Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Marka 7:1-37

7  Kutani Vafarisi ni vatsari van’wana lava nga ta va huma eYerusalema va hlengeletana eka yena.+  Naswona loko va vona vadyondzisiwa vakwe van’wana va dya swakudya swa vona hi mavoko lama nyameke, hileswaku, lama nga hlambiwangiki+  hikuva Vafarisi ni Vayuda hinkwavo a va nga dyi loko va nga hlambanga mavoko ku fika eswikokolweni, a va khomelele swi tiya endhavukweni wa vanhu va minkarhi yo sungula,  kutani, loko va vuya evuxaviselweni, a va dyi loko va nga si tibasisa hi ku xuviwa; naswona ku ni mindhavuko+ yin’wana yo tala leyi va yi amukeleke, leyi va khomeleleke swi tiya eka yona, ku khuvuriwa ka swinwelo ni ka swikelelo ni ka swibya swa koporo;+  kutani Vafarisi lava ni vatsari va n’wi vutisa va ku: “Ha yini vadyondzisiwa va wena va nga tikhomi hi ku ya hi ndhavuko wa vanhu va minkarhi ya khale, kambe va dya swakudya hi mavoko lama nyameke?”+  A va byela a ku: “Esaya u profete hilaha ku faneleke malunghana na n’wina vakanganyisi, hilaha swi tsariweke hakona,+ ‘Vanhu lava va ndzi xixima hi milomu ya vona, kambe timbilu ta vona ti le kule swinene na mina.+  Va tama va ndzi gandzela swa hava, hikuva va dyondzisa swileriso swa vanhu+ va swi endla tidyondzo leti nga enawini.’  Mi tshika xileriso xa Xikwembu, mi khomelela swi tiya endhavukweni wa vanhu.”+  Ku tlula kwalaho, a ya emahlweni a ku eka vona: “Mi bakanya xileriso+ xa Xikwembu hi vutlhari leswaku mi hlayisa ndhavuko wa n’wina. 10  Hi xikombiso, Muxe u te, ‘Xixima tata wa wena ni mana+ wa wena,’ naswona, ‘La rhukanaka tata wakwe kumbe mana wakwe a a dlayiwe.’+ 11  Kambe n’wina mi ri, ‘Loko munhu a byela tata wakwe kumbe mana wakwe a ku: “Xin’wana ni xin’wana lexi ndzi nga na xona lexi ndzi nga ku pfunaka ha xona i korbani,+ (hileswaku, nyiko leyi nyikeriweke+ eka Xikwembu,)”’— 12  n’wina a ma ha n’wi pfumeleli ku endlela tata wakwe kumbe mana+ wakwe nchumu wo karhi, 13  xisweswo mi endla rito ra Xikwembu+ ri nga tirhi hi ndhavuko wa n’wina lowu mi wu hundziseleke. Naswona mi endla swilo+ swo tala leswi yelanaka ni leswi.” 14  Kutani, loko a tlhela a vitana ntshungu wu ta eka yena, a wu byela a ku: “Ndzi yingiseni, hinkwenu ka n’wina, mi kuma nhlamuselo ya kona.+ 15  Ku hava xilo xa le handle lexi nghenaka eka munhu lexi nga n’wi nyamisaka; kambe swilo leswi humaka eka munhu hi swona leswi nyamisaka munhu.”+ 16  — 17  Kuteloko a nghene endlwini yo karhi leyi nga ekule ni ntshungu, vadyondzisiwa vakwe va sungula ku n’wi vutisa malunghana ni xifaniso+ lexi. 18  Kutani a ku eka vona: “Xana na n’wina a mi twisisi ku fana na vona?+ Xana a mi swi lemuki leswaku a ku na nchumu xa le handle lexi nghenaka eka munhu lexi nga n’wi nyamisaka, 19  leswi xi nga ngheniki embilwini yakwe, kambe xi nghenaka emarhumbyini ya yena, xi humela enkululweni?”+ Xisweswo a vula leswaku swakudya hinkwaswo swi basile.+ 20  Ku tlula kwalaho, a ku: “Leswi humaka eka munhu hi swona leswi nyamisaka munhu;+ 21  hikuva endzeni, etimbilwini ta vanhu,+ hi kona laha ku humaka ku anakanya ko biha: vumbhisa,+ vukhamba, ku dlaya hi vomu,+ 22  vuoswi, ku navela,+ swiendlo swa vuhomboloki, vuxisi, ku tikhoma ko biha,+ tihlo ro xondzolota, xisandzu, ku titlakusa, ku pfumala ku anakanyela. 23  Swilo leswi hinkwaswo swo homboloka swi huma endzeni naswona swi nyamisa munhu.”+ 24  Ku suka kwalaho a yima kutani a ya eswifundzheni swa Tiri na Sidoni.+ Hiloko a nghena endlwini naswona a a nga swi lavi leswaku vanhu va swi tiva. Kambe a nga swi kotanga ku endla leswaku a nga voniwi;+ 25  kambe hi ku hatlisa, wansati loyi xinhwanyetana xakwe a xi ri ni moya lowu nga basangiki, a twa ha yena, kutani a ta a tiwisela emilengeni+ yakwe. 26  Wansati loyi a a ri Mugriki, wa tiko ra Vasiro-fenikiya; kutani a hambeta a n’wi kombela leswaku a hlongola dimona eka n’wana wakwe wa nhwanyana.+ 27  Kambe a sungula hi ku byela wansati a ku: “Tshika vana va eneriseka ku sungula, hikuva a swi lulamanga ku teka xinkwa xa vana+ u xi hoxela swimbyanyana.”+ 28  Hambiswiritano, wansati u angule a ku: “Ina, nkulukumba, kambe swimbyanyana leswi nga ehansi ka tafula swi dya mahlanhla+ ya vana lavatsongo.”+ 29  Kutani a ku eka yena: “Hikwalaho ko vula leswi, famba; dimona ri humile eka n’wana wa wena wa nhwanyana.”+ 30  Hiloko wansati a muka, kutani a kuma+ n’wana lontsongo a latiwe esangweni naswona dimona ri humile. 31  Loko a huma exifundzheni xa Tiri a tsemakanya hi le Sidoni a ya elwandle ra Galeliya a tsemakanya hi le xikarhi ka swifundzha swa Dekapolisi.+ 32  Hiloko va n’wi tisela munhu la feke tindleve naswona a ri ni rihika ra ku vulavula, kutani va n’wi kombela leswaku a n’wi tlhandleka voko.+ 33  Kavaloko a n’wi susa entshungwini a n’wi tekela etlhelo kutani a nghenisa tintiho takwe etindleveni ta munhu loyi, loko a tshwuterile, a khumba ririmi+ rakwe. 34  Hiloko a languta ehenhla etilweni,+ a hefemulela+ ehenhla ivi a ku: “Efata,” hileswaku, “Pfuleka.” 35  Ina, matimba yakwe ya ku twa ma pfuleka,+ naswona rihika ra ririmi rakwe ri ntshunxeka, kutani a sungula ku vulavula kahle. 36  Hiloko a va lerisa leswaku va nga byeli munhu+ swilo sweswo; kambe loko a va lerisa ngopfu leswaku va nga byeli munhu, ku va kona va swi huwelelaka+ hi matimba. 37  Hakunene, va hlamale+ ngopfu swinene kutani va ku: “Swilo hinkwaswo u swi endle kahle. Hambi ku ri lava feke tindleve u va endla va twa ni lava nga vulavuriki u va endla va vulavula.”+

Tinhlamuselo ta le hansi