateki.” 15  Kutani va teka swiphemu swa silivhere va endla hilaha va lerisiweke hakona; naswona rito leri ri hangalasiwe hinkwako-nkwako exikarhi ka Vayuda ku fikela esikwini roroleri. 16  Hambiswiritano, vadyondzisiwa va 11 va ya entshaveni ya Galeliya+ laha Yesu a a hlele ku ya hlangana na vona kona, 17  loko va n’wi vona, va n’wi nkhinsamela, kambe van’wana va kanakana.+ 18  Kutani Yesu a tshinela ivi a vulavula na vona, a ku: “Ndzi nyikiwe vulawuri+ hinkwabyo etilweni ni le misaveni. 19  Hikokwalaho fambani mi ya endla vanhu va matiko+ hinkwawo va va vadyondzisiwa,+ mi va khuvula+ hi vito ra Tatana+ ni ra N’wana+ ni ra moya lowo kwetsima,+ 20  mi va dyondzisa+ ku hlayisa+ swilo hinkwaswo leswi ndzi mi leriseke swona.+ Kutani, maswivo, ndzi na n’wina+ masiku hinkwawo ku fikela emakumu ka mafambiselo ya swilo.”+

Tinhlamuselo ta le hansi