Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Marka 3:1-35

3  A tlhela a nghena esinagogeni, kwalaho a ku ri ni munhu la khwanyaneke voko.+  Kutani a va n’wi honolerile ku vona loko a ta hanyisa munhu loyi hi savata, leswaku va ta n’wi hehla.+  Hiloko a byela munhu la khwanyaneke voko a ku: “Suka u yima u ta laha xikarhi.”  Endzhaku ka sweswo a ku eka vona: “Xana leswi pfumeleriwaka hi savata i ku endla xiendlo lexinene kumbe xiendlo xo biha ke, ku ponisa moya-xiviri kumbe ku wu dlaya?”+ Kambe va miyela.  Naswona endzhaku ko va rhalarhala hi ku hlundzuka, a ri ni gome swinene hikwalaho ko tlanyala ka timbilu+ ta vona, a ku eka munhu loyi: “Tshambuluta voko ra wena.” Hiloko a ri tshambuluta, kutani voko rakwe ri hanyisiwa.+  Vafarisi va huma, kutani hi ku hatlisa va n’wi bohela makungu ni ntlawa wa valandzeri va Heroda,+ leswaku va n’wi dlaya.+  Kambe Yesu a suka ni vadyondzisiwa vakwe a ya elwandle; naswona vunyingi lebyikulu lebyi humaka eGaleliya ni le Yudiya byi n’wi landzela.+  Ni vunyingi lebyikulu lebyi humaka eYerusalema ni le Idumiya ni le ntsungeni wa Yordani ni ku rhendzela Tiri+ na Sidoni, loko byi twa hi ta swilo swo tala leswi a a swi endla, byi ya eka yena.  Kutani a byela vadyondzisiwa vakwe leswaku nkarhi hinkwawo va va ni byatso lebyitsongo lebyi a nga byi tirhisaka leswaku ntshungu wu nga n’wi kamanyeti. 10  Leswi a a hanyise vo tala, swi endle leswaku hinkwavo lava a va ri ni mavabyi ya khombo va wela ehenhla ka yena leswaku va n’wi khumba.+ 11  Hambi ku ri mimoya+ leyi nga basangiki, rini na rini loko yi n’wi vona, a yi tiwisela emahlweni ka yena yi huwelela, yi ku: “U N’wana wa Xikwembu.”+ 12  Kambe minkarhi yo tala a a yi lerisa hi ku kongoma leswaku yi nga endli leswaku a tiviwa.+  13  Kutani a khandziya ntshava, a vitana lava a a va lava,+ kutani va ya eka yena.+ 14  Naswona a sungula ntlawa wa vanhu va 12, lava a tlheleke a va vitana “vaapostola,” leswaku va famba na yena, ni leswaku a va rhuma va ya chumayela+ 15  ni ku va ni matimba yo hlongola madimona.+ 16  Kutani ntlawa wa lava 12 lowu a wu sunguleke a ku ri Simoni, loyi a n’wi thyeke Petro,+ 17  na Yakobo n’wana wa Zebediya na Yohane makwavo wa Yakobo+ (lava u tlhele a va thya Bowanergesi, leswi vulaka Vana va Dzindza-tilo), 18  na Andriya na Filipi na Bartolomi na Matewu na Tomasi na Yakobo n’wana wa Alfiya na Tadiya na Simoni lowa Mukananiya 19  na Yudasi Iskariyota, loyi endzhaku a nga n’wi xenga.+ Kutani a nghena endlwini. 20  Nakambe ntshungu wu hlengeletana, lerova a va nga swi koti ni ku dya swakudya.+ 21  Kambe loko maxaka+ yakwe ma twa hi leswi, ma huma leswaku ma ya n’wi khoma, hikuva a ma ku: “Wa hlanya.”+ 22  Ni vatsari lava a va rhelele va huma eYerusalema a va ku: “U ni Belzebule, naswona u hlongola madimona hi ku tirhisa mufumi wa madimona.”+ 23  Kutani, loko a va vitanele eka yena, a sungula ku va byela hi swifaniso a ku: “Xana Sathana a nga hlongola Sathana hi ndlela yihi? 24  Phela, loko mfumo wu avana hi vuwona, mfumo wolowo a wu nge yimi;+ 25  naswona loko yindlu yi avana hi vuyona, yindlu yoleyo a yi nge yimi.+ 26  Nakambe, loko Sathana a tipfukerile kutani a avana, a nge yimi, kambe u ya emakumu.+ 27  Entiyisweni, a ku na munhu loyi, loko a nghene endlwini ya wanuna wa matimba a nga kotaka ku phanga+ nhundzu yakwe leyi rhwalekaka loko a nga sunguli hi ku boha wanuna wa matimba, kutani hi kona a nga phangaka yindlu yakwe.+ 28  Ndzi mi byela ndzi tiyisile leswaku vana va vanhu va ta rivaleriwa swilo hinkwaswo, ku nga khathariseki swidyoho ni swisandzu leswi va swi endlaka hi ku sandza.+ 29  Hambiswiritano, mani na mani la sandzaka moya lowo kwetsima a nge pfuki a rivaleriwile, kambe u ni nandzu wa xidyoho lexi nga heriki.”+ 30  U vule sweswo, hikuva a va ku: “U ni moya+ lowu nga basangiki.” 31  Hiloko ku ta mana wakwe ni vamakwavo,+ naswona, loko va yime ehandle, va lerisa leswaku va n’wi vitana.+ 32  Hilaha a swi ri hakona, ntshungu a wu tshame wu n’wi rhendzela, kutani va ku eka yena: “Waswivo! Mana wa wena ni vamakwenu va ku lava hala handle.”+ 33  Kambe a va angula a ku: “I mani mana wa mina ni vamakwerhu?”+ 34  Loko a rhalarhale lava tshameke va n’wi rhendzela, a ku: “Vonani, mana wa mina ni vamakwerhu hi lava!+ 35  Mani na mani la endlaka ku rhandza ka Xikwembu, hi yena a nga makwerhu wa xinuna, hi yena a nga makwerhu wa xisati, hi yena a nga manana.”+

Tinhlamuselo ta le hansi