Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Matewu 20:1-34

20  “Hikuva mfumo wa matilo wu fana ni munhu, loyi a nga n’wini wa yindlu, la humeke nimixo swinene ku ya thola vatirhi lava nga ta tirha ensin’wini yakwe ya vhinya.+  Loko a pfumelelane ni vatirhi vakwe hi denari hi siku,+ a va rhuma va ya ensin’wini yakwe ya vhinya.  A tlhela a huma kwalomu ka awara+ ya vunharhu, a vona van’wana lava a va nga thoriwanga va yimile endhawini ya ku xavisela;+  ni ka volavo a ku, ‘Na n’wina, yanani ensin’wini ya vhinya, naswona xin’wana ni xin’wana lexi lulameke ndzi ta mi nyika xona.’  Kutani va famba. Nakambe a huma kwalomu ka awara ya vutsevu+ ni ya vukaye+ a endla hilaha ku fanaka.  Eku heteleleni, kwalomu ka awara ya vu-11 a huma kutani a kuma van’wana va yimile, a ku eka vona, ‘Ha yini mi yime laha siku hinkwaro mi nga thoriwi?’  Va ku eka yena, ‘Hikuva a ku na munhu la nga hi thola.’ A ku eka vona, ‘Na n’wina yanani ensin’wini ya vhinya.’+  “Loko ri pela,+ n’wini wa nsimu ya vhinya a byela munhu wakwe la yi langutelaka a ku, ‘Vitana vatirhi u va holela,+ ku sungula eka lavo hetelela ku ya eka lavo sungula.’  Loko ku fika vanhu lava sunguleke ku tirha hi awara ya vu-11, un’wana ni un’wana a kuma denari. 10  Kutani, loko lavo sungula va fika, a va tibyele leswaku va ta kuma muholo lowu engetelekeke; kambe na vona va kuma muholo wa denari. 11  Loko va wu kumile, va sungula ku gungula va sola n’wini wa yindlu+ 12  va ku, ‘Lavo hetelela va tirhe awara yin’we; kambe na vona u va ringanisa na hina lava hi tiyiseleke ndzhwalo wa siku ni mumu lowukulu!’ 13  Kambe a hlamula un’wana wa vona a ku, ‘Nandzuwe, a ndzi ku endlanga nchumu lexi hoxeke. U pfumelelane na mina hi denari, a hi swona ke?+ 14  Teka leswi nga swa wena u famba. Ndzi lava ku holela lowo hetelela ku ringana na wena.+ 15  Xana a ndzi pfumeleriwi ku endla leswi ndzi swi lavaka hi swilo swa mina? Kumbe tihlo ra wena ri hombolokile+ hileswi mina ndzi nga lonene ke?’+ 16  Hi ndlela leyi lavo hetelela va ta va vo sungula, kutani lavo sungula va ta va vo hetelela.”+ 17  Leswi a a ri kusuhi ni ku tlhandlukela eYerusalema, Yesu a teka vadyondzisiwa+ va 12 exihundleni a famba, loko va ri egondzweni a va byela a ku: 18  “Maswivo! Hi tlhandlukela eYerusalema, naswona N’wana wa munhu u ta nyiketiwa eka vaprista lavakulu ni le ka vatsari, kutani va ta n’wi gwevela rifu,+ 19  naswona va ta n’wi nyiketa eka vanhu va matiko leswaku va endla xihlekiso ha yena ni ku n’wi ba kutani va n’wi belela,+ naswona u ta pfuxiwa+ hi siku ra vunharhu.” 20  Endzhaku ka sweswo mana wa vana va Zebediya+ a ya ni vana vakwe eka yena, a n’wi nkhinsamela, a kombela swo karhi eka yena.+ 21  A ku eka wansati: “Xana u lava yini?” Wansati a ku eka yena: “Vula rito ra leswaku vana va mina lava vambirhi va tshama emfun’weni+ wa wena, un’wana evokweni ra wena ra xinene un’wanyana eka lera ximatsi.” 22  Yesu a hlamula a ku: “Vanhu ndzin’wina, a mi swi tivi leswi mi swi kombelaka. Xana mi nga swi kota ku nwa eka xinwelo+ lexi ndzi nga ta nwa eka xona?” Va ku eka yena: “Ina.” 23  A ku eka vona: “Hakunene mi ta nwela exinwelweni xa mina,+ kambe loko ku ri ku tshama evokweni ra mina ra xinene ni ra ximatsi a hi swa mina ku swi nyika van’wana, kambe i swa lava lunghiseriweke swona hi Tata wa mina.”+ 24  Loko lavan’wana va khume va swi twa, va hlundzukela vanhu lava vambirhi lava a va ri vamakwavo.+ 25  Kambe Yesu, a va vitanela eka yena, a ku: “Ma swi tiva leswaku vafumi va matiko va ma tikisela naswona vanhu lavakulu va ma lawula.+ 26  A swi fanelanga swi va tano exikarhi ka n’wina;+ kambe mani na mani la lavaka ku va lonkulu exikarhi ka n’wina u fanele ku va mutirheli+ wa n’wina, 27  naswona mani na mani la lavaka ku va wo sungula exikarhi ka n’wina u fanele ku va hlonga+ ra n’wina. 28  Tanihi leswi N’wana wa munhu a nga telangiki ku tirheriwa, kambe a teleke ku tirhela+ ni ku nyikela moya-xiviri wakwe wu va nkutsulo wa lavo tala.”+ 29  Kutani loko va ri karhi va huma eYeriko+ ntshungu lowukulu wu n’wi landzela. 30  Kutani waswivo, vanhu vambirhi lava feke mahlo a va tshame etlhelweni ka gondzo, loko va twa leswaku Yesu wa hundza, va huwelela va ku: “Hosi, vana ni tintswalo eka hina, wena N’wana wa Davhida!”+ 31  Kambe ntshungu wu va byela hi ku kongoma leswaku va miyela; kambe va huwelela hilaha ku twalaka swinene, va ku: “Hosi, vana ni tintswalo eka hina, wena N’wana wa Davhida!”+ 32  Kutani Yesu a yima, a va vitana ivi a ku: “Xana mi lava leswaku ndzi mi endlela yini?” 33  Va ku eka yena: “Hosi, pfula mahlo ya hina.”+ 34  Hi ku susumetiwa hi ntwela-vusiwana, Yesu a khumba mahlo+ ya vona, xikan’we-kan’we va sungula ku vona, kutani va n’wi landzela.+

Tinhlamuselo ta le hansi