Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Matewu 26:1-75

26  Kutani loko Yesu a hetile marito wolawo hinkwawo, a ku eka vadyondzisiwa vakwe:  “Ma swi tiva leswaku emasikwini mambirhi ku sukela sweswi, ku ta va ni paseka,+ naswona N’wana wa munhu u ta nyiketiwa leswaku a beleriwa.”+  Kutani vaprista lavakulu ni vakulukumba va tiko va hlengeletana exivaveni xa muprista lonkulu loyi a a vuriwa Kayafasi,+  ivi va boha makungu+ swin’we ya ku khoma Yesu hi rhengu ra vuxisi va n’wi dlaya.  Hambiswiritano, va tshamela ku vula va ku: “Ku nga ri enkhubyeni, leswaku ku nga pfuki hasahasa exikarhi ka vanhu.”+  Loko Yesu a ri eBetaniya+ endlwini ya Simoni lowa nhlokonho,+  wansati loyi a a ri ni xikutsu xa alabasta xa mafurha+ yo durha yo nun’hwela a n’wi tshinelela, wansati loyi a sungula ku ma chela enhlokweni yakwe a vurhamile etafuleni.  Loko vadyondzisiwa va vona leswi va hlundzuka ivi va ku: “Ha yini ma tlangisiwa?+  Hikuva a ma ta va ma xavisiwe hi nxavo lowukulu ivi wu nyikiwa vanhu lava nga swisiwana.”+ 10  Loko Yesu a swi lemuka,+ a ku eka vona: “Ha yini mi ringeta ku karhata wansati loyi? Hikuva u ndzi endlele xiendlo lexinene.+ 11  Hikuva swisiwana+ mi tshama mi ri na swona, kambe mina a mi nge vi na mina+ nkarhi hinkwawo. 12  Hikuva loko wansati loyi a ndzi chela hi mafurha yo nun’hwela emirini, a a swi endlela ku ndzi lunghiselela ku lahliwa.+ 13  Ndzi tiyisile ndzi ri eka n’wina, Kun’wana ni kun’wana laha mahungu lawa lamanene ma nga ta chumayeriwa kona emisaveni hinkwayo, leswi wansati loyi a swi endleke swi ta vuriwa, a tsundzukiwa ha swona.”+ 14  Kutani un’wana wa lava 12, la vuriwaka Yudasi Iskariyota,+ a ya eka vaprista lavakulu 15  ivi a ku: “Xana mi ta ndzi nyika yini leswaku ndzi n’wi xenga eka n’wina?”+ Va n’wi tshembisa swiphemu swa silivhere swa 30.+ 16  Kutani ku sukela kwalaho a a hamba a lava nkarhi lowunene wa ku n’wi xenga.+ 17  Hi siku ro sungula ra swinkwa leswo-ke-comela+ vadyondzisiwa va ta eka Yesu, va ku: “Xana u lava leswaku hi ku lunghisela kwihi laha u nga ta dyela kona paseka?”+ 18  A ku: “Yanani emutini eka Ximanimani+ ivi mi ku eka yena, Mudyondzisi u ri, ‘Nkarhi wa mina lowu vekiweke wu kusuhi; ndzi ta tlangela paseka ni vadyondzisiwa va mina ekaya ra wena.’”+ 19  Hiloko vadyondzisiwa va endla hilaha Yesu a va leriseke hakona, va lunghiselela swilo swa paseka.+ 20  Kutani, nimadyambu,+ a a vurhame etafuleni ni vadyondzisiwa+ va 12. 21  Loko va ha ri eku dyeni, a ku: “Ndzi tiyisile ndzi ri eka n’wina, Un’wana wa n’wina u ta ndzi xenga.”+ 22  Hi ku khomiwa hi gome lerikulu hikwalaho ka leswi, hinkwavo ka vona va sungula ku n’wi vutisa va ku: “Hosi, a hi mina, a hi swona ke?”+ 23  A angula a ku: “Loyi a nghenisaka voko rakwe na mina enkambaneni hi yena loyi a nga ta ndzi xenga.+ 24  I ntiyiso, N’wana wa munhu wa famba, hilaha swi tsariweke+ hakona malunghana na yena, kambe u ni khombo+ munhu yoloye loyi N’wana wa munhu a xengiwaka+ ha yena! A swi ta va swinene ngopfu loko munhu yoloye a a nga velekiwanga.” 25  Yudasi loyi a a ri kusuhi ni ku n’wi xenga a angula a ku: “A hi mina, a hi swona ke, Rabi?” A ku eka yena: “Ku vula wena.” 26  Loko va ri karhi va dya, Yesu a teka xinkwa,+ loko a nkhensile, a xi phema+ ivi a nyika vadyondzisiwa, a ku: “Tekani, mi dya. Leswi swi vula miri+ wa mina.” 27  Nakambe, a teka xinwelo,+ loko a nkhensile, a va nyika xona, a ku: “Nwanani eka xona, hinkwenu ka n’wina;+ 28  hikuva leswi swi vula+ ‘ngati+ ya ntwanano’+ ya mina, leyi nga ta halateriwa vo tala+ leswaku va rivaleriwa swidyoho.