Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Matewu 21:1-46

21  Kutani, loko va tshinela eYerusalema va fika eBetefage eNtshaveni ya Mitlhwari, Yesu a rhuma vadyondzisiwa+ vambirhi,  a ku eka vona: “Khomani ndlela mi ya eximutanini lexi mi langutaneke na xona, kutani loko mi fika mi ta kuma mbhongolo yi tsimbiwile, yi ri ni ximbhongolwana; ti ntshunxeni mi ti tisa eka mina.+  Naswona loko un’wana a vula swo karhi eka n’wina, mi fanele mi ku, ‘Hosi ya ti lava.’ Kutani hi nkarhi wolowo u ta mi tshika mi famba na tona.”  Kahle-kahle leswi swi endlekile leswaku ku hetiseka leswi nga vuriwa hi muprofeta, a ku:  “Byelani nhwanyana wa Siyoni, ‘Waswivo! Hosi ya wena ya ta eka wena,+ hi moya wo rhula,+ yi gade mbhongolo, ina, yi gade ximbhongolwana, n’wana wa xifuwo lexi rhwalaka ndzhwalo.’”+  Kutani vadyondzisiwa va nghena endleleni, va endla hilaha Yesu a va leriseke hakona.  Hiloko va tisa mbhongolo ni ximbhongolwana xa yona, kutani va kapeka tinguvu ta vona ta le handle eka tona, kutani a tshama ehenhla ka tona.+  Vo tala lava a va ri entshungwini va andlala tinguvu+ ta vona ta le handle egondzweni, loko lavan’wana va sungula ku tsema marhavi emirhini va ma andlala egondzweni.+  Loko ku ri mintshungu, leyi a yi n’wi rhangele emahlweni ni leyi a yi n’wi landzela, a yi hambeta yi huwelela yi ku: “Ha khongela,+ a ku ponisiwe N’wana wa Davhida!+ U katekile loyi a taka hi vito+ ra Yehovha! Ha khongela, n’wi ponise, wena la nge henhla-henhla!”+ 10  Kutani loko a nghena eYerusalema,+ muti hinkwawo wu yimayimeka, wu ku: “I mani loyi?” 11  Mintshungu yi tshamela ku vulavula yi ku: “Loyi i muprofeta+ Yesu, u huma eNazareta wa Galeliya!” 12  Kutani Yesu a nghena etempeleni a hlongola hinkwavo lava xavisaka ni lava xavaka etempeleni, a wisetela matafula ya vacinci va mali ni switshamo swa lava xavisaka matuva.+ 13  Kutani a ku eka vona: “Ku tsariwile, ‘Yindlu ya mina yi ta vuriwa yindlu ya xikhongelo,’+ kambe n’wina mi yi endla bako ra swigevenga.”+ 14  Nakambe, vanhu lava feke mahlo ni lava khutaka va ya eka yena etempeleni, a va hanyisa. 15  Loko vaprista lavakulu ni vatsari va vona swilo swo hlamarisa leswi a swi endleke+ ni ku vona vafana lava a va huwelela etempeleni va ku: “Ha khongela,+ a ku ponisiwe N’wana wa Davhida,”+ va hlundzuka 16  kutani va ku eka yena: “Xana wa swi twa leswi vuriwaka hi lava?” Yesu a ku eka vona: “Ina. Xana a mi si tshama mi hlaya+ leswi, ‘U lunghiselele swidzuniso+ swi huma emilon’wini ya swihlangi ni ya lava an’waka’?” 17  Kutani a va siya a humela ehandle ka muti a ya eBetaniya ivi a tshama kona vusiku+ byin’we. 18  Loko a ri endleleni yo vuyela emutini nimixo swinene, a khomiwa hi ndlala.+ 19  Kutani a vona nkuwa ekusuhi ni gondzo ivi a ya eka wona, kambe a nga kumanga nchumu+ eka wona loko ku nga ri matluka ntsena, kutani a ku eka wona: “Ku nga ha tshuki ku huma mihandzu eka wena hi masiku.”+ Kutani nkuwa wu vuna hi ku hatlisa. 20  Kambe loko vadyondzisiwa va vona leswi, va hlamala, va ku: “Swi endlekisa ku yini leswaku nkuwa wu vuna hi ku hatlisa?”+ 21  Yesu a va hlamula a ku: “Ndzi tiyisile ndzi ri eka n’wina, Loko ntsena mi ri ni ripfumelo naswona mi nga kanakani,+ a mi nge endli leswi ndzi swi endleke eka nkuwa lowu ntsena, kambe niloko mo byela ntshava leyi mi ku, ‘Simuka u tihoxa elwandle,’ swi ta endleka.+ 22  Kutani swilo hinkwaswo leswi mi swi kombelaka hi xikhongelo mi ri ni ripfumelo, mi ta swi kuma.”+ 23  Kutani endzhaku ko nghena etempeleni, vaprista lavakulu ni vakulukumba va tiko va ta eka yena loko a ha dyondzisa va ku:+ “U swi endla hi matimba wahi swilo leswi? Naswona i mani la ku nyikeke matimba lawa?”