Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Marka 2:1-28

2  Hambiswiritano, endzhaku ka masikunyana a tlhela a nghena eKapernawume kutani ku vikiwa leswaku u kona ekaya.+  Hikwalaho ku hlengeletana vunyingi, lerova ku nga ha vi na ndhawu, hambi ku ri enyangweni, hiloko a sungula ku va byela rito.+  Kutani vanhu va n’wi tisela munhu la omeke swirho a tlakuriwe hi vanhu va mune.+  Kambe loko va tsandzeke ku n’wi yisa eka Yesu hi ku kongoma hikwalaho ka ntshungu, hiloko va hahlula lwangu ehenhla ka laha a a ri kona, kutani loko va cele mbhovo, va nembeleta rihlaka leri munhu la omeke swirho a a etlele+ eka rona.  Loko Yesu a vona ripfumelo+ ra vona, a ku eka munhu la omeke swirho: “N’wananga, swidyoho swa wena swi rivaleriwile.”+  A ku ri ni vatsari van’wana kwalaho, va tshamile naswona va kanela etimbilwini ta vona:+  “Ha yini munhu loyi a vulavula hi mukhuva lowu? Wa sandza. I mani la nga rivalelaka swidyoho handle ka un’we, ku nga Xikwembu?”+  Kambe Yesu, loko hi ku hatlisa a swi xiyile hi moya wa yena leswaku va anakanya hi ndlela yoleyo, a ku eka vona: “Ha yini mi anakanya swilo leswi etimbilwini ta n’wina?+  I yini lexi olovaka swinene, xana i ku byela munhu la omeke swirho u ku, ‘Swidyoho swa wena swi rivaleriwile,’ kumbe i ku vula u ku, ‘Pfuka u teka rihlaka ra wena u famba’?+ 10  Kambe ku endlela leswaku mi swi tiva leswaku N’wana wa munhu+ u ni mfanelo yo rivalela swidyoho emisaveni,”+—a byela munhu la omeke swirho a ku: 11  “Ndzi ri eka wena, Pfuka, teka rihlaka ra wena, u muka.”+ 12  Hi ku landza sweswo a pfuka, kutani a teka rihlaka rakwe hi ku hatlisa a huma emahlweni ka vona hinkwavo,+ lerova hinkwavo ka vona a va tikhome tinhlaya, kutani va vangamisa Xikwembu, va ku: “A hi si tshama hi swi vona swo fana na swona.”+ 13  Nakambe a huma a ya etlhelo ka lwandle; kutani ntshungu hinkwawo wu hambeta wu ya eka yena, kutani a sungula ku wu dyondzisa. 14  Kuteloko a hundza, a vona Levhi+ n’wana wa Alfiya a tshame ehofisini ya xibalo, hiloko a ku eka yena: “Vana mulandzeri wa mina.” Kutani a suka a yima a n’wi landzela.+ 15  Endzhaku a ya vurhama etafuleni endlwini yakwe, naswona valuvisi+ vo tala ni vadyohi a va vurhame na Yesu ni vadyondzisiwa vakwe, hikuva a va tele naswona a va sungula ku n’wi landzela.+ 16  Kambe vatsari va Vafarisi, loko va vona leswaku a a dya ni vadyohi ni valuvisi, va ku eka vadyondzisiwa vakwe: “Xana yena u dyela yini ni valuvisi ni vadyohi?”+ 17  Loko Yesu a twa leswi, a ku eka vona: “Lava tiyeke a va lavi n’anga, kambe yi laviwa hi lava vabyaka. Ndzi tele ku ta vitana vadyohi,+ ku nga ri vanhu lava lulameke.” 18  Kutani vadyondzisiwa va Yohane swin’we ni Vafarisi a va hanya hi ku titsona swakudya. Hiloko va ta, va ku eka yena: “Ha yini vadyondzisiwa va Yohane ni vadyondzisiwa va Vafarisi va hanya hi ku titsona swakudya, kambe vadyondzisiwa va wena a va hanyi hi ku titsona swakudya?”+ 19  Kutani Yesu a ku eka vona: “Vanakulobye va muteki a va nge titsoni swakudya+ loko muteki a ha ri na vona, a swi tano ke? Loko ntsena muteki a ha ri na vona a va nge titsoni swakudya.+ 20  Kambe ma ta masiku lawa ha wona muteki a nga ta susiwa eka vona, kutani va ta titsona swakudya esikwini rero.+ 21  A ku na munhu la rhungelelaka xitiva xa lapi lexi nga khwanyanangiki engubyeni ya le handle ya khale; loko o xi rhungelela, ntamu wa xona lowu teleke wu ta koka xitiva lexintshwa eka lexa khale, naswona ku handzuka ku ta nyanya.+ 22  Nakambe, a ku na munhu la chelaka vhinyo leyintshwa emaguleni ya khale ya vhinyo; loko o yi chela, vhinyo yi ta boxa magula, naswona vhinyo yi ta lova swin’we ni magula.+ Kambe vanhu va chela vhinyo leyintshwa emaguleni lamantshwa ya vhinyo.”+ 23  Loko a ri karhi a tsemakanya masimu ya swimila hi savata, vadyondzisiwa vakwe va sungula ku hambuka va kha+ swichocho.+ 24  Kutani Vafarisi va ku eka yena: “Vona laha! Ha yini va endla leswi nga pfumeleriwangiki hi savata?”+ 25  Kambe a ku eka vona: “Xana a mi si tshama mi hlaya hi leswi Davhida+ a nga swi endla loko a pfumarile kutani a twa ndlala, yena ni vavanuna lava a va ri na yena?+ 26  Ndlela leyi a ngheneke ha yona endlwini ya Xikwembu, emhakeni leyi khumbaka Abiyatara+ muprista lonkulu, kutani a dya swinkwa leswi nyikeriweke,+ leswi ku nga pfumeleriwiki+ hambi ku ri mani ku swi dya handle ka vaprista, swin’wana a nyika vavanuna lava a va ri na yena?”+ 27  Kutani a ya emahlweni a ku eka vona: “Savata yi ve kona hi mhaka ya munhu,+ ku nga ri munhu hi mhaka ya savata;+ 28  hikwalaho N’wana wa munhu nakambe i Hosi ya yona savata.”+

Tinhlamuselo ta le hansi