+ 29  Kambe ndza mi byela, A ndzi nge he nwi leswi humaka emadiriveni lawa ya murhi wa vhinya ku sukela sweswi ku fikela siku rero loko ndzi swi nwa hi vuntshwa na n’wina emfun’weni wa Tata+ wa mina.” 30  Eku heteleleni, loko va yimbelele marito yo dzunisa,+ va huma va ya eNtshaveni ya Mitlhwari.+ 31  Kutani Yesu a ku eka vona: “Hinkwenu ka n’wina mi ta khunguvanyeka mayelana na mina evusikwini byolebyi, hikuva ku tsariwile, ‘Ndzi ta ba murisi, kutani tinyimpfu ta ntlhambi ti ta hangalaka hinkwako.’+ 32  Kambe loko ndzi pfuxiwile, ndzi ta mi rhangela ku ya eGaleliya.”+ 33  Kambe Petro, a n’wi hlamula a ku: “Hambiloko hinkwavo va nga khunguvanyeka mayelana na wena, mina a ndzi nge pfuki ndzi khunguvanyekile!”+ 34  Yesu a ku eka yena: “Ndzi tiyisile ndzi ri eka wena, Evusikwini byolebyi, nkuku wu nga si ringa, u ta ndzi ala kanharhu.”+ 35  Petro a ku eka yena: “Hambiloko ndzi fanela ku fa na wena, a ndzi nge ku ali nikatsongo.” Ni vadyondzisiwa lavan’wana hinkwavo va vula nchumu lowu fanaka.+ 36  Kutani Yesu a fika na vona endhawini+ leyi vuriwaka Getsemani, ivi a ku eka vadyondzisiwa: “Tshamani laha, ndza ha tlhandlukela lahaya ku ya khongela.”+ 37  Xisweswo a teka Petro ni vana+ vambirhi va Zebediya, a khomiwa hi gome naswona a karhateka+ ngopfu. 38  Kutani a ku eka vona: “Moya-xiviri wa mina wu ni gome lerikulu, ku yisa eku feni.+ Tshamani laha mi hambeta mi rindza na mina.”+ 39  A ya emahlweninyana, a wa hi xikandza, a khongela+ a ku: “Tatana, loko swi koteka, hundzisa xinwelo+ lexi eka mina. Kambe, ku nga ri hi ku rhandza+ ka mina, kambe hi ku rhandza ka wena.”+ 40  Kutani a ta eka vadyondzisiwa, a va kuma va etlele, ivi a ku eka Petro: “Vavanuna, xana a mi nge swi koti ku rindza na mina ku ringana awara yin’we?+ 41  Tshamani mi rindzile+ naswona mi hambeta mi khongela,+ leswaku mi nga ngheni endzingweni.+ Ina, moya wu ni mapfundza, kambe nyama yi tsanile.”+ 42  Nakambe, ra vumbirhi,+ a famba a ya khongela, a ku: “Tatana, loko swi nga koteki leswaku xi hundza ndzi nga nwanga, a ku endleke ku rhandza ka wena.”+ 43  Kutani a tlhela a vuya, a va kuma va etlele, hikuva mahlo ya vona a ma tika.+ 44  Xisweswo a va siya, a tlhela a famba a ya khongela ra vunharhu,+ a vula rito leri fanaka nakambe. 45  Kutani a ta eka vadyondzisiwa a ku eka vona: “Enkarhini lowu mi etlele, ma wisa! Maswivo! Nkarhi wu tshinele wa leswaku N’wana wa munhu a xengiwa emavokweni ya vadyohi.+ 46  Pfukani, a hi fambeni. Maswivo! Muxengi wa mina u tshinele.”+ 47  Kuteloko a ha vulavula, waswivo, Yudasi,+ un’wana wa lava 12, a ta a ri ni ntshungu lowukulu wu ri ni mabanga+ ni michizo wu huma eka vaprista lavakulu ni le ka vakulukumba va tiko.+ 48  Muxengi wakwe a a va nyike xikombiso, a ku: “Loyi ndzi nga ta n’wi ntswontswa, hi yena; n’wi khomeni.”+ 49  Kutani a ya eka Yesu hi ku kongoma a ku: “Xewani, Rabi,”+ hiloko a n’wi ntswontswa+ swinene hi rirhandzu. 50  Kambe Yesu+ a ku eka yena: “Nandzuwe, u te hi xikongomelo xihi ke?” Kutani va tshinela ivi va yisa mavoko eka Yesu va n’wi khoma.