+ 24  Yesu a va hlamula a ku: “Na mina ndzi ta mi vutisa xilo xin’we. Loko mi ndzi hlamula, na mina ndzi ta mi byela matimba lawa ndzi endlaka swilo leswi ha wona:+ 25  Nkhuvulo wa Yohane, a wu huma kwihi? Xana a wu huma etilweni kumbe a wu huma evanhwini?”+ Kambe va sungula ku kanela va ri voxe, va ku: “Loko hi ku, ‘A wu huma etilweni,’ u ta ku, ‘Kutani, ha yini mi nga n’wi kholwanga?’+ 26  Kambe, loko hi ku, ‘A wu huma evanhwini,’ hi chava+ ntshungu, hikuva hinkwawo wu pfumela leswaku Yohane i muprofeta.”+ 27  Kutani va hlamula Yesu va ku: “A hi tivi.” Na yena a ku eka vona: “Na mina a ndzi mi byeli matimba lawa ndzi endlaka swilo+ leswi ha wona. 28  “Xana mi swi vonisa ku yini? Munhu un’wana a a ri ni vana+ vambirhi. A ya eka lowo sungula, a ku, ‘N’wananga, famba u ya tirha ensin’wini ya vhinya namuntlha.’ 29  A n’wi hlamula a ku, ‘Ndzi ta ya, nkulukumba,’+ kambe a nga yanga. 30  A ya eka lowa vumbirhi, a vula leswi fanaka. Yena a angula a ku, ‘A ndzi nge yi.’ Endzhakunyana a tisola+ ivi a ya. 31  Xana hi wihi eka lava vambirhi la endleke ku rhandza ka tata+ wakwe?” Va ku: “Hi lowo hetelela.” Yesu a ku eka vona: “Ndzi tiyisile ndzi ri eka n’wina, valuvisi ni tinghwavava va mi rhangela ku nghena emfun’weni wa Xikwembu. 32  Hikuva Yohane u tile eka n’wina hi ndlela yo lulama,+ kambe a mi n’wi kholwanga.+ Hambiswiritano, valuvisi ni tinghwavava va n’wi khorwile,+ kambe n’wina, hambileswi mi swi voneke, endzhaku ka sweswo a mi tisolanga leswaku mi n’wi kholwa. 33  “Yingisani xifaniso xin’wana: A ku ri ni munhu wo karhi, n’wini wa yindlu,+ loyi a a rime nsimu ya vhinya, a yi biyela hi rihlampfu, a cela xikamelo xa vhinya eka yona, a yimisa xihondzo,+ kutani a yi vekisa eka varimi, a endzela etikweni ra le kule.+ 34  Loko nkarhi wa mihandzu wu fika, a rhuma mahlonga yakwe ma ya eka varimi leswaku ma ya teka mihandzu ya yena. 35  Kambe varimi va teka mahlonga yakwe, kutani va ba rin’we ra wona, va dlaya rin’wana, rin’wana va ri khandla hi maribye.+ 36  A tlhela a rhuma mahlonga man’wana, yo tala ku tlula yo sungula, kambe va ma endla leswi fanaka.+ 37  Eku heteleleni a rhuma n’wana wakwe eka vona, a ku, ‘Va ta va ni xichavo eka n’wananga.’ 38  Loko va vona n’wana wakwe, varimi va byelana va ku, ‘Loyi i mudyandzhaka;+ tanani, a hi n’wi dlayeni hi ta kuma ndzhaka yakwe!’+ 39  Hiloko va n’wi teka va n’wi cukumeta ehandle ka nsimu ya vhinya ivi va n’wi dlaya.+ 40  Hikokwalaho, loko n’wini wa nsimu ya vhinya a fika, xana u ta endla yini hi varimi volavo?” 41  Va ku eka yena: “Hikwalaho ka leswi va biheke, u ta va dlaya+ hi ndlela yo biha naswona u ta vekisa nsimu ya vhinya eka varimi van’wana, lava nga ta n’wi nyika mihandzu loko nkarhi wa yona wu fika.”+ 42  Yesu a ku eka vona: “Xana a mi si tshama mi hlaya eMatsalweni, ‘Ribye leri vaaki va ri bakanyeke+ hi rona ri hundzukeke ribye lerikulu ra le yinhleni.+ Ri huma eka Yehovha, naswona ra hlamarisa ematihlweni ya hina’? 43  Hi yona mhaka leyi ndzi nge eka n’wina, Mfumo wa Xikwembu wu ta tekiwa eka n’wina wu nyikiwa tiko leri humesaka mihandzu+ ya wona. 44  Nakambe, munhu la welaka eribyeni leri u ta phyandlaseka. Kasi mani na mani loyi ri n’wi welaka, ri ta n’wi phyandlasa.”+ 45  Kutani loko vaprista lavakulu ni Vafarisi va twe swifaniso swakwe, a va swi lemuka leswaku a a vulavula ha vona.+ 46  Kambe, hambileswi a va lava ku n’wi khoma, a va chava mintshungu, hikuva a yi pfumela leswaku i muprofeta.+

Tinhlamuselo ta le hansi