Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Marka 5:1-43

5  Kutani va fika etlhelweni lerin’wana ra lwandle etikweni ra Vagerasa.+  Hi ku hatlisa loko a huma ebyatsweni, a hlanganisiwa hi munhu la lawuriwaka hi matimba ya moya lowu nga basangiki la humaka exikarhi ka masirha-bako ya xitsundzuxo.+  Xilawu xakwe a xi ri exikarhi ka masirha-bako; naswona ku fikela enkarhini wolowo a ku nga ri na munhu ni un’we loyi a a kota ku n’wi boha swi tiya hambi ku ri hi nketana,  hikuva a a tala ku bohiwa hi tinsimbi ni tinketana, kambe a a tsema tinketana, entiyisweni a a tshova tinsimbi; a ku nga ri na munhu la nga ni ntamu wo n’wi hlula.  Vusiku ni nhlikanhi a a hamba a huwelela a ri eka masirha-bako ni le tintshaveni naswona a a tixeka hi maribye.  Kambe loko a vona Yesu a ha ri ekule, a tsutsuma a n’wi nkhinsamela,  naswona, loko a huwelele hi rito+ lerikulu, a ku: “Xana ndzi ni mhaka yihi na wena Yesu, wena N’wana wa Xikwembu Lexi nge Henhla-henhla?+ Ndzi ku hlambanyela+ hi Xikwembu leswaku u nga ndzi xanisi.”+  Hikuva a a ri karhi a wu byela a ku: “Huma eka munhu loyi, wena moya+ lowu nga basangiki.”  Kambe a n’wi vutisa a ku: “Hi wena mani vito ra wena?” Kutani a ku eka yena: “Vito ra mina ndzi Vandla,+ hikuva hi tele.”+ 10  Naswona a n’wi kombela ko tala leswaku a nga hlongoli mimoya leyi etikweni.+ 11  A ku ri ni ntlhambi lowukulu wa tinguluve+ wu ri karhi wu dya+ entshaveni. 12  Kutani yona yi n’wi kombela, yi ku: “Hi rhumele etingulubyeni, leswaku hi nghena eka tona.” 13  Hiloko a yi pfumelela. Kutani mimoya leyi nga basangiki yi huma yi ya nghena etingulubyeni; ntlhambi wu tsutsuma wu wela eriweni elwandle, tinguluve leti lavaka ku ringana 2 000, ti nwela hi ku landzelelana ka tona elwandle.+ 14  Kambe varisi va tona va baleka va ya vika emutini ni le mantanghaleni; naswona vanhu va ta ku ta vona leswi endlekeke.+ 15  Kutani va fika eka Yesu, ivi va vona munhu loyi a a ri ni madimona a tshamile, a ambarile naswona a hanye kahle emianakanyweni, munhu loyi a a ri ni vandla; va sungula ku chava. 16  Nakambe, lava va swi voneke va rungulela van’wana ndlela leyi swi endlekeke ha yona eka munhu loyi a a ri ni madimona swin’we ni le ka tinguluve. 17  Hiloko va sungula ku n’wi kombela leswaku a suka emigangeni+ ya vona. 18  Kuteloko a ri karhi a khandziya byatso, munhu loyi a a ri ni madimona a kombela ku famba na yena.+ 19  Hambiswiritano, a nga n’wi pfumelelanga, kambe u n’wi byele a ku: “Famba ekaya emaxakeni+ ya wena, kutani u ma rungulela swilo hinkwaswo leswi Yehovha+ a ku endleleke swona ni tintswalo+ leti a veke na tona eka wena.” 20  Kutani a famba ivi a sungula ku huwelela eDekapolisi+ swilo hinkwaswo leswi Yesu a n’wi endleleke swona, vanhu hinkwavo va sungula ku hlamala.+ 21  Loko Yesu a tlhela a pelela eribuweni leri nga endzhandzeni hi byatso, ntshungu lowukulu wu hlengeletanela eka yena; a a ri etlhelo ka lwandle.