+ 51  Kambe, waswivo, un’wana wa lava a va ri na Yesu a tshambuluta voko rakwe a hlomula banga rakwe a khemba hlonga ra muprista lonkulu, a susa ndleve+ ya rona. 52  Kutani Yesu a ku eka yena: “Vuyisela banga ra wena endhawini ya rona,+ hikuva hinkwavo lava khomaka banga va ta lova hi banga.+ 53  Kumbe, xana u ehleketa leswaku enkarhini lowu a ndzi nge kombeli eka Tatana a ndzi rhumela mavandla ya tintsumi+ lama tlulaka 12? 54  Mayelana ni leswi, xana Matsalwa ma ta hetiseka njhani lama vulaka leswaku swi fanele swi endleka hi ndlela leyi?” 55  Enkarhini wolowo Yesu a byela mintshungu a ku: “Xana mi te eka mina ni mabanga ni michizo onge hi loko mi ta khoma xigevenga?+ Siku ni siku a ndzi tshama etempeleni+ ndzi dyondzisa, kambe a mi ndzi khomanga. 56  Kambe hinkwaswo leswi swi endlekile leswaku ku hetiseka+ matsalwa ya vaprofeta.” Kutani vadyondzisiwa hinkwavo va n’wi siya va baleka.+ 57  Lava va khomeke Yesu va n’wi yise eka Kayafasi+ muprista lonkulu, laha vatsari ni vakulukumba a va hlengeletane kona.+ 58  Kambe Petro a n’wi landzela a ri ekulenyana, ku fika exivaveni+ xa muprista lonkulu, naswona, loko a nghenile endzeni, u tshame ni valanguteri va yindlu leswaku a vona vuyelo+ bya kona. 59  Hi nkarhi wolowo vaprista lavakulu ni Sanedri hinkwayo a va lava vumbhoni bya mavunwa byo hehla Yesu leswaku va n’wi dlaya,+ 60  kambe a va byi kumanga, hambileswi ku humeleleke timbhoni to tala ta mavunwa.+ Endzhaku ku humelela timbirhi 61  ti ku: “Munhu loyi u te, ‘Ndza swi kota ku wisa tempele ya Xikwembu ndzi yi aka hi masiku+ manharhu.’” 62  Loko muprista lonkulu a twa sweswo a suka a yima ivi a ku eka yena: “Xana a wu na nhlamulo? Xana hi byihi vumbhoni lebyi lava va ku hehlaka ha byona?”+ 63  Kambe Yesu a miyela.+ Kutani muprista lonkulu a ku eka yena: “Hi Xikwembu lexi hanyaka ndza ku hlambanyisa+ leswaku u hi byela loko u ri Kreste+ N’wana wa Xikwembu!” 64  Yesu a ku+ eka yena: “Wena hi wexe u swi vurile.+ Kambe ndzi ri eka n’wina, Ku sukela sweswi+ mi ta vona N’wana wa munhu+ a tshame evokweni+ ra xinene ra matimba naswona a ta hi mapapa ya tilo.”+ 65  Kutani muprista lonkulu a handzula tinguvu takwe ta le handle, a ku: “U sandzile!+ Xana ha ha ti lavela yini timbhoni?+ Maswivo! Sweswi mi xi twile xisandzu.+ 66  Mi ri yini?” Va hlamula va ku: “U lulameriwa hi rifu.”+ 67  Endzhaku ka sweswo va n’wi tshwutelela exikandzeni,+ va n’wi ba+ hi swibakela. Van’wanyana va n’wi makala exikandzeni,+ 68  va ku: “Hi profetele, wena Kreste.+ I mani la nga ku ba?”+ 69  Hi nkarhi lowu Petro a a tshame ehandle exivaveni; kutani nandza wa xisati a ta eka yena a ku: “Na wena, a wu ri na Yesu wa Mugaleliya!”+ 70  Kambe a landzula emahlweni ka vona hinkwavo, a ku: “A ndzi swi tivi leswi u swi vulaka.” 71  Kuteloko a humile a ya endlwini ya le nyangweni, nandza un’wana wa xisati a n’wi vona ivi a byela lava a va ri kwalaho a ku: “Wanuna loyi a a ri na Yesu wa Munazareta.”+ 72  Nakambe a landzula hi xihlambanyo a ku: “A ndzi n’wi tivi munhu loyi!”+ 73  Endzhaku ka nkarhinyana lava a va yime kwalaho va ta, va ku eka Petro: “Hakunene u wun’wana wa vona, hikuva entiyisweni mavulavulelo ya wena ma ku paluxa.”+ 74  Hiloko a sungula ku hlambanya ni ku tiyisa a ku: “A ndzi n’wi tivi munhu loyi!” Hi ku hatlisa nkuku wu ringa.+ 75  Kutani Petro a tsundzuka marito lawa Yesu a nga ma vula, lama nge: “Nkuku wu nga si ringa, u ta ndzi ala kanharhu.”+ Kutani a humela ehandle, a rila hi xiviti.+

Tinhlamuselo ta le hansi