+ 22  Kutani un’wana wa tindhuna leti ungamelaka sinagoga, loyi vito rakwe ku nga Yayiro, a ta, kuteloko a n’wi vona, a wela emilengeni+ yakwe 23  kutani a n’wi kombela ko tala, a ku: “Xinhwanyetana xa mina xi le ka xiyimo xo biha ngopfu. Ndzi kombela u ta u ta xi tlhandleka mavoko+ leswaku xi ta hola, xi hanya.”+ 24  Hiloko a famba na yena. Naswona ntshungu lowukulu a wu n’wi landzela wu ri karhi wu kamanyetelana eka yena.+ 25  A ku ri ni wansati loyi a a khomiwe hi vuvabyi byo khuluka ngati+ malembe ya 12,+ 26  naswona a a vangeriwe switlhavi swo tala hi tin’anga+ to tala, a tirhisa xuma xakwe hinkwaxo, kambe a nga pfunekanga, ematshan’weni ya sweswo, ku vava ku nyanyile. 27  Loko a twa hi ta Yesu, wansati loyi a ta hi le ndzhaku exikarhi ka ntshungu kutani a khumba+ nguvu yakwe ya le handle; 28  hikuva a a hamba a ku: “Loko ndzo khumba ntsena tinguvu takwe ta le handle, ndzi ta hola.”+ 29  Hi ku hatlisa nseledyana wakwe wa ngati wu phya, kutani a swi twa emirini wakwe leswaku u horisiwile evuvabyini bya khombo.+ 30  Yesu hi ku hatlisa na yena a xiya leswaku matimba+ ma humile eka yena, hiloko a hundzulukela entshungwini a ku: “I mani la nga khumba tinguvu ta mina ta le handle?”+ 31  Kambe vadyondzisiwa vakwe va ku eka yena: “Wa swi vona leswaku ntshungu wu tikamanyetela eka wena,+ kambe u ri, ‘I mani la nga ndzi khumba?’” 32  Hambiswiritano, a rhalarhala ku vona wansati loyi a nga endla leswi. 33  Kambe wansati loyi, hi ku tshuka ni ku rhurhumela, hi ku tiva leswi endlekeke eka yena, a ta a ta wela ehansi emahlweni ka yena kutani a n’wi byela ntiyiso hinkwawo.+ 34  A ku eka wansati loyi: “N’wananga, ripfumelo ra wena ri ku hanyisile. Famba hi ku rhula,+ naswona u hanya swinene evuvabyini bya wena bya khombo.”+ 35  Loko a ha vulavula, vanhu van’wana lava humaka ekaya ra ndhuna leyi ungamelaka sinagoga va ta ivi va ku: “N’wana wa wena wa xisati u file! Wa ha n’wi karhatela yini mudyondzisi?”+ 36  Kambe loko marito lama vuriwaka ma wela etindleveni ta Yesu, a byela ndhuna leyi ungamelaka sinagoga a ku: “U nga chavi, ntsena vana ni ripfumelo.”+ 37  Kutani a nga pfumelanga ku landzeriwa hi munhu loko ku nga ri hi Petro na Yakobo na Yohane makwavo wa Yakobo.+ 38  Kutani va fika endlwini ya ndhuna leyi ungamelaka sinagoga, hiloko a vona ku ri ni hasahasa ya huwa ni lava rilaka naswona va kalakala swinene, 39  kutani, loko a nghenile, a ku eka vona: “Ha yini mi vanga hasahasa ya huwa naswona mi rila? N’wana lontsongo a nga fanga, kambe u etlele.”+ 40  Hiloko va sungula ku n’wi hleka hi ku hlekula. Kambe, loko a va humesele ehandle hinkwavo, a teka tata wa n’wana lontsongo ni mana wakwe ni lava a va ri na yena, kutani a nghena laha n’wana lontsongo a a ri kona.+ 41  Kutani a khoma voko ra n’wana lontsongo, a ku eka yena: “Thalitha kumi,” leswi, loko swi hundzuluxeriwa, swi vulaka leswaku: “Nhwanyana, Ndzi ri eka wena, Pfuka!”+ 42  Hi ku hatlisa nhwanyana a pfuka kutani a sungula ku famba, hikuva a a ri ni malembe ya 12. Xikan’we-kan’we a va nga ha tikoti hi ku tsaka+ lokukulu. 43  Kambe a va lerisa hi ku phindha-phindha leswaku va nga byeli+ munhu swilo leswi, kutani a va byela leswaku va nyika nhwanyana loyi swo dya.

Tinhlamuselo ta le hansi